Read berom Yɔshuwa 5 Bible Online

Yɔshuwa 5 - berom bible

Yɔshuwa 5

¹Mwa begwɔ̀m BeAmɔr de bá sangal e rwa ta yi e Rɔt Yɔrdan, tanga mwa begwɔ̀m BeKanaan de ba sangal bagat na Gworep Tē, ba wok, Dagwi Darwey a ga tɛ̀ nshî Rɔt Yɔrdan na ye jɔng yaga na BeIsrayɛl be ye dɔ, ko nemi na gaba a yɛn e yey, vit a mwat de a to vɔk yey ting, yaga BeIsrayɛl o.

²E jeng yane, Dagwi Darwey a hwo yâng Yɔshuwa, “Yong nebǎ na dyéngere, na hwo wɔ́ a BeIsrayɛl mɛ̀ e cwɛl.”

³Yɔshuwa kwong a vɔk a tɛ̀ ba yong nebǎ na dyéngere, ko ba wɔ́ a BeIsrayɛl mɛ e cwɛl. Ba vo a kwɔn o rezâ Rahwôl wɔ̂ Cwɛl.

⁴E jeng de BeIsrayɛl bá kana nusu yi e Misra, mwa beras, bá kana wɔ a yɛn e cwɛl. Ko nèy de bá tɔs e ji neshey kuru banaas nè ríni mɛn e hey, bá wɔ a hak e cwɛl wɛt. E ji neshey nane, beras mwa de bá vey tô como e jeng de ba nusu yi e Misra, bá kushu e ji hey. Yɛn á kana kyɛ́ ɛn nà wok hâ Dagwi Darwey, yaga ano, Dagwi á sira a yɛn, a rɔda nɔng ɛn gwong, na be di vwel de ha siri, de he nɔngɔs pyɛ́ shɛrɛk wɛt, hemo de á kana sira a bedabeda mɛn.

⁷Ko Dagwi á yâng nèy mɛn cik e to mɛn, ko ba ga kana kyese a nɛ e cwɛl e jeng de ba rɔ̌ rini wɛt. A sé e nɛ̀ mo de Yɔshuwa á de wɔ́ a nɛ̀ e cwɛl.

⁸Bama de ba ga yɛnɛ yosom bemat o mwa, ko yɛn a nàra e kwɔ̂n ye ngyɔk vɔk e jeng de baram o ba vél.

⁹Ko Dagwi Darwey a yâng Yɔshuwa, “Yunung ma ga pát in yi e ji byɛ̂s sesam Misra.” A sé ano de ba vo a kwɔn o rezâ Gilgal,[1] vey e remo.

¹⁰Jeng de BeIsrayɛl bá rɔngɔl e kwɔ̂n ye ngyɔk e Gilgal, e tyɛl de ya sé bagat na Yeriko, ba ra Nzem Gyilsit Nelɔ BeIsrayɛl. Hane há sè e pwɛl gwo mɛsɛng e tuk hê kuru na hɛ naas nawiri.

¹¹Nusû hwol, e tuk hane mo yɛn á susu rê pyɛ̂ sevwel o, yɛ à alkama de ba halang e gwopey tanga kpam-tuk de ba yong sana géy-sing.

¹²Yi e tuk hane mo, bama de yɛn a ga re pyɛ̂ vwel o, BeIsrayɛl ba to sɛ̀ mana wɛt. E shey a hane de yɛn a hwo rê pyɛ̂ vwêl Kanaan.

¹³Jeng de Yɔshuwa á sè bagat na Yeriko, ko ras de á di mwat hwak e tumal na cèles wal e vwɔ mɛ. Yɔshuwa á sek bagat na yɛ, ko a rangal hɛ, á ye, “Hwà sé mwot kɛ mwɛn ɛ?”

¹⁴Mwat o a toyo a yɛ, a ye, “Wey, ma sé hwak e ji mo wɛt. Ma sé mwât nuyêl regyɛng bemât comô Dagwi Darwey, ko a remo ma sé e ngamo.” Yɔshuwa a vɔk a gaba gup e vwel, a re a yɛ fongol, ko a rangal hɛ, a ye, “À da, me a womo. Hwó simo me ra sɛ́ ɛ?”

¹⁵Mwat o a yang ɛ, “Pat bekpatak vane e bol mō, yaga kwɔn de hwà sé tumal ɛ ha sé jɛrɛ.” Ko Yɔshuwa a ra ano.