Read berom 2 Timotawus 4 Bible Online

2 Timotawus 4 - berom bible

2 Timotawus 4

¹Ma sé nɔng o nu na gap e nuyêl Dagwi tanga Kristi Yɛsu de a rɔda ba ra a vemo de ba sé beken na vemo de ba ga kushu shɔt. Yɛ a to sé kyè vey na a re negwɔm. Yaga ano, ma sé nɔng o nu:

²Shara rehâ Dagwi, hā rɛ̀ na gap mō mwa kayɛ jeng, kɛ jeng o ya jam ɛ̀ kɛ ya ka jam ɛ̀ mwa wɛt ayi. Dura a bemat de be wokos hwo buru mɛn, na hwo gyong ɛn, na hwo to gwɛ̌ a yɛn gap arɔng. Rá ano e de bása mō, ko niri na yɛn e ji pyɛ̂ mwa.

³Yaga jeng ya sé kyè vey de bemat bê kyɛ́ ɛn batîn basa de ba sé mwin, ko bê raa cwey pyɛ́ de ya jam a yɛn. Yaga ano, yɛn ê tula a bato mɛn bemât basa pyak, vemo de ba rɔda basa a yɛn tyɛng pyɛ́ de yɛn e simo.

⁴Yɛn ê bang betong mɛn yi e de wôk há de ha sé tsak o, ko yɛn ê wet vɛ e de wôk yá.

⁵Ko di hwo à! Tik na hwo vɔk tó mo naka e ji kayɛ pyɛ. Niri na reyɔm; rá fwôm mwât sharâ Yɛgɛt Yat, na hwo ra kagwɛ fwom de gwa sé mwó, yaga hwà sé mwât fwôm Dagwi.

⁶Ko di me à, jeng ya ga vey de ba rɔda nára me sede nɔrɔ̂ yas de be yɛt vɔk na Dagwi. Jeng de mê kyè ya ga vey bagat.

⁷Ma sé sede mwât sekyisa, ko ma ra sɛ naka. Ma sé sede mwât setele, ko ma yɛnɛ sɛ gyat. Ma sey tsak o na Kristi Yɛsu pere vey e jeng yemo.

⁸Ko a remo, bwang o gwa tɛt ɛ̀ na me ba sey pyɔlɔ de ba rɔda ba nɔ̂ng vemo de sángal mɛn ha sé cik e bayîs Dagwi. Darwey, yɛ de e gas badu e tē, a rɔda ba nɔng me pyɔlɔ mo jeng de e ba vɛ̄ hɛ. E me nju hom de me ba sey yɛ̄ wɛt, ko e mwa vemo de ba sɛt bayis mɛn e ra jeng toyo mɛ arɔng.

⁹Yē ngyɛ́k na hwo vey na me ziri.

¹⁰Demas a ga tɛ̀ yey na jey yemo, ko a ga hàla me, a kyè vɔk e Tesalonika. Kereskes a ga kyè vɔk e sevwêl Galatya ko Titus vɔk e sevwêl Dalmatya arɔng.

¹¹A sé e Luka nju mɛ de a sé na me. Ci wɔ̀ jāma Markus, na hwo vɔk ɛ́ ba pom, yaga ê tɔk sɛlɛ me na fwom.

¹²Ma ga tomo Tikikus vɔk e Ɛfɛsus.

¹³Jeng de hwó kyè vey, vɔk ɛ̀ gworugu de ma tik na Karpus e repomô Torowas, tanga bebok-basa hom, a kat mɛ̀ vemo de ba yong na rehwo.

¹⁴Aleksanda de a sé zu dyam zwey á mǎ me tyɔng wɛt. Darwey a rɔda tala hɛ tyɛng na pyɛ de a ra a me.

¹⁵Hwo pyɛ mo arɔng, tē naka na yɛ, yaga a ra retek na reha mot vit a yere mo.

¹⁶E jeng de bá wɔ́ na me e duk shɔt e mɛsɛng o, vit a mwat de á nɔng nuha hê sɛlɛ hom; mwa bemat o bá kyè be hàla me. Tik na Dagwi a jɛk pyɛ yemo e ra yɛn wɛt!

¹⁷Ko Darwey á sangal ɛ̀ tanga me, ko á nɔng me gap, na me shara há mɛ naka, yaga na mwa vemo de ba sé BeYuda wɛt be bin wok hɛ arɔng. Ko Darwey a sey ɛ̀ me yi e nû gukum.[1]

¹⁸Darwey a rɔda sey ɛ̀ me yi e kanɛ neves, ko a rɔda jut me tyang vɔk e lagwi e kwɔn de e re ɛ̀ negwɔm mɛ. Tik na gbɔng nerey ne sè nemɛ gbak-gbak! Ano.

¹⁹Tâng Piriskila na Akwila show tanga belɔ Onesiforus.

²⁰Ɛrastus á nàra e repomô Kɔrintɔs, ko ma tik Torofimus e Miletus, yaga á sè a yɛ naka wɛt.

²¹Yē ngyɛ́k na hwo vey gyam na nabolos ne yi. Eibulus, na Pudes, na Linus, na Kalaudiya, tanga bwang begwa mot bemat-raa be tang o show.

²²Tik na Darwey a sangal e ji yey mō. Tik na a dura a yin nerat mɛ.