Read berom Yɔshuwa 7 Bible Online

Yɔshuwa 7 - berom bible

Yɔshuwa 7

¹BeIsrayɛl ba gyili redu de Dagwi a nɔng ɛn e ra pyɛ́ de ba rɔda wey na yé hywiri yaga ya sé myɛ. Mwat hwak yi e yerê Yuda reza mɛ à Akan Karmi Zabdi Zɛra, a jut yi e ji pyɛ́ de ba rɔda wey mɛ mo. Ko shôm Dagwi Darwey ya sogo e ra BeIsrayɛl ding-ding.

²Yɔshuwa a tomo bemat yi e Yeriko vɔk e repomô Ai de ra sé e rwa rak na Bet-Ɛl bagat na Bet-Avɛn. A nɔng ɛn nu, na be wɔ̀ wɛlɛ bak vwel o. Bemat o ba wɔ́, ko yɛn a bɛrɛng vwel o e wɛlɛ.

³Ba toyo, ba ha a Yɔshuwa ba ye, “Bemât repomo mo ba sé tyɔng zɔng. Be kwon tɛ̀ bemât como mwa be re yôm wɔ wɛt. Bemat sede gu baba (2,000) kɛ batat (3,000) ba rɔda vey, na be wɔ̀ yɛnɛ na yɛn zɔng.”

⁴Yaga ano, ba tomo bemât como sede gu batat ba wɔ, ko bemât Ai ba ro ɛn.

⁵Bemât Ai o ba ro BeIsrayɛl yi e rwi repomo wɔ gyirik vɔk e nekwɔn dak beta, ba mɔbɔs bemat sede kuru batat na vɛ betyiimin. A yâng BeIsrayɛl o jwɛɛnɛn, ko neyey mɛn na ye ywey sede nshi.

⁶Yɔshuwa tanga bemakuk BeIsrayɛl ba hama berugu mɛn yaga lashê yey, ba gaba gup e vwel e nuyêl Kundung Wuna-na-Sirâ Dagwi Darwey, ba tɛ̀sɛ fongol e bato mɛn, ba nàra vɔk e nahywegelek.

⁷Yɔshuwa a ye, “Áyaa kukuuk! À Dagwi Darwey, Dagwi mot! Yaga sɛ́ de hwà yang ot dɔ à gurâ Yɔrdan ɛ? Yaga na hwo ba nára hot e vɔ BeAmɔr, na be wey na wot arɛt? Ka wot a yâng nàra e gurâ Yɔrdan gworo zɔng.

⁸À Darwey, ma rɔda ye ala arɛt? A remo de BeIsrayɛl ba nɔng ma, ba tele a bemât repugu mɛn.

⁹Sede BeKanaan tanga bwâng bemât vwel o ba wok pyɛ yemo, ko yɛn a rɔda hwo e ra wot, na be wey na reza mot yi e jey. Ko sɛ̌ hwô ra e rɛ̌ na nerey mō na reza mō arɛt?”

¹⁰Ko Dagwi Darwey a yâng Yɔshuwa, “Sogo! Hwà gaba sɛ́ gup e vwel ano ɛ?

¹¹BeIsrayɛl ba ga ra banɛn! Yɛn a ga kyɛ́ ɛn nà gyeng wuna-na-sira de ma ra na yɛn. Yɛn a ga jut pyɛ cak e ji pyɛ́ de bê wey na yɛ hywiri yaga ya sé nyang. Yɛn a ga shigi, yɛn a ga vɛ bɔs, yɛn a ga wɔ lɛrɛ yɛ e ji pyɛ́ mɛn.

¹²Pyɛ de ya tɛ̀, BeIsrayɛl ba rɔda tɔk tumal e nuyêl bemât repugu mɛn wɛt. Yɛn a nɔ̂ng bemât repugu mɛn o bama, yaga yɛn pyɛ mɛn ba ga tɛ́ ɛn pyɛ́ de ba rɔda wey na yɛn hywiri. Ma rɔda to sè tanga yin e ngamo nuyel ko tyɔng wɛt, sɛ̌ yin a gas in na pyɛ̂ nekyiri yane de ba yang in mwat hwak a jut wɛt.

¹³A remo, sogo, na hwo nɔ̂ng bemat nu, yɛn a fúng bato mɛn haalal. Ha a yɛn, be yong ɛn yaga gasî hwol, yaga me Dagwi Darwey, Dagwî BeIsrayɛl ma ye ngan: À yin BeIsrayɛl, pyɛ̂ nekyiri de ma ye, be wey na yɛ, ya sé e tē min. Yin a rɔda tɔk tumal na yey ting e nuyêl bemât repugu min wɛt, sɛ̌ yin a tanga gas in na pyɛ̂ nekyiri yane e tē min e ngyen.

¹⁴Nagasi nahwol yin a rɔda ba vey e nuyel hom, kavɛ e yere mɛn. Ko yere de ma vo, ba rɔda vey e rùhup mɛn, ko ruhup de ma vo, ba rɔda vey e nelɔ nelɔ, ko lɔ de ma vo, ba rɔda vey beras vivining.

¹⁵Mwa mwat de ba vo ɛ na pyɛ̂ nekyiri mo, ba rɔda rangas hɛ, yɛ na mwa pyɛ́ de ya sé myɛ. Yaga a ga kyɛ́ ɛ nà gyeng wuna-na-sira hom, a to ra pyɛ́ de ya nɔ̂ng BeIsrayɛl rekyen.”

¹⁶Ko Yɔshuwa a tulu bop nagasi, a yishi yére Israyɛl jijining, ko ba vo yerê Yuda.

¹⁷Ba yishi rùhup Yuda vivining, ko ba vo ruhûp Zɛra. Ba yishi bedanelɔ Zɛra vivining, ko ba vo lɔ Zabdi.

¹⁸E yɛnɛ mo, ba yâng kawɛ rwâs lɔ Zabdi a vey, ko ba vo Akan hwêy Karmi, de a sé hwêy Zabdi, ruhûp Zɛra wo yerê Yuda.

¹⁹Ko Yɔshuwa a yâng Akan, “À hwey hom, ha tsak o e nuyêl Dagwi Darwey, Dagwî BeIsrayɛl, ko hwo kulu renɛn mō na yɛ. Ha a me pyɛ de hwà ga ra, hwo lɛrɛ a me na pyɛ cak wɛt.”

²⁰Akan a yang ɛ, “Ey mwin, ma ga ra a Dagwi Darwey, Dagwî BeIsrayɛl, renɛn. Pyɛ ma yemo de ma ra:

²¹E ji pyɛ́ de wot a re na como, ma di gwogbɔng gworugu gworwat yerê gwo bemât Babilɔnya na dyam pyɛng de nedirîk yɛ na wul sede kilo beba na gwelê dyam shinang, nedirîk gwɛ̀ na dal rebît kilo. Ma mara yîs yɛ, ko ma jut yɛ. A yane, ma lɛrɛ yɛ e ji vwel e ji buk hom, ma lɛrɛ dyam pyɛng o e nɛn o.”

²²Yɔshuwa kwong a tomo betom wɔ e buk o, yɛn a hwo tele vɔk e buk o, ko ba wɔ̀ sɛ̀ pyɛ́ mo, ba lɛrɛ yɛ e ji mo, ba tɛ̀ dyam pyɛng e nɛn o.

²³Yɛn a hashe yɛ̄, ba vey a Yɔshuwa na mwa BeIsrayɛl mɛ, ko ba tik yɛ e nuyêl kundung Dagwi Darwey.

²⁴Yɔshuwa mwa na BeIsrayɛl, ba jut Akan na dyam pyɛng o, na gwelê dyam shinang o, na gworugu mo mwa na nèy mɛ bewen na behwong tanga berɔndɔng mɛ, na bemadung mɛ, na vyēl mɛ tanga buk mɛ, tanga mwa pyɛ́ de a vɔk. Ba kyè mɛ e Nɛk Akor.

²⁵Ko Yɔshuwa a yang ɛ, “Yaga sɛ́ de hwà nɔng ot reyɔm ano ɛ? Dagwi a rɔda nɔng o reyɔm arɔng yunung.” Ko BeIsrayɛl mwa ba tó ɛ mwa na belɔ mɛ na beta, ko ba vɛ̌ rangas hɛn mwa na kya.

²⁶Yɛn a tula rahwôl beta e ra Akan o. Beta mo ba sé ɛ vey e yunung. Ano kwong, shôm Dagwi Darwey ya ye rɔ̀s. A sé yaga ano de ba vo a kwɔn hane mo rezâ Nɛk Reyɔm[2] vey e remo.