Read berom Filemon 1 Bible Online

Filemon 1 - berom bible

Filemon 1

¹Bwok-rwang gwomo yi e vwɔ hom Bulus, mwât ngyang yaga Kristi Yɛsu, tanga yi na gwa mot Timotawus, Vɔk na Filemon, sá mot na sâ fwom mot,

²na Afya, gwà mot hwā mo, tanga Arkipus, gwà tô como mot, mwa na bemat-raa de be manas e lɔ mō:

³Tik na Dagwi Da mot tanga Darwey Yɛsu Kristi be dura a yin nerat mɛn, na be tɛ̀ yey min ye dyɛng.

⁴Kayɛ jeng de me ra won, me bare na hwo, à Filemon, ko me to feng a Dagwi hom.

⁵Yaga me wokos, hwó tɛ̀ yey na mwa bemât Dagwi, ko hwó re nuyel na sêy tsak o na Darwey Yɛsu.

⁶Me ra won, yaga na sêy tsak o de ha wuna hwo na bemat-raa he ra fwom e ji mō. Yi ano, hwà rɔda tɔk kanɛ nerat de wot a vɔk e ji neken mot yi na sangâl nesa na Kristi.

⁷À gwa hom, jeng de ma wok rehâ tɛ̂ yey mō, yey hom ya pɛngɛ sizɔng, ko ra gwɛ̌ a me gap arɔng, yaga hwà ga tɛ̀ neyey bemât Dagwi mwa ne tɛ́ ɛn wɛng-wɛng.

⁸Yi na reto de Kristi a nɔng me, ma vɔk yey ting na me nɔng o nu na hwo ra pyɛ de ya sé naka na be ra. Ko mwa ano, me simo me nɔng o nu wɛt,

⁹ko me ra won na hwo e negya, yaga ma tɛ̀ yey na hwo. Me, Bulus, de ma ga kyɛ́ me pɔl ba e jey, ko a remo, ma to sé mwât ngyang yaga me raa Kristi Yɛsu,

¹⁰me ra won na hwo e tô Onesimus. Yɛ a sé hwey hom, yaga a sey tsak o na Yɛsu Kristi yi na basa hom e ngamo e lɔ̂ ngyang.

¹¹E jeng de yá kwey á vɔk nerat nehak na hwo wɛt, ko a remo, a vɔk nerat na hwo mwa na me arɔng.

¹²Ma sé to tomo hɛ vey na hwo, ko a sé kyè vey sede yey hom vey na hwo.

¹³Ma yâng simo na me vɔk ɛ e ngamo na me, yaga na a bin sɛlɛ me e to mo, a remo de ma sé e lɔ̂ ngyang yaga sharâ Yɛgɛt Yat.

¹⁴Ko ma ga simo na me ra pyɛ cak wɛt, sɛ̌ hwà simo e ngyen. Yaga me simo na hwo ra pyɛ ryat sede ba tɛ̀ o gbing-gbing wɛt, ko hwo ra yɛ yi na simô yey mō.

¹⁵Gànsa, Onesimus a gas ɛ na hwo kejeng tyɔng, yaga na hwo bin to sey ɛ, na a sangal na hwo gbak-gbak.

¹⁶Yaga a remo, yɛ a sé sam zɔng wɛt, a dal sam ding-ding: A sé gwà yey mō. Yɛ a sé a me mwat o tyɔng wɛt! Ko a rɔda sè a hwo mwat o tyɔng wɛt a dal mɛ̀. A rɔda sè a hwo ano e ji sangal mɛ sede sam mwa na sangal mɛ sede gwa mō e ji raà Darwey.

¹⁷Yaga ano, ka sede hwà jut me sede sâ gafiri mō, ko tik na hwo sey ɛ, sede remo de hwà rɔda sey me.

¹⁸Ka sede a ga ra a hwo pyɛ de ya sé tyɛng wɛt kɛ hwó rangal hɛ pyɛ cak, ko tik na hwo rangal me yɛ.

¹⁹Ko di, ma sé jɛk neha nemo na vwɔ hom pyɛ hom wɔgɔ: Me, Bulus, ma rɔda tala hwo. (Ko a ka sé pyɛ de ma rɔda bare a hwo wɛt, yaga hwà tɔk, me rangal hwo neken nepas mō pyɛ nɛ.)

²⁰Ko di, à gwa hom, rá a me pyɛ de me simo yaga Darwey! Hwà sé gwa hom yi na sangâl nesa na Kristi; yaga ano, tik na hwo tɛ̀ yey hom ye tɛ́ ɛ wɛng-wɛng.

²¹A remo de ma sé jɛk a hwo, ma tɔk tsɛng-tsɛng, hwà rɔda ra pyɛ́ de ma ra wôn yɛ̄ na hwo. Mwin, ma tɔk, hwà rɔda ra pyɛ́ de ya dal ano.

²²Me to simo hwo yong duk hwak gyam yaga me. Yaga ma tɛ̀ bayis hom e ra Dagwi wɔgɔ, a rɔda wok newon min, ko ê to nɔng me gwong na me vey na yin.

²³Ɛpafaras e tang o show. Yɛ a sé e ji lɔ̂ ngyang tanga me, yaga e raa Kristi Yɛsu.

²⁴Besâ fwom hom Markus, na Aristarkus, na Demas, tanga Luka be tang o show arɔng.

²⁵Tik na Darwey Yɛsu Kristi a tɛ̀ nerat mɛ e ji neyey min.