Read berom 2 Tesalonika 2 Bible Online

2 Tesalonika 2 - berom bible

2 Tesalonika 2

¹À begwa, yin a sé gyeng na Darwey mot Yɛsu Kristi a vɛ̄ hɛ, na be tula hot mwa, na wot a man na yɛ. Bemat behak be tē, jeng de Darwey a rɔda vɛ̄ hɛ ha ga vey. Ko wot e ra won na yin, báre min he kwon sè kpɛɛ, kɛ a sè a yin bengyip ziri yi na hâ bemat vemo mo wɛt. Gyeng rɔ̌ be bare, wot á ha ano e jeng de wot á sè ha sede bezarap Dagwi kɛ e jeng de wot á sè basa a bemat ayi, kɛ wot á jɛk ano e ji bwok-rwang.

³Yin tik na mwat hwak a kwɛlɛng hin e kagwɛ gwong wɛt. Yaga jeng o yê vey wɛt, sɛ̌ bemat pyak ba ra retek na Dagwi e ngyen. Jeng o yê to vey wɛt, sɛ̌ wo repugû Dagwi a nusu e ngyen, yɛ womo de ba ga yong kwɔn de ba rɔda wey na yɛ e hɛ.

⁴A rɔda ra retek na kawɛ yerê dagwi kɛ kayɛ pyɛ de be re a yɛ fongol. A rɔda tɛ̀ tó mɛ, a dal bwang pyɛ́ yemo mo mwa na nerey. A rɔda ra ano zɔng wɛt, ko a rɔda wɔ̀ yel e Gbɔng Duk Re Fongôl Dagwi, na a tɛ̀ gwofwa negwɔm mɛ e hwomo, na a to tâng tó mɛ, yɛ a sé Dagwi.

⁵Yin e bare, ma ha a yin pyɛ́ yemo e jeng de ma rɔngɔl e hane tanga yin wɛt a?

⁶Ko pyɛ cak ya sɛ́ de ya dul pyɛ́ yemo nà té a remo, ko yin a tɔk pyɛ mo arɔng. Mwât repugû Dagwi a rɔda nusu e jeng yemo zɔng de bà kana yong a yɛ yimo gyam.

⁷Yɛ womo de e ra fwom mɛ na reto e lɛrɛ, womo de e ra retek na Dagwi, a sé e de fwom mɛ a remo. Ko pyɛ́ de ya rɔda ba té ya rɔda té wɛt, sɛ̌ ba pat womo de a dul yɛ̄ yi e gwong o e ngyen.

⁸E bama mo, wo repugû Dagwi o a rɔda nusu wɛshɛrɛk. Ko jeng de Darwey Yɛsu a rɔda vey, a rɔda mɔrɔ hɛ na nesong nu mɛ, ko a rɔda wey na yɛ yi na nedyɛt vey mɛ.

⁹Ko mwât repugû Dagwi o a rɔda vey na retô Shetan, na a kwɛlɛng bemat na nezap pyɛ̂ bes tanga pyɛ̂ langat.

¹⁰Ko a rɔda kwɛlɛng na kanɛ yerê neves vemo de ba rɔda wey. Yɛn a rɔda wey, yaga yɛn á kyɛ́ ɛn nà sey reha de ra sé tsak o na yɛn a tɛ̀ yey mɛn na rɛ, rēmo de Dagwi a yâng sey ɛn mɛ̀.

¹¹Yaga ano, Dagwi ê tɛ̀, be kwɛlɛng hɛn sizɔng, yaga na yɛn a sey tsak o na pyɛ́ de ya sé bɔs.

¹²Pyɛ ma yemo de yê tɛ̀, Dagwi a rɔda gang mwa vemo de bá kyɛ́ ɛn nà sey reha de ra sé tsak o na shɔt, yɛn vemo de bá wok cwey ragâs neves.

¹³À begwa, a sé gbing-gbing na wot a feng a Dagwi kayɛ jeng yaga yin. Darwey a tɛ̀ yey na yin. Yaga yimo susu mo, Dagwi à kasa hin, na a bin sey in. À sey in yi na Gabik de he tɛ̀ in jaram na yin a sè vê Dagwi, ko yaga yin à sey reha mɛ de ra sé tsak o.

¹⁴À yila hin, na yin a sey pyɛ́ yemo yi na Yɛgɛt Yat de wot á kana basa a yin. À yila hin, yaga na yin a wuna hin e de sɛ̂ gbɔng nerey ne Darwey mot Yɛsu Kristi.

¹⁵Yaga ano, à begwa, tumal hin gak, ko ré in nuyel na raà bása detidetu de wot a basa a yin, yi na hâ nu mot kɛ yi na bwok-rwang ayi.

¹⁶Wot a sé ra won na Darwey mot Yɛsu Kristi pyɛ mɛ tanga Dagwi Da mot. E yɛ Dagwi o de a tɛ̀ yey na wot, ko yi na nerat mɛ a gwɛ̌ a wot gap gbak-gbak, na wot a sɛt yey mot e ra pyɛ́ de ya sé ryat.

¹⁷Tik na a gwɛ̌ a yin gap, na a tɛ̀, yin a kyɛm yin a ra pyɛ́ de ya sé ryat kayɛ jeng, na yin a to ha yɛ̄ arɔng.