Read berom 2 Tesalonika 1 Bible Online

2 Tesalonika 1 - berom bible

2 Tesalonika 1

¹Bwok-rwang yi e vɔ Bulus, na Silvanus, tanga Timotawus, Vɔk na bemât ekilisiya e Tesalonika, vemo de ba sé vê Dagwi Da mot tanga Darwey Yɛsu Kristi:

²Tik na Dagwi Da tanga Darwey Yɛsu Kristi be dura a yin nerat mɛn, na be tɛ̀ yey min ye dyɛng.

³À begwa, a sé gbing-gbing na wot a feng a Dagwi kayɛ jeng yaga yin. A sé tyɛng na wot a ra ano, yaga yin e re nuyel sizɔng na sêy tsak o na Kristi, ko kawɛ e ji min e gwɛ̌ tɛ̂ yey mɛ vɔk na bemin.

⁴Pyɛ ma yemo de ya tɛ̀, wot e ra kaa na yin e ji be-ekilisiyâ Dagwi. Wot e ra kaa, yaga yin e niri, ko yin e re nuyel na sêy tsak o e ji rezot detidetu tanga e ji reyɔ̂m mwa de be tak a yin.

⁵Mwa pyɛ́ yemo ye dura a wot wɔgɔ, shɔt Dagwi ya sé tyɛng. Ko yi ano, ba rɔda di, yin a vey na Dagwi a re negwɔm e ra yin. A sé yaga negwɔm o de yin a sé sɔ reyɔm a remo.

⁶Dagwi e gas badu e tē: E ba tala vemo de be tɛ̀, yin a sɔ reyɔm na reyɔm;

⁷ko a rɔda ba nɔng in pɔngɔ, yin vemo de yin e sɔ reyɔm, ko a rɔda ba nɔng ot hɛ arɔng. A rɔda ba ra ano e jeng de Darwey Yɛsu e ba nusu yi e lagwi tanga betom-lagwi mɛ de ba vɔk gbɔng reto, ko ba rɔda ba di ɛ.

⁸A rɔda ba vey na balêm kya, ko ê ba tabak vemo de ba kyɛ́ ɛn Dagwi tanga vemo de ba kyɛ́ ɛn nà gyeng hâ Yɛgɛt Yat e ra Darwey mot Yɛsu.

⁹Tabak mɛn a het ngan: Ba rɔda ba wey na yɛn nesheneshey wɔgɔ, ba rɔda ba ro ɛn yi e bayîs Darwey, ko yɛn ê ba sang di gbɔng nerat mɛ tanga reto mɛ wɛt.

¹⁰A rɔda ba sè ano e jeng de a rɔda ba vey. E jeng o, ê ba sey gbɔng nerey na bemat mɛ mwa, ko mwa vemo de ba sey tsak o na yɛ bê ba somo hɛ. Yin arɔng, yin a rɔda ba sè e ji mɛn, yaga yin a ga kana sey tsak o na reha de wot á ha a yin.

¹¹Pyɛ ma yemo de ya tɛ̀, wot e ra won yaga yin jojot. Ko wot e ra won na Dagwi mot na a tɛ̀ in, yin a jam ɛ̀ na yerê sangal de a ga yila hin na yin a ra. Wot e to ra won na a tɛ̀ in, na yin a ra kayɛ pyɛ ryat de yin e simo yi na reto mɛ. Tik na a to sila gyat tom de yin e ragas, yaga yin a sey tsak o na yɛ.

¹²Yi ano, yin ê tɛ̀, be nɔ̂ng rezâ Darwey mot Yɛsu gbɔng nerey e tē min, ko yɛ ê tɛ̀, be nɔng in nerey arɔng, yaga yin a sé bemɛ. Pyɛ́ yemo ye sila tyɛng ano yi na nerât Dagwi mot tanga ne Darwey Yɛsu Kristi.