Read berom Yɔshuwa 4 Bible Online

Yɔshuwa 4 - berom bible

Yɔshuwa 4

¹E bama de BeIsrayɛl mwa ba ga yɛnɛ ye dɔ à Rɔt Yɔrdan, ko Dagwi Darwey a yâng Yɔshuwa,

²“Kasa hin bemat kuru na vɛ beba, gwining yi e kayɛ yere,

³ko nɔng in hɛn nu, na be jut beta kuru na vɛ beba, kawɛ a jut gwofwa gwining yi e kwɔn de bepiris ba tumal ɛ e tê Rɔt Yɔrdan. Bē kyè na beta mo, na be wɔ̀ tik vɛ e kwɔn de yin ê ye ɛ ngyɔk naturuk.”

⁴Ano kwong, Yɔshuwa a yila bemat kuru na vɛ beba vinde a tɛ̀ ba ga kasa.

⁵Ko a yang ɛn, “Kwey in e nuyêl Kundung Wuna-na-Sirâ Dagwi Darwey, Dagwi min, vɔk e tê Rɔt Yɔrdan. Kawɛ e ji min a jut gwofwa gwining e ra sanat mɛ e hwomo, tyɛng na nepyak yerê BeIsrayɛl.

⁶Beta mo ba rɔda sè pyɛ bare e ra pyɛ de Dagwi a ga ra. E jeng de ye kyè vey, sede nèy min na rɔda ba rangal hin cap-hâ beta vemo,

⁷ko yin yang ɛn, ‘Nshî Rɔt Yɔrdan na kana tumal, yaga na be ye dɔ na Kundung Wuna-na-Sirâ Dagwi Darwey. Yaga ano, beta vemo ba sé a BeIsrayɛl pyɛ bare neshey gbak-gbak.’ ”

⁸Bemat o ba ra tyɛng na pyɛ de Yɔshuwa a nɔng ɛn nu. Yɛn a jut beta kuru na vɛ beba tyɛng na nepyak yerê Israyɛl yi e tê Rɔt Yɔrdan, sede remo de Dagwi Darwey a nɔ̂ng Yɔshuwa nu, ko yɛn a kyè mɛ vɔk e kwɔn de yɛn a ye ɛ̀ ngyɔk, yɛn a tula vɛ e hwomo.

⁹Yɔshuwa arɔng a tula beta kuru na vɛ beba e tê Yɔrdan tyɛng e kwɔn de bepiris de ba gana Kundung Wuna-na-Sira bá tumal ɛ. Beta ma vane e hwomo pere vey e yunung.

¹⁰Bepiris ba tumal e tê rɔt o, sɛ̌ ba yɛnɛ kayɛ pyɛ de Dagwi Darwey a nɔ̂ng Yɔshuwa nu, na a ha a bemat be ra. Ano de Mose á kana nɔ̂ng Yɔshuwa nu arɔng. Bemat o kwong ba ye dǔng, ba ye dɔ.

¹¹Bama de ba ga ye dɔ mwa, ko bepiris de ba gana Kundung Wuna-na-Sira ba nusu yi e rɔt o, ba kwey e nuyêl bemat o.

¹²Bemât yerê Rubɛn, na vê Gat tanga rebit yerê Manase, de ba yong ɛn na pyɛ̂ como mɛn, ba ye dɔ tanga bemɛn, tyɛng sede remo de Mose a kana ha a yɛn.

¹³Bemat de ba yong ɛn na pyɛ̂ como ba wul sede gu kuru banaas (40,000). Ba ye dɔ e nuyêl Dagwi Darwey vɔk e tyɛl Yeriko yaga tô como.

¹⁴E tuk hane, Dagwi Darwey a ra pyɛ de ya nɔ̂ng Yɔshuwa nerey e bayîs BeIsrayɛl mwa, ko ba nɔng ɛ nerey vɔk e yɛnɛ̂ neken mɛ, sede remo de yɛn á kana nɔ̂ng Mose nerey.

¹⁵Ko Dagwi Darwey a yâng Yɔshuwa,

¹⁶“Yang bepiris hom vemo de ba gana Kundung Wuna-na-Sira, be nusu yi e ji Rɔt Yɔrdan.”

¹⁷Yɔshuwa kwong a ra ano.

¹⁸Ko jeng de bepiris o ba nusu hɛn, ba tɛ̀ bol mɛn e ra kwogom rɔt o, ko remo-remo nshi na yi mùngulang, na to hwo tele sede raane.

¹⁹Á sè e pwɛl gwô susu mo e tuk hê kuru de BeIsrayɛl ba ye dɔ à Rɔt Yɔrdan, ko ba tɛ̀ bǔk ye ngyɔk mɛn e Gilgal e rwa rak wo Yeriko.

²⁰A sè e hwomo de Yɔshuwa a tula beta kuru na vɛ beba de ba kana jut yi e Rɔt Yɔrdan.

²¹Ko a yâng BeIsrayɛl, “E jeng de ye kyè vey, sede nèy min nà ba rangal hin cap-hâ beta vemo,

²²ko yang in hɛn, á sè e ngamo de BeIsrayɛl ba ye dɔ à Rɔt Yɔrdan e vwel hwogot.

²³Ha a yɛn, Dagwi Darwey, Dagwi min, á tɛ̀ nshî Yɔrdan na hworok e nuyel min sɛ̌ yin a ye dɔ, tyɛng sede remo de á kana ra e Gbɔng Rep Sere, na wot ye dɔ arɔng.

²⁴Á ra ano, yaga na mwa yére bemât jey ye bin tɔk, Dagwi Darwey a vɔk gbɔng reto, ko yin arɔng yin a rɔda vɔk bengyip mɛ, yɛ Dagwi min, nesheneshey.”