Read berom Titus 1 Bible Online

Titus 1 - berom bible

Titus 1

¹Bwok-rwang gwomo yi e vwɔ hom Bulus, sam Dagwi na tom Yɛsu Kristi. Bá kana tomo me vɔk na bemat de Dagwi a ga kana kasa, yaga na me wɔ̀ sɛlɛ hɛn na be sey tsak o na yɛ, na be to tɔk tsak há e ra gwông raa mwót.

²Pyɛ́ yemo wot e sey, yaga wot a sɛt bayis mot, wot ê sɛ̀ neken gbak-gbak. Yimo gyam na be susu pyɛ̂ mwa, Dagwi à kana sira hɛ, a rɔda nɔng ot neken nemo mo, ko yɛ e vɛ́ bɔs wɛt.

³Ko jeng de à di, jeng ya ga vey naka, à dura a bemat há mɛ wɛshɛrɛk. Yi na nɔ̂ng nû Dagwi, Mwât Sey ot, ba tik há mo e vɔ hom, na me shara hɛ.

⁴Ma sé jɛk a hwo, à Titus, de hwà sé hwey hom mwin yi na raà gwông raa de wot e raa gwɛ mwa hot: Tik na Dagwi Da tanga Kristi Yɛsu, Mwât Sey ot, be dura a hwo nerat mɛn, na be tɛ̀ yey mō ye dyɛng.

⁵Ma tik o e Kereta, yaga na hwo bin yong pyɛ́ de ya rɔngɔl simo na be yong yɛ̄, na hwo to tɛ̀sɛ bemakûk ekilisiya e karɛ repomo arɔng. Bàre na pyɛ́ de ma kana basa a hwo wɔgɔ:

⁶Mwakûk ekilisiya a sè mwat de ba tɔk ha pyɛ vyes cak e ra yɛ wɛt, ko tik na a vɔk hwā gwining zɔng, na nèy mɛ ne sè bemat-raa arɔng, nemo de be tɔk nɛ na negwɔn simô râ pyɛ kpɛɛ wɛt, ko ne to sè gbàrak arɔng wɛt.

⁷Sede remo de fwôm Dagwi gwa sé e vɔ mɛ, ko a sé gbing-gbing na mwât nuyêl ekilisiya mo a sè mwat de ba tɔk ha pyɛ vyes cak e ra yɛ wɛt. A vɔk to ven kɛ a vɔk ɛ̀ shom wɛt; a kat sɔ̂ siring, kɛ a simo yol, kɛ a kat simô dyām wɛt.

⁸Ko tik na a bɛrɛng bekɛnɛt naka, na a tɛ̀ yey na pyɛ́ de ya sé ryat; na a gyeng to mɛ, na a ra kayɛ pyɛ cik, na a sè jɛrɛ, na a yɛklɛ hɛ naka arɔng.

⁹Tik na a kaba na gap há hemo de be tó yey na hɛ wɛt, hemo de ha sé hining na batîn basa mot arɔng. Gwong a gwomo de a rɔda tɔk gwɛ̌ a behak gap yi na batîn basa de ba sé mwin, na a to dura burû vemo de be kyɛ́ ɛn há mo.

¹⁰Yaga bemat ba sé pyak, a kat mɛ̀ vemo de bá doyo yi e negwɔn BeYuda de be kyɛ́ ɛn nà raa pyɛ́ de be ha a yɛn, ko be to kyě kwɛlsɛng behak na neha de na vɔk retin wɛt.

¹¹A sé gbing-gbing na be dul ɛn nà ha neha mɛn o, yaga yɛn a sé lashe bemât mwa e nelɔ mɛn yi na basa de ha jam wɛt. Yɛn e ra ano yaga jāmâ dyām zɔng, vit a rekyen.

¹²Hwak e ji mɛn, womo de bemât Kereta mo ba jut ɛ sede zarap, á kana ye, “Bemât Kereta ba sé bemât bɔs kayɛ jeng; yɛn a sé sede ngyāma vyes, ko yɛn a to sé beriri de ba kat serwéy.”

¹³Pyɛ de mwat o á ha ya sé tsak o. Yaga ano, gyong ɛn na gap, yaga na yɛn a bin nàra e gwông raa de gwa sé mwin,

¹⁴yaga na yɛn a kwon re nuyel na tɛ́sɛ nehywɛ mɛn e ra yâ BeYuda wɛt kɛ e ra badu de be yi na bemat de ba ga kyɛ́ ɛn tsak há.

¹⁵Kayɛ pyɛ ya sé jɛrɛ na bemat de ba sé jɛrɛ pyɛ mɛn. Ko vit a pyɛ de ya sé jɛrɛ na bemat de ba sé ligis, vemo de ba sey tsak o arɔng wɛt; mwin, tɔ́k mɛn tanga barê yey mɛn mwa ha ga tɛ́ ɛ ligis.

¹⁶Yɛn e tē, yɛn a tɔk Dagwi, ko yɛn e tono hɛ́ yi na tomong mɛn. Yɛn a sé bemat de be kyɛ́ ɛn hɛn sizɔng; yɛn e gyeng hâ bemat wɛt, ko yɛn e tɔk ra pyɛ cak de ya sé ryat arɔng wɛt.