Read berom 2 Tesalonika 3 Bible Online

2 Tesalonika 3 - berom bible

2 Tesalonika 3

¹E yɛnɛ mo, à begwa, rá in won yaga wot, yaga na reha e ra Darwey rè re nuyel na shara hɛ dey-dey, yaga na bemat be nɔ̂ng rɛ nerey arɔng, tyɛng sede remo de á kana sè na yin.

²Rá in won arɔng, yaga na Dagwi a dul ot yi e vɔ bemât nengyas tanga bemat beves. Yaga e kawɛ mwat de a sey tsak o na há de wot a basa hɛ wɛt.

³Ko Darwey a sé womo de e ragas pyɛ́ de a ha. Yɛ a rɔda tɛ̀ in na yin a tumal gak, ko a rɔda gyep in, yaga na Shetan, wo neves, a kwon ra in wɛt.

⁴Darwey e tɛ̀, wot a tó yey na yin wɛt, ko wot a tɔk, yin a sé ra pyɛ́ de wot a ha a yin, ko yin a rɔda re nuyel na râ yɛ̄ arɔng.

⁵Tik na Darwey a tɛ̀ in na yin a gwɛ̌ tɔk, Dagwi a tɛ̀ yey na yin. Tik na a to tɛ̀, yin a niri e gwong de Kristi á kana niri arɔng.

⁶À begwa, wot e nɔng in nu e ji rezâ Darwey mot Yɛsu Kristi, pyɛ min cak ye kwon sè na kawɛ gwa mot de a sé riri, womo de a kyɛ́ ɛ nà sangal tyɛng na pyɛ́ de wot á kana basa a yin.

⁷Yin pyɛ min yin a tɔk gwong de gwa jam na yin a masa negwɔn mot. Jeng de wot á sè na yin, wot á sè beriri wɛt.

⁸Wot á re pyɛ̂ mwat hwak e nɔrɔ wɛt, ko wot á pɛngɛ hot e de râ fwom na gap mot mwa. Wot á ragas gwɛ nagwi na naturuk, yaga na wot a bin sè pyɛ negbang na hwak e ji min wɛt.

⁹Wot a vɔk reto na wot a tɛ̀, yin a nɔng ot pyɛ́ de wot e simo. Ko wot á ra ano wɛt, yaga wot á simo na wot a dura a yin negwɔn de yin a rɔda masa arɔng.

¹⁰Jeng de wot á sè tanga yin, wot á nɔng in nu wɔgɔ, “Ka sede mwat hwak a simo a ra fwom wɛt, ko be nɔng ɛ pyɛ̂ re wɛt.”

¹¹Wot a ye ano, yaga wot á wok, behak be sangsal e ji min sede beriri zɔng. Yɛn e ra fwom hwak wɛt, ko be kyě yeles e ji pyɛ̂ bemat zɔng.

¹²Ko di, e ji rezâ Darwey Yɛsu Kristi wot a sé nɔ̂ng bemat vane mo nu, ko wot a to sé shonong e ra yɛn, yɛn a hwo ra negwɔn nerat, ko yɛn a ra fwom na be bin sɛ̀ mɛ̀ pyɛ̂ re mɛn.

¹³Ko yin, à begwa, yin ruru na râ pyɛ́ ryat wɛt.

¹⁴Ka sede mwat hwak a kyɛ́ ɛ nà ra pyɛ́ de wot a jɛk e bwok-rwang gwomo, ko bɛrɛng hin mwat wane mo naka. Pyɛ cak ye wuna hin na yɛ wɛt, yaga na a bin vo rekyen.

¹⁵Ko yin bɛrɛng hɛ sede mwât repugu wɛt; tusa hin hɛ sede gwa min.

¹⁶Tik na Darwey pyɛ mɛ, de e tɛ̀sɛ neyey bemat ne dyɛng, a tɛ̀ yey min ye dyɛng kayɛ jeng tanga e kagwɛ gwong. Tik na Darwey a sè tanga yin mwa.

¹⁷Me Bulus, ma sé jɛk hemo ngan na vwɔ hom wɔgɔ, “Me tang in show.” E gwong a gwomo de me tɛ̀ vwɔ hom e kagwɛ bwok-rwang; e gwông jɛk hom a gwomo.

¹⁸Tik na Darwey mot Yɛsu Kristi a dura a yin mwa nerat mɛ.