Read berom Titus 3 Bible Online

Titus 3 - berom bible

Titus 3

¹Bàre a bemat mō, bē dyɛng bato mɛn na begwɔ̀m, mwa na vemo de ba vɔk reto, yaga na yɛn a gyeng há mɛn, na be yong ɛn be ra kayɛ pyɛ de ya sé ryat.

²Hā a yɛn, yɛn a kwon lashe bazâ bemat kɛ be sogo nehywɛ wɛt; ko bē dura nehywɛ vɔk na bemat, na be dyɛng bato mɛn na kawɛ mwat.

³Yaga raane, wot pyɛ mot wot á sè betɔn, wot á gyeng hâ bemat wɛt, ko bá kwɛlɛng hot. Wot á sè besam nezap cwey pyɛ̂ jey tanga nè pyɛ́ de wot á wok netâ yɛ̄. Wot á lashe jeng sángal mot e ji neves, ko wot á kyɛ́ ot nà simo mwat hwak a sɛ̀ pyɛ cak. Behak bá bɛrɛng hot ves, ko wot á bɛrɛng behak ves arɔng.

⁴Ko jeng de Dagwi, Mwât Sey ot, á dura a bemat nerat tanga tɛ̂ yey mɛ wɛshɛrɛk,

⁵yɛ á sey ot. Á sè yaga tomong mot rat wɛt de a sey ot, ko á sè yaga á tosho reyɔm mot. Á sey ot yi na Gabik Jɛrɛ de he kus ot, ko yi ano he tɔs ot bepas, ko he to nɔng ot neken nepas arɔng.

⁶Dagwi á nɔng ot Gabik o shɛrɛk yi na Yɛsu Kristi, Mwât Sey ot.

⁷Á ra ano, yaga na a tɛ̀, wot a sè cik e bayîs Dagwi yi na nerat mɛ, yaga na wot a ba sɛ̀ neken gbak-gbak arɔng nemo de wot a sɛt yey mot e ra nɛ.

⁸Há hemo ha sé tsak o. Me simo na hwo shonong e ra râ pyɛ́ yemo, yaga na mwa vemo de ba tɛ̀ gap mɛn e ra Dagwi be bin tɛ̀ nehywɛ mɛn e de râ tomong rat. Pyɛ́ yemo mo ya sé ryat, ko ya to vɔk sɛlɛ yaga kawɛ mwat.

⁹Ko tik na hwo kyɛ́ o nà ra cuna de vit a yɛ nà retin, kɛ hwo bare e ra nepyak yére min yê raane wɛt, kɛ hwo ragas yol, kɛ hwo tow nu e ra Badu arɔng wɛt. Pyɛ́ yane ya vɔk sɛlɛ wɛt, ko ya sé yapyi zɔng.

¹⁰Ko mwat de e vɛ̀sɛ na gas e ji bemat, tik na hwo hwɔtɔ a yɛ fwong, he radɛ zang ba wɛt, ko bama mo pyɛ mō cak ye to sè na yɛ wɛt.

¹¹Hwà tɔk, yerê mwat wane a ga vuru hɛ, ko a sé ra banɛn; ko yɛ pyɛ mɛ a tɔk, pyɛ́ yane ya sé ano.

¹²Jeng de mê tomo Artemas kɛ Tikikus vey na hwo, ko yē ngyɛ́k na hwo vey na me e Nikopolis, yaga ma ga yong ɛ̀ e yey hom, ma rɔda re nabolos e hwomo.

¹³Yē ngyɛ́k, na hwo sɛlɛ Zenas, mwât fwɔ̂ redu, tanga Apɔlɔs, na yɛn a hwo kwɛngɛl mɛn o, ko di, yɛn a vɔk kayɛ pyɛ de yɛn e simo.

¹⁴Tik na bemat mot be masa na be nɔng jeng mɛn e de râ pyɛ́ ryat, yaga na yɛn a nɔng pyɛ́ e jeng de behak be simo sɛlɛ mwin, ko yɛn a sangal kpɛɛ zɔng wɛt.

¹⁵Mwa vemo de ba sé na me be tang o show. Tâng besa mot de ba sé vê gwông raa show arɔng. Tik na Dagwi a dura a yin mwā nerat mɛ.