Read berom 1 Timotawus 5 Bible Online

1 Timotawus 5 - berom bible

1 Timotawus 5

¹Hwo gyong mwakuk wɛt, ko dura a yɛ pyɛ́ na nehywɛ sede a sé da mō. Tē na bewen sede begwa mō,

²ko na beha bekunat sede beneng mō, ko na beha bepas sede begwa mō e negwɔn de na jam.

³Nɔ̂ng bekuma nerey, na hwo sɛlɛ hɛn, yɛn vemo de ba tik ɛn nju mɛn.

⁴Ko ka sede kuma mo a vɔk nèy kɛ nèy nèy mɛ ayi, tik na nèy o ne tānga masa wɔgɔ, a sé pyɛ de ya jam na bemat-raa be sɛlɛ belɔ mɛn. Yi na ra ano, yɛn a sé talsâ beda na beneng mɛn tanga beda mɛn bekunat pyɛ́ de yɛn á kana ra a yɛn yimo yɛn nèy. Pyɛ́ yemo de ye yong a Dagwi yey.

⁵Kuma de a sé nju mɛ, womo de vit a mwat de e bɛrɛng hɛ, a ga sɛt yey mɛ e ra Dagwi. E re nuyel na râ won nagwi na naturuk, na a rangsal hɛ na a sɛlɛ hɛ.

⁶Ko kuma de e raa netâ jey a sé sede a ga ku, mwa ano de a rɔngɔl na neken.

⁷Nɔng ɛn nu e ra pyɛ́ yemo, yaga na bemat be kwon sɛ̀ pyɛ vyes cak e ra yɛn wɛt.

⁸Ko ka sede mwat hwak a kyɛ́ ɛ nà bɛrɛng cang mɛ, a kat mɛ̀ belɔ mɛ, yɛ a ga tono pyɛ́ de wot a sey tsak o na yɛ̄, ko a dal womo de a sé mwat-raa wɛt na neves.

⁹Hwo jɛk rezâ kuma hwak e ji bazâ bekuma wɛt sɛ̌ neshey mɛ na dal kuru batyiimin (60) e ngyen. Tik na a sè hwā de á kana ra jɛ̀m wɛt,

¹⁰ko tik na bemat be ha há e ra tomong rat mɛ wɔgɔ, a ras nèy mɛ naka, e sey bekɛnɛt e lɔ mɛ, ko e to kus bol bemat-raa arɔng; e sɛlɛ vemo de ba sé e ji reyɔm, ko e nɔng tó mɛ mwa yaga râ kagwɛ fwom rwat.

¹¹Hwo jɛk bazâ bekuma de ba rɔngɔl bepas wɛt. Yaga jeng de simô rebek mɛn rê tɛ̀ ɛn be tik pyɛ́ de yɛn a ga kana ye, yɛn a rɔda ra yaga Kristi, ko yɛn a rɔda simo be ra weneng.

¹²Yi na ra ano, ba rɔda ha e ra yɛn wɔgɔ, yɛn a ga tùt pyɛ ye yel de yɛn á kana sira e ra yɛ na Kristi.

¹³Ko a sé hane zɔng wɛt; yɛn a tɔ́k ɛn na neriri, ko be kyě gwɔsɔ nelɔ zɔng. Ko a sé neriri zɔng wɛt; be ra ryɔgɔt arɔng, be yeles e ji pyɛ́ de ya sé myɛn wɛt, ko be ha e ra pyɛ́ de ya sé naka na yɛn a ha e ra yɛ̄ wɛt.

¹⁴Yaga ano, me simo bekuma de ba rɔngɔl bepas be ra weneng, na be tɔs nèy, na be to bɛrɛng nelɔ mɛn naka. Yi ano, yɛn ê nɔ̂ng bemât repugu mot kwɔn na be ha há ves e ra wot wɛt.

¹⁵Bekuma mo behak ba ga kana hàla gwong na be raa Shetan.

¹⁶Tik na kawɛ hwa-raa de a vɔk bekuma e lɔ mɛ a bɛrɛng hɛn; a tik a ekilisiya nedirik o wɛt, yaga na ekilisiya wo bɛrɛng vemo de ba hàla hɛn nju mɛn.

¹⁷Tik na be nɔ̂ng bemakuk, de be bɛrɛng fwôm ekilisiya naka pyɔlɔ mɛn badak o baba, a kat mɛ̀ vemo de ba nɔng gap e ra sharâ reha tanga bása arɔng.

¹⁸Yaga bà jɛk e Bwok-basa Dagwi wɔgɔ, “Jeng de hywàrak wa sé ra a hwo fwom, hwo bang nû wɛ wɛt.” Bà to jɛk wɔgɔ, “Tāla mwât fwom pyɛ de ya sé tyɛng na fwom de a ra.”

¹⁹Hwo wet betong na sekun de ba vey mɛ̀ e ra mwakuk hwak wɛt, sɛ̌ ba vɔk ɛ̀ bemât nuha beba kɛ betat ayi.

²⁰Ko vemo de be ra banɛn, gyong ɛn e ji bemât mwa, yaga na a sè a bwang o pyɛ tabak.

²¹E nuyêl Dagwi, na Kristi Yɛsu, tanga betom-lagwi de a kasa, ma sé nɔng o nu na gap: Gyeng badu vemo. Hwo ra a mwat pyɛ cak yaga hwà tɔk ɛ zɔng, kɛ yaga hwà kasa hɛ wɛt.

²²Gyam na hwo tɛ̀ vɔ mō e ra mwat hwak, na a ra fwôm Dagwi, ko hwo bɛrɛng yɛɛlɛl e ngyen. Pyɛ mō cak ye sè e ji banɛn de behak be ra wɛt. Tik tó mo jɛrɛ.

²³A jam na hwo sɔ nshi zɔng wɛt, ko tik na hwo sɔ nshî anap tyɔng, na ne sɛlɛ jim mō, sede remo de nerɔ ne dopse royo hwo.

²⁴Be di banɛ̂n bemat behak kyɛrɛng gyam na be ra a yɛn shɔt; ko be de di banɛ̂n bemat o behak e bama mo zɔng.

²⁵Ano kwong, be di tomong rat ve bemat behak kyɛrɛng; ko vemo de ba ka di vɛ wɛt, be tɔk re nuyel na lɛrɛ̂ vɛ wɛt.