Read berom 1 Timotawus 1 Bible Online

1 Timotawus 1 - berom bible

1 Timotawus 1

¹Bwok-rwang gwomo yi e vwɔ hom Bulus, tom Kristi Yɛsu yi na nɔ̂ng nû Dagwi, Mwât Sey ot, tanga Kristi Yɛsu de wot e sɛt yey mot e ra yɛ,

²Vɔk na hwo, à Timotawus, de hwà sé hwey hom mwin, yaga ma kana dura a hwo gwông raa: Tik na Dagwi Da tanga Kristi Yɛsu, Darwey mot, be dura a hwo nerat mɛn, be tosho reyɔm mō, na be tɛ̀ yey mō ye dyɛng.

³Jeng de ma sè kyè vɔk e Makedonya, ma shonong e ra hwo na hwo sangal e Ɛfɛsus; ko a remo, me simo hwo re nuyel na sangal e hwomo. Bemat behak ba sé basa batîn basa vê bɔs, ko a sé gbing-gbing na hwo wɔ̀ nɔng ɛn nu, na be tik bása hane mo.

⁴Hā a yɛn, yɛn a kwon tɛ̀ nehywɛ mɛn e ra râ yá ryoso, kɛ be tɛ̀ báre mɛn e ra nepyak yére mɛn yê raane wɛt. Pyɛ́ yemo ye vɛ̀sɛ na cuna kpɛɛ. Ye tɔk sɛlɛ wɛt, na ye dura a bemat gwong de Dagwi a yong yaga yɛn; gwong a gwomo de yɛn a tɔk yi na sêy tsak o zɔng.

⁵Nɔng ɛn nu ano, yaga na bemat be tɛ̀ yey na bemɛn. Yerê tɛ̂ yey o he yís yi na vemo de ba vɔk neyey jɛrɛ, vemo de neyey mɛn na gang ɛn na shɔt wɛt, yɛn de ba sey tsak o e gwong de gwa sé mwin.

⁶Bemat behak ba ga ye rɛng yi e pyɛ́ yemo mo, yɛn a ga hàla gwong mɛn, ko yɛn e ragas badu e ra neha de na vɔk retin wɛt.

⁷Yɛn e simo be tɛ́ ɛn bemât basa e ra badu Dagwi. Ko yɛn a tɔk neha de yɛn e ha wɛt kɛ pyɛ́ de yɛn e ha e ra yɛ̄ wɛt, mwa ano de yɛn e ha yɛ̄ sede yɛn a tɔk yɛ̄ tyɔng wɛt.

⁸Wot a tɔk, Badu ba sé barat, ka sede bemat be ra fwom na vɛ e gwong de gwa sé tyɛng.

⁹Wot a to tɔk, a sé yaga bemat de ba sé cik de Dagwi a tɛ̀ badu wɛt. Ko a tɛ̀ vɛ yaga vemo de be gyilsit vɛ tanga vemo de be kyɛ́ ɛn nà raa pyɛ́ de be ha a yɛn, yaga vemo de be raa Dagwi wɛt, ko yaga bemât banɛn. A tɛ̀ vɛ yaga bemat de ba sé jɛrɛ wɛt tanga vemo de be sap Dagwi wɛt, yaga vemo de be mɔbɔs beda na beneng mɛn tanga vemo de be mɔbɔs bemat arɔng.

¹⁰A tɛ̀ badu mo yaga bemat de be ra nejwang tanga vemo de be dyɛng na beras, yaga vemo de be shigi bemat, yaga vê bɔs tanga vemo de be nɔng nuha bɔs, mwa na bwang vemo de be ra kayɛ pyɛ de ya sé detu na batîn basa vê mwin.

¹¹Ko batîn basa vemo mo ba sé tyɛng na Yɛgɛt Yat de ba tik e vɔ hom na me shara yɛ̄. Yɛgɛt Yat o ya vɔk gbɔng nerey, ko ya sé yi na Dagwi de be somo hɛ.

¹²Ma feng a Kristi Yɛsu, Darwey mot, de a nɔng me gâp râ fwom gwomo. Ma feng, yaga a jut me, ma sé mwat de a tó yey na me wɛt, ko a tɛ̀ me na me ra a yɛ fwom.

¹³A raane, ma kana ha há ves e ra yɛ, ma tak a yɛ reyɔm, ko ma to bɛrɛng hɛ ves. Ko mwa ano, a tosho reyɔm hom, yaga e jeng yane mo ma kana sey tsak o na yɛ wɛt, ko ma ra pyɛ́ mo e ji dunus zɔng.

¹⁴Ko Darwey mot a dura a me nerat mɛ shɛrɛk; a to tɛ̀ me, me sey tsak o, na me tɛ̀ yey na yɛ — pyɛ́ ma yemo de wot e sɛ̀ jeng de wot e sè e sangal e ji nesa na Kristi Yɛsu.

¹⁵Há hemo ha sé tsak o, ko ha jam na be sey hɛ na yêy mwa. Há mo ha sé ngan: Kristi Yɛsu a vey e jey na a bin sey bemât banɛn. Me ma dal bwang bemat o mwa na banɛn,

¹⁶ko pyɛ ma yemo de ya tɛ̀, Dagwi a tosho reyɔm hom. A ra ano, yaga na Kristi Yɛsu a bin dura mɛ̀ niri mɛ de ha vɔk yɛnɛ wɛt e ji pyɛ de a ra na me, me de ma dal bwang bemât mwa na banɛn. Yi ano, a tɛ̀ me, me sè pyɛ dura yaga mwa vemo de ba rɔda ba sey tsak o na yɛ, na be ba sey neken gbak-gbak.

¹⁷Tik na be nɔ̂ng Dagwi nerey tanga gbɔng nerat vit a yɛnɛ mo! E yɛ de a sé gbɔng gwɔ̀m gbak-gbak, e ku wɛt, ko be tɔk di ɛ arɔng wɛt, yɛ wɛ à Dagwi nju mɛ zɔng! Ano.

¹⁸À hwey hom Timotawus, ma sé tik a hwo e vɔ mō redu remo de ra sé tyɛng na há de bezarap Dagwi bà kana ha e ra hwo yimo raane. Neha mo na rɔda nɔng o yey ting, yaga na hwo tó como ryat.

¹⁹Rē nuyel na sêy tsak o, ko yey mō ye gang o na shɔt arɔng wɛt. Bemat behak bá kyɛ́ ɛn nà wet betong na pyɛ́ de yey mɛn ya ha a yɛn, ko yaga ano, yɛn a tik nà to sey tsak o na pyɛ́ de ya sé mwin.

²⁰Behak e ji mɛn, à Himɛnayus na Aleksanda, yɛn de ma ga nára hɛn e vwɔ̂ Shetan, yaga na yɛn a bin masa yi na tabak wɔgɔ, yɛn a tik nà ha há ves e ra Dagwi.