Read berom Yɔshuwa 9 Bible Online

Yɔshuwa 9 - berom bible

Yɔshuwa 9

¹Hâ wɛng BeIsrayɛl ha shara hɛ, ko begwɔ̀m de ba sangal e rwa ta na Yɔrdan e bak bapomô beraku, na vê berahwol, na vemo de ba sé e tyɛl e lyoshô Gworep Tē pere vɔk e Lɛbanɔn, e rwa bato, vɛ a begwɔ̀m BeHiti, na BeAmɔr, na BeKanaan, na BePɛrizi, na BeHivi tanga BeYebus.

²Yɛn a tula hɛn mwa, na be tó como na Yɔshuwa tanga BeIsrayɛl.

³Ko bemât Gibɛyɔn, yɛn à BeHivi, ba wok pyɛ́ de Yɔshuwa a ga ra a bapomô Yeriko tanga Ai,

⁴ko yɛn a yong gwông kwɛlɛng hɛ. Ba tɛ́ ɛn sede betom de ba yi yikyik: yɛn a vey na bedap beroso, ba lasha e bamâ bemadung mɛn, na beburâ vyēl de be vɔk ɛ nshî anap beroso de ba ga kyě hama hɛn, ko ba to tolo vɛ.

⁵Ba tɛ̀sɛ bègɛt bekpatak de ba kyě tolo vɛ na shwey, na becɛ̌k berugu de ba ga kyě tolo vɛ arɔng. Ko kpam-tuk mɛn o wa ga hworok wo taksal.

⁶Ano kwong yɛn a wɔ̀ sɛ̀ Yɔshuwa e kwɔ̂n ye ngyɔk e Gilgal, ko yɛn a yang ɛ tanga bemât Israyɛl, “Wot a yi e vwel hak yikyik, ko wot e simo wot wuna hot na sira na yin.”

⁷Ko BeIsrayɛl ba yang ɛn, “Gyɛng rɔ̌ yin a sé sangal bagat na wot e gwí. Yi e rɛ̌ de wot ê yong sira hak na yin ɛ?”

⁸Yɛn a yâng Yɔshuwa, “Wot a sé bemo.” Mwa ano Yɔshuwa a to rangal hɛn a ye, “Yin a sé beva ɛ? Yin a yi e gwa arɛt?”

⁹Yɛn a toyo a yɛ, ba ye, “À da, wot a yi e vwel hak yikyik, yaga wot a wok rehâ nerêy Dagwi Darwey, Dagwi mō. Wot a ga wok rehâ pyɛ̂ mwa de a ra e Misra,

¹⁰tanga mwa pyɛ́ de a ra a begwɔ̀m BeAmɔr beba vane de ba sangal e gurâ Rɔt Yɔrdan gworo, yɛn à Sihɔn, gbɔng gwɔ̀m Hɛshbɔn, tanga Ɔk, gbɔng gwɔ̀m Bashan de à sangal e Ashtarɔt.

¹¹Yaga ano, bemakuk mot tanga bemât vwel mot mwa ba yang ot, wot jut pyɛ̂ re yaga kwɛngɛl e gwong, na wot kyè vey na yin; na wot yang in, wot ê sè bemin, yaga ano, yin wuna hin na sira na wot.

¹²Di in kpam-tuk womo! Wá rɔ̌ pwep, jeng de wot a jut wɛ yi e nelɔ mot yaga re e gwong, ko a remo di in, wa ga hworok, wo taksal.

¹³Beburâ vyēl de be vɔk ɛ nshî anap vemo bá sè bepas o, jeng de wot á sila vɛ, ko di de ba ga hama hɛn. Berugu na bekpatak mot arɔng ba ga kwopos yi na kwɛngɛl yikyik de wot a kyè.”

¹⁴BeIsrayɛl ba sey ha mɛn o, ko ba vɛ e ji pyɛ̂ re mɛn o sana ka rangâl Dagwi Darwey e ngyen.

¹⁵Yɔshuwa kwong a wuna nesa na yɛn, a vo a yɛn nu, na be tik ɛn beken. Ko bemât nuyêl BeIsrayɛl ba sira a yɛn na sirâ mwin arɔng.

¹⁶BeIsrayɛl ba hwo sogo, ba kyè pɔlɔ tat, yɛn a wɔ̀ pom e bapomô BeGibɛyɔn o betat bazâ vɛ à Kefira, na Bɛɛrɔt tanga Kiriyat-Yɛyarim, ko ba de wok kē, BeGibɛyɔn o ba sé bemât vwara mɛn, bagat e hwomo.

¹⁸Ko BeIsrayɛl o ba tɔk hwo ɛn na como wɛt, yaga bemât nuyel mɛn ba ga kana wuna hɛn na sira na yɛn na rezâ Dagwi Darwey, Dagwî BeIsrayɛl. Ko yɛn mwa ba gwɔrɔng e ra bemât nuyel mɛn o.

¹⁹Ko bemât nuyel mɛn o ba toyo a yɛn, ba ye, “Wot a ga sira a yɛn na rezâ Dagwi Darwey, Dagwî BeIsrayɛl. Yaga ano wot a rɔda tɔk tɛ̀ vwɔ mot e ra yɛn wɛt.

²⁰Gbing-gbing, wot tik ɛn beken, yaga sira de wot a ga kana sira hot. Ka ano wɛt, ko sɛ̌ shôm Dagwi ya rɔda hwo e ra wot. Ko pyɛ de wot a rɔda ra a yɛn a yet ngan:

²¹Wot tik ɛn beken, ko yɛn ê tɛ́ ɛn bemât tow cɔ́gɔt, na vê vos a wot nshi.”

²²Yɔshuwa a yishi bemât Gibɛyɔn o vey na yɛ, ko a yang ɛn, “Yaga sɛ́ de yin a kwɛlɛng hot wɔgɔ, yin a yi yikyik, ko e ji hâ mwin, yin a sé sangal bagat e ngamo na wot ɛ?

²³Yaga ano, gawêy Dagwi he hwo e ra yin! Bemat min bê se besam nesheneshey, yin ê tow cɔ́gɔt tanga vôs nshi yaga kwɔ̂n re a Dagwi hom fongol.”

²⁴Yɛn a toyo a Yɔshuwa, ba ye, “Di, à da, wot a kana wok, Dagwi Darwey, Dagwi mō, a ga kana sira yi na mwât fwom mɛ Mose, a rɔda nɔng in vwel hemo mwa, na yin mɔbɔs bemat de ba sé e ji hɛ mwa. Yaga ano, wot a wok bengyip min ding-ding, wot a tele hot yaga neken mot. Pyɛ ma yane de ya tɛ̀, wot a ra ano.

²⁵Ko a remo, wot a sé e vɔ mō; ra a wot pyɛ de hwà di ya jam, ko ya sé tyɛng na wot zɔng.”

²⁶Ano kwong, Yɔshuwa a sey ɛn yi e vwɔ̂ BeIsrayɛl, ko a tik, be mɔbɔs hɛn wɛt.

²⁷Ko mwa ano, a tɛ̀ ɛn, ba tɛ́ ɛn besam de ba tow cɔ́gɔt, na be vos nshi yaga bemât Israyɛl tanga gàgbang rangâs yas vɔk na Dagwi. Ba ra ano kayɛ jeng e kwɔn de Dagwi Darwey a kasa vey e remo.