Read berom Yɔshuwa 6 Bible Online

Yɔshuwa 6 - berom bible

Yɔshuwa 6

¹Ko di, ba ga bang ri repomô Yeriko gak yaga BeIsrayɛl, vit a mwat de a tɔk yel kɛ a nusu.

²Dagwi Darwey a yâng Yɔshuwa, “Di, ma ga nɔng o repomô Yeriko tanga gwɔ̀m o na besugâ comô rɛ mwa e vɔ mō.

³Tik na hwo tanga bemât como mō yin gwɔrɔ repomo mo zang hining kahɛ tuk. Ra in ano pɔlɔ tyiimin,

⁴ko bepiris hom betaama, kawɛ na durûm tùruk e vwɔ mɛ, yɛn a rɔda kyè e nuyêl Kundung Wuna-na-Sira. E tuk hê taama yin a rɔda gwɔrɔ repomo mo zang taama, ko bepiris o bê sè pɛsɛl bedurum o.

⁵Jeng de ba hwɔtɔ pɛ̂l bedurum o na gap ding-ding, remo-remo mwa bemat be gbɔ na gbɔng fwɔ sizɔng, jwa-pomo mo wa rɔda gaba, ko mwa bemât como, kawɛ mo a rɔda yel e ji repomo mo cik e nuyel mɛ.”

⁶Yɔshuwa Nun a hwo yishi bepiris, a yang ɛn, “Jut in Kundung Wuna-na-Sira, ko betaama e ji min de ba vɔk bedurum be kwey e nuyêl kundung o.”

⁷Ko a yâng bemat mwa, “Kwéy in, gwɔrɔ hin repomo mo, ko bemat de ba vɔk nedôk como be sey yêl Kundung Wuna-na-Sira Dagwi Darwey.”

⁸Sede remo de Yɔshuwa a ga nɔng nu, bemât nedôk como ba yel, ba kyè e nuyêl bepiris betaama de ba vɔk bedurum. Bepiris de ba gana Kundung Wuna-na-Sira ba raa, ko bemât nedôk como behak ba raa vê gana kundung o. Mwa jeng de yɛn a sé kyè, ba kyè na pɛsɛ̂l bedurum o.

¹⁰Ko Yɔshuwa a ga kana nɔ̂ng BeIsrayɛl nu gyam, yɛn a kwon gbɔ wɛt, yɛn a kwon wunta nu arɔng wɛt, sɛ̌ jeng de a de nɔng ɛn nu.

¹¹Ano kwong, a tɛ̀ ba gana Kundung Wuna-na-Sirâ Dagwi, ba gwɔrɔ mɛ repomo mo zang hining. Ba toyo vey e kwɔ̂n ye ngyɔk mɛn, ba pɔl ɛ e hwomo.

¹²Tuk het bop nagasi, Yɔshuwa a to tɛ̀ bepiris be gana Kundung Wuna-na-Sirâ Dagwi Darwey.

¹³Ko yɛn a sogo. Bemât nedôk como ba kwey e yel, bemât bedurum ba raa na pɛsɛl bedurum, bemât ganâ Kundung Wuna-na-Sira ba raa arɔng, ko bemât nedôk como vê bama ba dyɛng ɛ yi e bama.

¹⁴Tuk hê ba, ba to gwɔrɔ repomo mo zang hining, ko ba toyo vɔk e bǔk mɛn. Yɛn a dopse ragas ano nepɔlɔ netyiimin.

¹⁵Tuk hê taama, ba sogo gasi ha sè tē gbey, ko ba gwɔrɔ repomo mo sede jojot zang taama. E tuk a hane zɔng de yɛn a gwɔrɔ repomo mo zang taama.

¹⁶E gwɔrɔ hê netaama mo, jeng de bepiris ba sé pɛsɛl bedurum o, ko Yɔshuwa a yang ɛn, “Mok in! Dagwi Darwey a ga nɔng in repomo mo.

¹⁷Wey in na repomo mo tanga pyɛ̂ mwa de ya sé e ji rɛ hywiri, yaga ya sé yê Dagwi Darwey! E Rahap devwes zɔng tanga mwa belɔ mɛ de ba sé na yɛ e ji lɔ mɛ de yin a rɔda tik ɛn beken, yaga a kana lɛrɛ bemât wɛlɛ mot.

¹⁸Ko yin kwon jut pyɛ cak yi e pyɛ́ de bê wey na yɛ wɛt. Ka sede mwat hwak a jut pyɛ cak e ji pyɛ́ de ya sé yê Dagwi, ko hane ha rɔda vey na reyɔm e ra kwɔ̂n ye ngyɔk mot, ba rɔda wey na hɛ hywiri.

¹⁹Mwa pyɛ́ de ba yong na dyam shinang, na yê dyam pyɛng, tanga yê dyam shi na yê dyam pama, ba rɔda tik yɛ jaram yaga Dagwi Darwey, ba rɔda wɔ̀ tik yɛ e ji gban kwɔ̂n re a Dagwi fongol.”

²⁰Ano kwong, bepiris ba hwo pɛsɛl bedurum, jeng de bemât como mo ba wok toshô bedurum o ba hwo gbɔ na gbɔng fwɔ, ko jwâ-pomo mo wa vɛ̌ gaba. Kawɛ mwat kwong a vɛ̌ yel e ji mo tɛk e nuyel mɛ. Ko yɛn a vɔk be re rɛ.

²¹Yɛn a vɛ̌ mɔbɔs kayɛ pyɛ hywiri na bewal: mwa hɛn beras na beha, nèy na bemakuk; ba ka tɛt ɛ berɔndɔng na vyēl tanga bemadung wɛt.

²²Yɔshuwa kwong a yâng bemat beba vane de bá kana tomo hɛn e wɛlɛ, “Yel in e ji lɔ̂ devwes, na yin wɔ̀ pat ɛ mwa tanga bemat de ba sé na yɛ, tyɛng sede remo de yin á kana sira a yɛ.”

²³Ko bewen beba mo ba yel, ba wɔ̀ pat Rahap, na da mɛ, na neng mɛ, tanga begwa mɛ na mwa bemât lɔ mɛ. Ba wɔ̀ tik ɛn e jey bagat na kwɔ̂n ye ngyɔk BeIsrayɛl.

²⁴BeIsrayɛl ba dak kya e repomo mo mwa na kayɛ pyɛ de ya sé e ji rɛ, ko yɛn a tik pyɛ́ de ba yong na dyam shinang na yê dyam pyɛng, tanga yê dyam shi na yê dyam pama e gban kwɔ̂n rê fongol.

²⁵Yɔshuwa kwong a tik Rahap kwɛn tanga belɔ da mɛ tanga mwa pyɛ́ de ya sé myɛ, yaga Rahap o á kana lɛrɛ betom de á tomo, na be wɔ̀ wɛlɛ Yeriko. Yére mɛ ya vɛ̌ sangal e ji BeIsrayɛl vey e yunung.

²⁶E jeng yane kwong, Yɔshuwa a sira hɛ na sirâ mwin, a ye: “Dagwi Darwey ê kyini mwa mwat de a rɔda ba sogo na lɔ̂k repomo remo Yeriko. Sede a bomo retîs rɛ, ko hwey mɛsɛng mɛ ha rɔda ku, sede a tɛ̀ ri mo, ko hwey tala mɛ ha rɔda ku.”

²⁷Dagwi Darwey á sè tanga Yɔshuwa, ko reza mɛ kwong ra nusu e sevwel o mwa.