Read berom 1 Timotawus 6 Bible Online

1 Timotawus 6 - berom bible

1 Timotawus 6

¹Tik na vemo mwa de ba sé besam be bare, a sé naka na be nɔ̂ng bedanelɔ mɛn nerey e ji kayɛ pyɛ. Yi ano, bemat bê tɔk ha há ves e ra rezâ Dagwi tanga e ra batîn basa mot wɛt.

²Ko vemo de bedanelɔ mɛn ba sé bemat-raa, yɛn a nɔ̂ng bedanelɔ mɛn o nerey de na radɛ wɛt, yaga yɛn a sé begwa e ji gwông raa. A dal naka e negya na yɛn a ra fwom de gwa dal na nerat, yaga vemo de be re nerât fwom mɛn o ba sé bemat-raa de ba tɛ̀ yey na yɛn. Tik na hwo basa, na hwo to vo a yɛn redu e ra pyɛ́ yemo.

³Ka sede mwat hwak e basa batîn basa baduk o, ko e kyɛ́ ɛ neha Darwey mot Yɛsu Kristi de na sé mwin, e to kyɛ́ ɛ bása hê gwông raa mwót,

⁴yɛ a sé pus na kaa zɔng, ko a tɔk pyɛ cak wɛt. A kat simô cuna vyes, na simô râ nu e ra neha. Ko pyɛ́ yemo ye tɛ̀, bemat be kyɛ́ ɛn nà simo mwat hwak a sɛ̀ pyɛ cak, bē jāma há, bē ha há ves, bē vɔk tô yey ves,

⁵na be dopse ra repugu na bemɛn arɔng. Yɛn e ra ano, yaga ba tɛ̀ a yɛn vɔ e yey, ko yɛn a to tɔk tsak o wɛt. Ko be tē kɛ gyeng a sé e raà Dagwi de hê tɛ̀ ɛn, be sɛ̀ yas.

⁶Mwin, raà Dagwi hɛ à gbɔng yas á mwat de a feng na pyɛ de a vɔk.

⁷Wot a vey e jey na vɔ sǎn, ko wot a rɔda ba to ot na vɔ sǎn.

⁸Ano kwong, ka sede wot a vɔk pyɛ̂ re tanga berugu, e sɛ́ de wot e rɔɔ jāma arɛt?

⁹Ko bemat de be simo be tɛ́ ɛn bedaberey be yeles e ji setɔgɔs. Cwey pyɛ́ de ba vɔk e ji netɔn mɛn, yēmo de ye mǎ hɛn, ye vo ɛn sede segun. Ye to tɛ̀sɛ hɛn na yɛn a lashe bato mɛn, na be wey arɔng.

¹⁰Yaga tɛ̂ yey na dyām ha sé cak e ji pyɛ́ de ye susu kayɛ pyɛ vyes. Bemat behak ba ga jāma yɛ̄ na cilis, ko yaga ano, ba ga ye rɛng yi e gwông raa. Ko yɛn a ga vey a bato mɛn na lashê yey detidetu de ha ga re a yɛn yey.

¹¹Ko di hwo, à mwât Dagwi, gas o na pyɛ́ yemo mwa. Jāma na negwɔn mō ne sè cik e bayîs Dagwi, na hwo raa hɛ na yêy mwa, na hwo sey tsak o na yɛ; tɛ̀ yey mō na bemat, na hwo niri, na hwo sè hywɛ.

¹²Bemat de be sey tsak o ba sé sede bemat de be tele setele. Ko hwo arɔng, pɛngɛ hwo e ra râ gbɔng setele mo, yaga na hwo bin sɛ̀ nɔrɔ̂ neken gbak-gbak. Yaga Dagwi á kana yila hwo na hwo sɛ̀ neken o e jeng de hwà ha nuha na yey ting e nuyêl bemât nuha pyak.

¹³E nuyêl Dagwi, de e nɔngɔ̂s pyɛ̂ mwa neken, tanga e nuyêl Kristi Yɛsu, de á kana nɔng nuha na yey ting e nuyêl Pɔntyus Pilatus, ma sé nɔng o redu wɔgɔ:

¹⁴Gyeng badu mo na yey mō mwa e gwong de bê tɔk ha há hak ves e ra gwɛ wɛt sɛ̌ jeng de wot a rɔda ba di Darwey mot Yɛsu Kristi.

¹⁵Dagwi a rɔda ba tɛ̀ tuk o e jeng de a di ya jam a yɛ. Yɛ Dagwi de be somo hɛ, yɛ nju mɛ zɔng de e re negwɔm; yɛ a sé Gbɔng Gwɔ̀m begbɔng begwɔ̀m mwa tanga Darwêy bedaberey mwa.

¹⁶Yɛ nju mɛ zɔng de e ku wɛt, ko e sangsal e ji negbey de mwat e tɔk wɔ bagat na nɛ wɛt; yɛ de mwasi a ga sang di ɛ wɛt, ko a rɔda tɔk di ɛ arɔng wɛt. Tik na be nɔng ɛ nerey na a re negwɔm nesheneshey! Ano.

¹⁷Nɔ̂ng vemo de ba sé bedaberey e ji pyɛ̂ jey yemo nu, yɛn a kwon dak ragey kɛ yɛn a sɛt yey mɛn e ra yas jey wɛt, yaga ya sé pyɛ de ye kwey zɔng. Ko bē tɛ̀ bayis mɛn e ra Dagwi e negya, yɛ de e nɔngɔs hot kayɛ pyɛ shɛrɛk, na wot a bin wok netâ yɛ.

¹⁸Hā a yɛn, yɛn a ra pyɛ́ de ya sé ryat, na yɛn a shǎl e ji râ yɛ̄ arɔng; yɛn a vɔk shwey wɛt, ko yɛn a simo be gas pyɛ́ mɛn na bemat behak arɔng.

¹⁹Yi na ra ano, yɛn a sé bang a bato mɛn pyɛ́ de ya rɔda ba sè a yɛn ryat e nuyel, yaga na yɛn a bin sey neken de na sé ne tsak o mwin.

²⁰À Timotawus, gyeng pyɛ́ de ba tik a hwo e vɔ mō naka. Hwo wet betong na neha jey tanga cuna betɔn wɛt. Bemat behak be tâng pyɛ́ mo, à tɔ́k, ko ya sé tɔ́k ko tyɔng wɛt.

²¹Behak ba tē, ba vɔk tɔ́k hane mo, ko yi na hɛ yɛn a ga hàla gwông raa. Tik na Dagwi a dura a yin nerat mɛ.