Read berom 1 Timotawus 4 Bible Online

1 Timotawus 4 - berom bible

1 Timotawus 4

¹Gabik Dagwi ha ha wɛshɛrɛk wɔgɔ, e jeng de ye kyè vey, bemat behak ba rɔda ba hàla gwông raa. Yɛn a rɔda raa begabîk bɔs, ko yɛn ê tɛ̀ nehywɛ mɛn e ra basa hê begabik beves.

²A sé e bemât bɔs de ba vɔk nenu-neba de be kyě shara yerê basa hane mo. A sé sede Shetan a tɛ̀ jɔt mɛ na kya e ra neyey mɛn.

³Bemat vane mo be basa wɔgɔ, bemat be kwon ra weneng kɛ be re yerê pyɛ̂ re cak wɛt. Ko Dagwi a yong pyɛ́ mo yaga na bemat-raa de ba tɔk tsak o be re yɛ̄ e bama de ba ga feng a yɛ̀.

⁴Yaga kayɛ pyɛ de Dagwi a yong ya sé ryat. Be kyɛ́ ɛn pyɛ cak wɛt, ko bē sey yɛ, na be feng a yɛ e ji won,

⁵yaga hâ Dagwi tanga won o be tɛ̀ pyɛ́ mo ye sè jɛrɛ.

⁶Ka sede hwó basa a begwa pyɛ́ yemo, ko hwà rɔda sè mwât fwom rwat wo Kristi Yɛsu. Neha e ra sêy tsak o tanga batîn basa barat de hwà ga kyě raa vɛ ba rɔda sɛlɛ hwo na hwo ras naka e ji gabik mō.

⁷Pyɛ mō cak ye kwon sè na yerê neha jey de na sé kpɛɛ sede yá. Ko hwo masa a rato mō, yaga na sangal mō he jam a Dagwi.

⁸Râ jɔgɔ na babek min ha vɔk pyɔlɔ tyɔng; ko ka sede sángal mot ha jam a Dagwi, hane ha vɔk pyɔlɔ e kagwɛ gwong. Yaga Dagwi a sira na a nɔ̂ng vemo de be sangal ano neken ne jeng yemo tanga ne jeng de ye kyè vey arɔng.

⁹Há hemo ha sé tsak o, ko ha jam na be sey hɛ na yêy mwa.

¹⁰Yaga ano, wot e tē ngyɛ́k sizɔng, ko wot e ra fwom na gap, yaga wot a sɛt yey mot e ra Dagwi wo neken. Yɛ a sé Mwât Sêy bemât mwa, a kat mɛ̀ vemo de ba sey tsak o na yɛ.

¹¹Nɔ̂ng bemat nu, na hwo basa a yɛn pyɛ́ yemo.

¹²Hwo tik na mwat hwak a byɛs o wɛt, yaga hwà sé wen. Ko tik na hwo sè womo de bemat-raa bê masa hɛ yi na pyɛ́ de hwó ha tanga pyɛ́ de hwó ra, yi na gwong de hwó tɛ̀ yey na bemat tanga yi na gwong de hwà sey tsak o na Kristi, ko yi na sangal mō de ha sé jɛrɛ arɔng.

¹³Gyam na me vey, tɛ̀ nehywɛ mō e ra basa a bemat Bwok-basa Dagwi e kahɛ kwɔn de be tula hɛn ɛ̀, na hwo misang a yɛn há mo, na hwo basa a yɛn arɔng.

¹⁴Bàre na nɔrɔ de Gabik Jɛrɛ há nɔng o jeng de bezarap Dagwi bá kana ha, ko bemakûk ekilisiya bá kana tɛ̀ vɔ e ra hwo. Rá fwom na nɔrɔ mo.

¹⁵Rimi hwo e de ragâs pyɛ́ yemo, na hwo nɔng tó mo mwa e de râ yɛ̄, yaga na mwa bemat be di rê nuyel mō e ji pyɛ́ mo.

¹⁶Tē naka na tó mo tanga bása mō mwa arɔng. Niri e ji pyɛ́ yemo, yaga, ka sede hwó ra ano, ko hwà rɔda sey neken mō pyɛ mo tanga ne vemo de be wokos há mō.