Read berom Yɔshuwa 3 Bible Online

Yɔshuwa 3 - berom bible

Yɔshuwa 3

¹Nusu hwol bop nagasi, Yɔshuwa yɛn tanga BeIsrayɛl mwa ba sogo, ba kaba gwong yi e Shitim vɔk e Yɔrdan. Yɛn a ka ye ngyɔk e hwomo gyam na yɛn a ye dɔ.

²E bamâ nepɔlɔ netat, bemât nuyel ba to gwɔrɔ e ji kwɔ̂n yê ngyɔk,

³ko ba nɔ̂ng bemat nu, ba ye, “Jeng de yin a di bepiris, yɛn BeLevi, ba jut Kundung Wuna-na-Sirâ Dagwi Darwey, Dagwi min, ba hwo kyè, ko yin sogo, na yin raa hɛn.

⁴Ano de yin a rɔda tɔk gwong de yin ê kwey ɛ, remo de yin a ga sang kyè e gwɛ wɛt. Yin raa kundung o bagat bagat wɛt, ko tík in tyɛl sede lyosho jining e tē min na gwɛ.”

⁵Ko Yɔshuwa a yâng BeIsrayɛl mwa, “Fúng in bato min haalal, yaga nahwol Dagwi Darwey a rɔda ba ra pyɛ̂ langat e tē min.”

⁶Nusu hwol, Yɔshuwa a yâng bepiris, “Jut in Kundung Wuna-na-Sira, gana hin gwɛ, na yin kwey mɛ e nuyêl bemat.” Yɛn kwong ba gana gwɛ, ba kwey mɛ e nuyêl bemat o.

⁷Ko Dagwi Darwey a yâng Yɔshuwa, “Di, yunung ma rɔda ra pyɛ de yê tɛ̀ mwa BeIsrayɛl be hwo nɔng o nerey. Yɛn a rɔda tɔk, ma rɔda sè tanga hwo, sede remo de má kana sè tanga Mose.

⁸Há a bepiris de ba gana Kundung Wuna-na-Sira wɔgɔ, jeng de yɛn a wɔ̀ wul nû Rɔt Yɔrdan, ko yɛn a tumal ting.”

⁹Yɔshuwa kwong a yâng BeIsrayɛl, “Vey in bagat, na yin wok neha Dagwi Darwey, Dagwi min.

¹⁰Yin a rɔda tɔk, Dagwi wo neken a sé e tē min, ko a rɔda ro a yin BeKanaan, na BeHiti, na BeHivi, na BePɛrizi, na BeGirgash, na BeAmɔr tanga BeYebus.

¹¹Mwin, Kundung Wuna-na-Sirâ Dâ jey mwa gwa rɔda kwey e nuyel min wɔ ye dɔ a Rɔt Yɔrdan.

¹²A remo, kasa hin bemat kuru na vɛ beba, gwining yi e kayɛ yerê BeIsrayɛl.

¹³Jeng de bepiris de ba gana Kundung Wuna-na-Sirâ Dagwi Darwey, Dâ jey mwa, ba tɛ̀ bol mɛn e ji nshî Yɔrdan, ko nshi de ne tele e rɔt o yi e rak o na rɔda tumal, ne tɛ̀ rahwol.”

¹⁴BeIsrayɛl ba sogo yi e kwɔ̂n ye ngyɔk mɛn, na be hwo kyè wɔ̀ ye dɔ, ko bepiris de ba gana Kundung Wuna-na-Sira bá sè e nuyel mɛn.

¹⁵Ko di, jeng yane yá sè jeng hywɛp, nshi na sé tɛmɛ mo e Rɔt Yɔrdan. Jeng de bepiris o ba wul Yɔrdan o, ko bol mɛn ba yel e ji nshi cɔ̀rɔk,

¹⁶nshi de ne tele yi e rak o nà tumal, na tɛ̀ rahwol, yikyik yi na yɛn, e repomô Adam de ra sé bagat na Zaretan. Ko nemo de ne tele vɔk e Gworep Araba wɔgɔ, Gworep Nevwashe, na gyirik hywiri, ko bemat o ba ye dɔ bagat na Yeriko.

¹⁷Bepiris de ba gana Kundung Wuna-na-Sira ba tumal e ra vwel hwogot e tê Rɔt Yɔrdan, ko mwa BeIsrayɛl ba bɔrɔs e vwel hwogot, sɛ̌ mwa hɛn ba yɛnɛ ye dɔ.