Read berom 2 Timotawus 1 Bible Online

2 Timotawus 1 - berom bible

2 Timotawus 1

¹Bwok-rwang gwomo yi e vwɔ hom Bulus, tom Kristi Yɛsu yi na simô Dagwi, de a tomo me na me bin shara rehâ neken de Dagwi a sira na a nɔ̂ng vemo de ba sé sangal e ji nesa na Kristi Yɛsu,

²Vɔk na hwo, à Timotawus, hwêy yey hom: Tik na Dagwi Da tanga Kristi Yɛsu, Darwey mot, be dura a hwo nerat mɛn, be tosho reyɔm mō, na be tɛ̀ yey mō ye dyɛng.

³Me feng a Dagwi de me ra a yɛ fwom na yey de ya gang me na shɔt wɛt, tyɛng sede bedabeda hom bá kana ra. Me feng a yɛ nagwi na naturuk jeng de me bare na hwo e ji kahɛ won hom.

⁴Me bare na nemwishil mō, ko me simo na me di o tyɔng wɛt, yaga na me bin vɔk yey pyɛng vit a yere mo.

⁵Me to bare na gwong de hwá sey tsak o na Kristi Yɛsu, vit a bɔs e ji gwɛ. Neng-gwɔ mō kunat Loyis tanga neng-gwɔ mō Einike yɛn á tānga sey tsak o ano arɔng, ko ma tɔk yɛt, hwà sey tsak o sede yɛn.

⁶Yaga ano, ma sé bare a hwo, tik na hwo ra fwom na nɔrɔ de Dagwi á nɔng o jeng de ma tɛ̀ vɔ hom e ra hwo.

⁷Yaga Gabik de Dagwi a nɔng ot he tɛ̀ ot na wot a vɔk bengyip wɛt, ko he tɛ̀, wot a vɔk reto e negya, na wot a tɛ̀ yey na Dagwi tanga bemat, na wot a gyeng bato mot arɔng.

⁸Ano kwong, hwo vo rekyen nà nɔng nuha e ra Darwey mot wɛt, kɛ hwo vo rekyen hom arɔng wɛt, me de ma sé mwât ngyang yaga yɛ. Ko jut bak o mwo wo reyɔm yaga sharâ Yɛgɛt Yat, sede remo de Dagwi e nɔngɔs hwo gap na hwo ra ano.

⁹Yɛ a sey ot, ko a to yila hot na wot a sè bemat mɛ vê tó mɛ. A ra ano wɛt, yaga pyɛ́ de wot a ga ra, ko yaga pyɛ́ de yà sè e yey mɛ, yaga na a dura a wot nerat mɛ. À kana nɔng ot nerat nemo yi na Yɛsu Kristi gyam na be susu pyɛ̂ mwa.

¹⁰Ko a remo, ba ga dura a wot nɛ wɛshɛrɛk yi na vêy Mwât Sey ot e jey, yɛ Kristi Yɛsu. Yɛ a ga yɛnɛ retô reku, ko yi na Yɛgɛt Yat a ga to dura wɛshɛrɛk, wot a rɔda vɔk neken gbak-gbak, ko wot a rɔda ku wɛt.

¹¹Dagwi a tɛ̀ me na me tɛ́ me tom mɛ tanga mwât basa, yaga na me shara Yɛgɛt Yat yemo.

¹²Pyɛ ma yemo de ya tɛ̀, me sɔ reyɔm a remo. Ko ma vo rekyen wɛt, yaga ma tɔk mwat de ma tɛ̀ gap hom e ra yɛ. Ko ma tɔk tsɛng-tsɛng, yɛ ê kyɛm a gyeng pyɛ́ de ma ga tik e vɔ mɛ naka vɔk e tuk shɔt hane mo.

¹³Vɔk gak bása hê mwin de hwà kana wok yi na me, vɔk hɛ sede pyɛ de hwà rɔda raa gwông yɛ, ko rē nuyel na sêy tsak o na Kristi, na hwo tɛ̀ yey na Dagwi tanga bemat, yaga hwà sé sangal e ji nesa na Kristi Yɛsu.

¹⁴Gyeng pyɛ́ ryat de ba ga tɛ̀ yɛ̄ e vɔ mō naka; gyeng yɛ̄ yi na retô Gabik Jɛrɛ de he sangal e neyey mot.

¹⁵Hwà tɔk, kawɛ mwat e sevwêl Asiya a ga kyè a hàla me gbɔ́rɛy, mwa na Figelus tanga Hɛrmɔgɛnɛs.

¹⁶Tik na Darwey a tosho reyɔ̂m belɔ Onesiforus, yaga zang pyak e yɛ de á ra pyɛ́ de ya tɛ̀ me wɛng-wɛng. Á sè a yɛ rekyen yaga ma sè mwât ngyang wɛt.

¹⁷Ko jeng de a vey e ngamo e Roma, á hwo kyě jāma me, sɛ̌ á wɔ̀ sɛ̀ me e ngyen.

¹⁸Hwo hwà tɔk tsɛng-tsɛng yerê begwong de á sɛlɛ me e Ɛfɛsus. Tik na Darwey a tosho reyɔm mɛ tuk shɔt hane mo!