Read berom 1 Timotawus 2 Bible Online

1 Timotawus 2 - berom bible

1 Timotawus 2

¹E susu mo, ma sé shonong e ra yin, na yin a ha a Dagwi pyɛ̂ mwa de yin e simo e ji newon min, na yin a lolo hɛ na yin a feng a yɛ arɔng. Rá in ano yaga bemât mwa,

²yaga begbɔng begwɔ̀m tanga bwang vemo de ba vɔk gbɔng tom, yaga na wot a bin sangal yaang, na wot a to sangal tyang e jeng de begwong mot ba jam a Dagwi, ko wot a vɔk negwɔn nerat e kagwɛ gwong arɔng.

³Yēmo ya sé ryat, ko ye yong a Dagwi, Mwât Sey ot, yey.

⁴E yɛ̀ de e simo na bemât mwa be sey neken, na yɛn a bin tɔk pyɛ́ de ya sé tsak o.

⁵Yaga Dagwi a sé gwining, ko e mwat gwining zɔng de a sé e tê Dagwi na bemat, yɛ à Kristi Yɛsu de a sé mwat,

⁶de a nɔng tó mɛ na a bin vibis mɛ̀ bemât mwa. E jeng de ya jam, pyɛ́ yemo ya dura dɛdɛɛt, Dagwi e simo na a sey bemât mwa.

⁷Yaga ano, Dagwi a tɛ̀ me, me sè mwât sharâ há mɛ, na me to sè tom mɛ arɔng. A ra ano, yaga na me basa a vemo de ba sé BeYuda wɛt rehâ sêy tsak o na Dagwi de ra sé mwin. Ma sé ha tsak o, ko ma sé ra bɔs wɛt!

⁸Me simo na beras de be raa Dagwi na neyey mɛn mwa be nása vɔ mɛn e rak o, na be ra won e kahɛ kwɔn de ba man ɛ̀ yaga rê fongol. Bē ra ano sana vɔk shom kɛ cuna.

⁹E rà beha arɔng, me simo, yɛn a ra pyɛ́ de ya jam, bē bɛrɛng hywɛ yerê yɔ̀m de be tɛ̀sɛ, na be tɔrɔ hɛn e gwong de gwo dura gyêng bato mɛn. Yɛn a tak bato mɛn nediri mo wɛt, kɛ be tɛ̀ lɛlɛ dyam shinang, kɛ beta berat sedesi, kɛ berugu de ba vɔk dyām yɔ̀kyɔk.

¹⁰Ko tik na be tɔrɔ hɛn na yerê pyɛ́ de ya jam a beha de be tē, yɛn a sé beha-raa, yɛ̄ a tomong rat.

¹¹Tik na beha be masa pyɛ́ e ji neyuu, na be to dyɛng bato mɛn naka.

¹²Me simo a beha na be basa e kwɔ̂n rê fongol wɛt, kɛ na be vɔk reto e ra beras wɛt; ko tik na be sǎ yuu.

¹³Yaga bà tānga yong Adam, ko e bama mo, Hawa.

¹⁴Ko à sè e Adam de bà kwɛlɛng wɛt, à sè e hwā mo de bà kwɛlɛng, ko à tɛ́ ɛ mwât gyili redu Dagwi.

¹⁵Mwa ano, ba rɔda sey beha e tɔ̂s nèy, ka sede yɛn e re nuyel na sêy tsak o na Dagwi, na yɛn a tɛ̀ yey na bemat, ko ka sede sángal mɛn ha sé jɛrɛ, na yɛn a gyeng bato mɛn arɔng.