Read berom 1 Timotawus 3 Bible Online

1 Timotawus 3 - berom bible

1 Timotawus 3

¹Há hemo ha sé tsak o: Ka sede mwat a tɛ̀ yey na a tɛ́ ɛ mwât nuyêl ekilisiya, ko a ga simo fwom rwat.

²A sé gbing-gbing na mwât nuyêl ekilisiya a sè mwat de bê sɛ̀ pyɛ vyes cak e ra yɛ wɛt, na a vɔk hwā gwining zɔng, na a yɛklɛ hɛ naka, na a gyeng tó mɛ, na a ra pyɛ́ e ji begwong de ba sé tyɛng, na a bɛrɛng bekɛnɛt naka, na a tɔk basa a bemat arɔng.

³A kwon kat sɔ̂ siring kɛ a simo yol wɛt; tik na a sè hywɛ, ko a kwon simo sogô nehywɛ kɛ a tɛ̀ yey na dyām arɔng wɛt.

⁴Tik na a tɔk vɔk lɔ mɛ naka, na a tɛ̀ nèy mɛ ne gyeng há mɛ, na ne nɔng ɛ nerey arɔng.

⁵Yaga, ka sede mwat a tɔk vɔk lɔ mɛ naka wɛt, yi e rɛ̌ de a rɔda tɔk gyeng bemât ekilisiyâ Dagwi arɛt?

⁶Mwat o a sè mwat de a mɛsɛ̂ng sey tsak o wɛt, yaga na a kwon hwo pus na kaa wɛt; hemo ha rɔda tɛ̀ Dagwi a gang ɛ na shɔt tyɛng sede gwɔ̀m cēng.

⁷Ko a sé gbing-gbing na vemo de ba sé bemat-raa wɛt be ha há rat e ra yɛ arɔng. Ka sede ano wɛt, ko yɛ a rɔda sè pyɛ sedusa e nuyêl bemat, ko hemo ha rɔda tɛ̀, a gaba e ji segun gwɔ̀m cēng.

⁸Ano kwong, tik na bemât sɛlɛ̂ ekilisiya be ra pyɛ́ na jɔgɔ wɛt, kɛ be vɔk nenu-neba, kɛ be kat sɔ̂ siring, kɛ be kat simô dyām wɛt.

⁹Tik na yɛn a gyeng tsak há de Dagwi a dura a wot wɛshɛrɛk e ra gwông raa. Bē ra ano na yey de ye gang ɛn na shɔt wɛt.

¹⁰Ko gyam na be hwo fwom, tik na be masa hɛn e ngyen. Ka sede ba sɛ̀ pyɛ cak vyes e ra yɛn wɛt, ko bē tik ɛn, na yɛn a ra fwôm sɛlɛ mo.

¹¹Tik na beha mɛn arɔng be ra pyɛ́ na jɔgɔ wɛt, kɛ be hát bemɛn wɛt; bē yɛklɛ hɛn naka, ko bē sè bemat de be tó yey na yɛn e ji pyɛ cak wɛt.

¹²Tik na bemât sɛlɛ̂ ekilisiya be vɔk beha vivining zɔng, ko bē vɔk nèy mɛn na belɔ mɛn naka arɔng.

¹³Vemo de be ra fwôm sɛlɛ mɛn naka be sɛ̀ a bato mɛn nerey e nuyêl bemat, ko yɛn e tɔk ha na yey ting e ra sêy tsak o mɛn na Kristi Yɛsu.

¹⁴Mwa ano de me sɛt yey hom, ma rɔda vey bagat vey na hwo, ko ma sé jɛk a hwo pyɛ́ yemo.

¹⁵Ko ka sede ma rɛn me, ko bwok-rwang gwomo gwô tɛ̀ o na hwo tɔk negwɔn de na jam na bemat de ba sé vê Dagwi be ra. Bemat o ba sé ekilisiyâ Dagwi wo neken. Ekilisiya mo wa sé sede swesêk duk gwô tsak o, ko wa to sé sede retîs duk rê tsak o arɔng.

¹⁶Pyɛ́ de yá kana sè e lɛrɛ e ra gwông raa mwót ya sé ryey o sizɔng, vit a tô yey! Ya sé ngan: Kristi Yɛsu a vey e jey e ji rebêk mwasi, Gabik Dagwi ha dura, a sé tyɛng ano, ko betom-lagwi ba di ɛ arɔng. Bemat ba shara reha mɛ e ji yére bemât jey, ba sey tsak o na yɛ e ji jey, ko Dagwi a jut ɛ vɔk e kwɔ̂n gbɔng nerat.