Read berom 2 Timotawus 3 Bible Online

2 Timotawus 3 - berom bible

2 Timotawus 3

¹Tik na hwo tɔk: E jeng ye yɛnɛ mo, gbɔng negbang na rɔda hwo e ra bemat.

²Bemat ba rɔda kat simô bato mɛn tanga simô dyām arɔng, bê dak ragey, ko bê tos bato mɛn, bê lashe bazâ bemat, ko bê gyeng hâ beda na beneng mɛn wɛt, bê dura feng wɛt, ko bê sap Dagwi arɔng wɛt;

³yɛn ê simo bemat wɛt, ko yɛn ê hàla a bemat pyɛ de ba ra a yɛn wɛt, bê sè bemât hât bemat, ko bê gyeng bato mɛn wɛt, bê sè pyɛ bengyip na bwang bemat, ko yɛn ê kyɛ́ ɛn kayɛ pyɛ de ya sé ryat;

⁴bemat bê tó yey na yɛn, yaga yɛn e vɛ́sɛ bɔs, ko bê ra pyɛ́ sana bare, bê pus na kaa, ko tɛ̂ yey hê netâ jey hê dal a yɛn hê Dagwi;

⁵yɛn ê dúsa bato mɛn na bemat sede sángal mɛn ha jam a Dagwi, ko yɛn ê kyɛ́ ɛn reto mɛ e sángal mɛn o. Pyɛ cak ye wuna hwo na bemat vane wɛt!

⁶Behak e ji mɛn be yeles e nelɔ bemat, ko be sɛ̀ reto e ra beha de ba vɔk gap e sángal mɛn wɛt. Banɛ̂n beha mo ba yɛklɛ hɛn sede pyɛ dirik, ko be kyě raa cwey pyɛ́ vyes detidetu.

⁷Be wet betong jojot na basâ kawɛ yerê mwat, ko yɛn ê kyɛm be ka tɔk tsak o wɛt.

⁸Sede remo de Yanes na Yamberes bà kana ra retek na Mose, ano arɔng, bemat o be ra retek na tsak há. Báre mɛn ha sé ves zɔng, ko Dagwi a ga kyɛ́ ɛ hɛn, yaga yɛn a sey tsak o wɛt na pyɛ́ de ya sé tsak o.

⁹Ko yɛn ê ros e ji begwong vane wɛt, yaga kawɛ mwat a rɔda di netɔn mɛn, sede remo de bà kana di ne Yanes na Yamberes.

¹⁰Ko hwo hwà ga raa bása hom, na negwɔn hom, tanga pyɛ́ de ya sé e yey hom na me ra. Hwà ga bɛrɛng gwong de ma sey tsak o, na gwong de ma niri, na gwong de ma tɛ̀ yey na bemat, tanga gwong de ma tumal ting.

¹¹Hwà tɔk rezot detidetu de ma di, na nezap reyɔm de ma sɔ, tanga pyɛ̂ mwa de yá té na me e bapomô Antyokya, na Ikonyum, na Listira; ma niri na gbɔng reyɔm de ba tak a me. Ko Darwey a sey ɛ̀ me yi e reyɔm o mwa.

¹²Bê nɔ̂ng kawɛ mwat de e simo a sangal yerê sángal de ha jam a Dagwi yi na wunâ nesa na Kristi Yɛsu rezot.

¹³Ko bemat beves tanga vemo de be kwɛlsɛng bemat bê gwɛsɛ neves mɛn. Yɛn ê kwɛlsɛng behak, ko behak bê kwɛlsɛng hɛn arɔng.

¹⁴Ko hwo à! Rē nuyel na râ pyɛ́ de hwà ga masa, yēmo de hwà sey tsak o na yɛ̄ gak. Hwà tɔk bemat de ba basa a hwo yɛ̄,

¹⁵ko hwó bare, yimo hwo hwey vey e jeng yemo, hwà tɔ́k o na Bwok-basa Dagwi gwo jɛrɛ. Bwok-basa mo gwa tɔk nɔng o netsitsɛng de ne dura a hwo gwông sɛ̂ neken yi na sêy tsak o na Kristi Yɛsu.

¹⁶Mwa neha de bà jɛk e Bwok-basa Dagwi na vey yi na Dagwi pyɛ mɛ, ko na sé nerat e de basa a bemat tsak há, e de gyong ɛn yaga ragâs banɛn, e de yong pyɛ́ de ya sé buru, na e de masa a bemat gwông sangal de gwa sé cik.

¹⁷Yi ano, mwat de e raa Dagwi na yêy mwa a bin sè gyat, na a yong ɛ, na a ra kagwɛ fwom rwat.