Read berom 2 Timotawus 2 Bible Online

2 Timotawus 2 - berom bible

2 Timotawus 2

¹Ko di, à hwey hom, vɔk gap yi na nerat de wot e sɛ yi na sangâl nesa na Kristi Yɛsu.

²Hwà ga wok pyɛ́ de ma basa e bayîs bemât nuha pyak. A remo, jut yɛ̄, na hwo tik e vɔ bemat de be tó yey na yɛn wɛt, vemo de bê kyɛm be basa a behak arɔng.

³Jut bak o mwo wo negbang sede mwât como rwat wo Kristi Yɛsu.

⁴Mwât como de a sê bûm fwom e simo a ra pyɛ de ya jam a gbɔng mwât nuyel mɛ. Yaga ano, e simo na pyɛ̂ bemat de ba sé bemât como wɛt ye kyě gansa hɛ wɛt.

⁵Ano arɔng, mwat de e ra jɔgɔ̂ setele a rɔda tɔk sɛ̀ pyɔlɔ̂ setele mo wɛt, sɛ̌ a gyeng badu jɔgɔ mo yɛ́t.

⁶Ko a sé naka na mwât cap de a ga pɛngɛ hɛ e de râ fwom a tānga sɛ̀ numo mɛ hê pyɛ́ de ba yɛt e hwiri mo.

⁷Bàre e ra pyɛ́ de ma sé ha, yaga Darwey a rɔda tɛ̀ hwo tɔk yɛ̄ mwa.

⁸Bàre na Yɛsu Kristi de ba sene hɛ yi e reku, womo de á sè yerê Davit. Yēmo yɛ à Yɛgɛt Yat de me shara a bemat.

⁹Ko a sé yaga ma sé shara Yɛgɛt Yat o de ma sé di reyɔm; ba tɛ̀ a me ngyang sede mwat de a gyili redu. Ko ba tɔk tɛ̀ a rehâ Dagwi ngyang wɛt.

¹⁰Yaga ano, ma sé niri na kayɛ pyɛ, na me sɛlɛ mɛ̀ bemat de Dagwi a ga kasa. Ma sé ra ano, yaga na Kristi Yɛsu a rɔda sey ɛn arɔng, ko yɛn a rɔda sangal e ji gbɔng nerat gbak-gbak.

¹¹Há hemo ha sé tsak o wɔgɔ: “Ka sede wot a ga ku tanga yɛ, ko wot ê sè beken na yɛ arɔng.

¹²Ka sede wot e niri e ji negbang, ko wot ê re negwɔm na yɛ arɔng. Ka sede wot a tono na yɛ, ko yɛ ê tono na wot arɔng.

¹³Ka sede wot e ra pyɛ wɛt yemo de wot a ha, wot a rɔda ra yɛ, ko yɛ ê nàra e de râ pyɛ de a ha, a rɔda ra yɛ, yaga a tɔk tono na tó mɛ wɛt.”

¹⁴Bàre a bemat mō mo na pyɛ́ yemo, na hwo to tusa hɛn e nuyêl Dagwi, yɛn a tow nu e ra neha wɛt. Tôw nu ha vɔk nerat nehak wɛt, ko he lashe barê bemat de be wok hɛ zɔng.

¹⁵Yē ngyɛ́k na Dagwi a jut o sede mwat rwat, sede mwât fwom de a rɔda vo rekyên fwom mɛ wɛt, womo de e misang tyɛng hâ Dagwi e ra tsak o.

¹⁶Pyɛ mō cak ye sè na neha jey ne betɔn wɛt. Vemo de be tɛ̀sɛ bato mɛn e ji nɛ ba rɔda gwɛ̌ kyè yikyik yi e gwông Dagwi.

¹⁷Bása mɛn o ha sé sede bweykanang de wo re rebêk mwat. Bemat de ba ga basa yerê bása hane, yɛn à Himɛnayus tanga Filetus.

¹⁸Yɛn a ga ye rɛng yi e gwông tsak o, ko be tē, séne bemat yi e reku ha ga kana kwey. Yi ano, yɛn e tɛ̀ behak e ji bemat-raa be tē bugurɛk yi e gwông raa.

¹⁹Ko tsak hâ Dagwi ha sé sede retis de yɛ a ga kana tɛ̀ rɛ gbarak, vit a pyɛ de yê tɔk digis rɛ. Ko ba jɛk neha nemo e ra rɛ wɔgɔ, “Darwey a tɔk vemo de ba sé bemɛ”, ko “Tik na kawɛ mwat de e tē, a sé wo Darwey a tik ragâs pyɛ́ vyes.”

²⁰E gbɔng lɔ be sɛ̀ neshǐ tanga nerwèy detidetu; nehak na sé ne dyam shinang na ne dyam pyɛng, ko nehak na sé ne cɔ tanga ne secwem arɔng. Nehak na sé yaga râ fwom e jeng nzem zɔng, ko nehak na sé yaga kayɛ jeng.

²¹Ka sede mwat hwak a tɛ̀ tó mɛ jɛrɛ yi e pyɛ́ vyes yane mo, ko ba rɔda ra fwom na yɛ yaga pyɛ́ de ya sé ryey o. Be tɔk ra ano, yaga a ga nára tó mɛ na Dagwi, ko a vɔk nerat e nuyêl Dalɔ mɛ. A rɔda sangal e yong ɛ yaga kagwɛ fwom rwat arɔng.

²²Pyɛ cak ye wuna hwo na cwey pyɛ̂ bewen wɛt. Ko jāma na negwɔn mō ne sè cik e bayîs Dagwi, na hwo sey tsak o na yɛ; tɛ̀ yey na yɛ tanga bemat, na hwo sangal tyang arɔng tanga vemo de be ra won na Darwey na a sɛlɛ hɛn, vemo de neyey mɛn na sé haalal.

²³Nɔng bama mō e ra cuna de be ra e ji netɔn sana tɔk tô yɛ, yaga hwà tɔk, e yɛnɛ mo, cuna mo ye vey na tôw nu zɔng.

²⁴Sam Darwey a sè mwât tôw nu wɛt. Tik na a vɔk negwɔn sɛlɛ vɔk na kawɛ mwat, na a to sè mwat de a tɔk basa a bemat, womo de a vɔk niri.

²⁵Tik na a yong a bemat de be ra cuna na yɛ buru mɛn na nehywɛ. Gyeng rɔ̌ Dagwi a rɔda nɔng ɛn gwong na be doyo yi e banɛn mɛn, na be bin tɔk tsak o arɔng.

²⁶Ano, yɛn ê to ɛn e ji nehywɛ mɛn, na be hywit ɛn yi e segun gwɔ̀m cēng. Yɛ a ga kana vo ɛn na a tɛ̀ ɛn, yɛn a ra pyɛ de e simo.