Read berom Titus 2 Bible Online

Titus 2 - berom bible

Titus 2

¹Ko hwo à, bàsa pyɛ́ de ya sé tyɛng na batîn basa vê mwin.

²Hā a beras bekunat, be yɛklɛ hɛn, na be ra pyɛ́ na jɔgɔ wɛt, na be to gyeng bato mɛn naka. Tik na gwong de yɛn a sey tsak o na Kristi, na gwong de yɛn a tɛ̀ yey na Dagwi tanga bemat, na gwong de yɛn a niri arɔng gwo sè mwin.

³Ano arɔng, bàsa a beha bekunat, na sángal mɛn he sè hê bemat de ba ga tɛ̀ ɛn jaram na be ra fwôm Dagwi. Yɛn a sè bemât hât bemɛn kɛ besam siring wɛt. Ko tik na yɛn a basa a behak pyɛ́ de ya sé ryat.

⁴Ka sede yɛn a ra ano, ko yɛn ê tɛ̀ beha bepas be tɛ̀ yey na beras mɛn tanga nèy mɛn,

⁵bē gyeng bato mɛn, na sángal mɛn he sè jɛrɛ arɔng; yɛn ê tɛ̀ ɛn, be gyeng nelɔ mɛn naka, bē vɔk gwông sɛlɛ bemat, na be to dyɛng bato mɛn na beras mɛn. Tik na be ra ano, yaga na mwat hwak a tɔk ha há ves e ra rehâ Dagwi wɛt.

⁶Ano arɔng, shonong e ra bewen na yɛn a gyeng bato mɛn naka.

⁷Ko tik na hwo pyɛ mō hwo sè mwat de ba rɔda masa e kayɛ pyɛ. Tik na hwo sè cik e bása de hwó ra a yɛn, na hwo ye siw e de râ hɛ arɔng.

⁸Rá fwom na neha de na sé mwin, nemo de mwat hwak a tɔk ha há hak e ra nɛ wɛt. Yi ano, bemât repugu mō bê vo rekyen jeng de yɛn a bidɛ pyɛ vyes cak de yɛn a rɔda tɔk ha e ra wot.

⁹Hā a besam, be dyɛng bato mɛn na bedanelɔ mɛn, na be ra a yɛn kayɛ pyɛ de ya jam a yɛn. Yɛn a toyo a bedanelɔ mɛn na há wɛt,

¹⁰kɛ yɛn a ragas vwɔ wɛt. Ko tik na yɛn a dura, yɛn a sé bemat de be tó yey na yɛn ko tyɔng wɛt. Yi na negwɔn mɛn o, e ji kayɛ pyɛ de yɛn e ra yɛn ê tɛ̀ bemat be ha há rat e ra batîn basa de be basa e ra Dagwi, Mwât Sey ot.

¹¹Yaga Dagwi a ga dura nerat mɛ wɛshɛrɛk, yaga na a sey kawɛ mwat yi na nɛ.

¹²Ko nerat nane mo ne basa a wot, wot a kyɛ́ ot yerê sángal de ha sé e gwông Dagwi wɛt mwa na cwey pyɛ̂ jey yemo. Ne to basa a wot, wot a gyeng bato mot, na wot a ra kayɛ pyɛ cik, na sángal mot e jey yemo he jam a Dagwi arɔng.

¹³Tik na wot a ra ano e jeng de wot e gyeng tuk rat hemo de wot a sɛt yey mot e ra hɛ. A sé e tuk o de gbɔng nerat ne gbɔng Dagwi mot na rɔda vey, yɛ Mwât Sey ot Yɛsu Kristi.

¹⁴E yɛ de a nɔng tó mɛ yaga wot, na a vibis hot yi e kanɛ neves. A ra ano, yaga na a bin tɛ̀, wot a sè bemât jɛrɛ vemo de ba sé bemɛ nju mɛ, na wot a tē ngyɛ́k e de râ pyɛ́ de ya sé ryat arɔng.

¹⁵Bàsa a bemat pyɛ́ yemo mo, na hwo ra fwom na mwa reto de ba nɔng o e jeng de hwó vo a bemat redu, na hwo gyong ɛn arɔng. Hwak e ji mɛn a byɛs o wɛt.