Read berom BeIbrani 10 Bible Online

BeIbrani 10 - berom bible

BeIbrani 10

¹Ko di, Badu BeYuda ba sé sede rezina zɔng rê pyɛ́ ryat de ya sé kyè vey, ko ba sé tyɛng na pyɛ́ de ya sé yê mwin o wɛt. Kahɛ shey be dopse nása nenɔrɔ̂ yas de be yɛt vɔk na Dagwi yerê nining o. Ko Badu mo ba tɔk tɛ̀ bemat de be vɛ̀sɛ na Dagwi be sila gyat e bayis mɛ yi na yerê nenɔrɔ nemo mo wɛt.

²Ka be tɔk ra ano, ka ba yâng tik nása nenɔrɔ̂ yas de be yɛt vɔk na Dagwi. Yaga bemat de be re a Dagwi fongol ba yâng tɛ́ ɛn jɛrɛ mwin yi e banɛn mɛn, ko ba yâng to bɛrɛng bato mɛn, ba ga gang ɛn na shɔt banɛn wɛt.

³Ko a sé ngan: Nenɔrɔ̂ yas de be yɛt vɔk na Dagwi ne tɛ̀ bemat be to bare na banɛn mɛn kahɛ shey,

⁴yaga nemî bemus na ne vyēl shi ne tɔk kus bemat yi e banɛn ko tyɔng wɛt.

⁵Yaga ano, jeng de Kristi á vey bagât vey e jey, á yâng Dagwi, “Hwó simo nenɔrɔ̂ yas de be yɛt vɔk na Dagwi kɛ nenɔrɔ detidetu wɛt, ko hwá yong a me rebek.

⁶Hwà vɔk yey pyɛng wɛt na bemat de be rangas yas burang e ra gàgbang rangâs pyɛ́, kɛ na vemo de be nása nenɔrɔ̂ yas de be yɛt, yaga na ne hashe banɛn arɔng.

⁷Ko ma ye, ‘À Dagwi, me a womo, na me ra pyɛ de hwó simo, tyɛng sede remo de bà jɛk e ra me e Bwok-basa Badu.’ ”

⁸E mɛsɛng o, a ye: “Hwó simo nenɔrɔ̂ yas de be yɛt vɔk na Dagwi kɛ nenɔrɔ detidetu wɛt; hwà vɔk yey pyɛng wɛt na bemat de be rangas yas burang e ra gàgbang rangâs pyɛ́, kɛ na vemo de be nása nenɔrɔ̂ yas de be yɛt, yaga na ne hashe banɛn arɔng.” A ha ano, mwa ano de be nása nenɔrɔ mo tyɛng na pyɛ de bà jɛk e Badu mo.

⁹Ko a to ye: “À Dagwi, me a womo, na me ra pyɛ de hwó simo.” Yi ano, Kristi a gang mwa nenɔrɔ̂ yas neroso de be yɛt vɔk na Dagwi, ko a tɛ̀ nɔrɔ̂ neken mɛ e tô nɛ.

¹⁰Yaga a ra pyɛ de Dagwi a simo na yɛ a ra, a nára rebek mɛ sede nɔrɔ̂ yas de be yɛt vɔk na Dagwi zang hining zɔng ko he pere vey yaga mwa jeng. Yi na pyɛ yane, ba ga tɛ̀ ot jɛrɛ yi e banɛn mwa.

¹¹Kawɛ piris wo BeYuda e ragas fwom mɛ kahɛ tuk, e nása nenɔrɔ̂ yas de be yɛt vɔk na Dagwi yerê nining o zang pyak, ko nenɔrɔ mo ne tɔk hashe banɛn ko tyɔng wɛt.

¹²Ko Kristi á nára nɔrɔ̂ tó mɛ zang hining zɔng yaga banɛ̂n bemat, ko nɔrɔ mo he ra fwom gbak-gbak. E bama mo, á wɔ̀ sangal e vwɔ yegê Dagwi.

¹³Ko e hwomo, a sé gyeng sɛ̌ jeng de Dagwi a re vê repugû Kristi mo, na a tɛ̀ ɛn e nɛ̂n bol mɛ sede pyɛ tikîs bol.

¹⁴Ano kwong, yi na nɔrɔ̂ pyɛ de be yɛt vɔk na Dagwi hining zɔng, a ga tɛ̀ vemo de ba ga tɛ́ ɛn jɛrɛ yi e banɛn be sila gyat gbak-gbak.

¹⁵Gabik Jɛrɛ arɔng he ha a wot wɛshɛrɛk wɔgɔ, pyɛ́ yemo ya sé tsak o. E mɛsɛng o, he tē:

¹⁶“Di, ma rɔda wuna me tanga yɛn na sira hemo e jeng de ye kyè vey. E me Darwey de me tē: Ma rɔda jɛk Badu hom e neyey mɛn, ko ma rɔda tɛ̀ vɛ e báre mɛn arɔng.”

¹⁷Ko he to tē: “Ma rɔda to bare na banɛn mɛn kɛ tomong ves mɛn ko tyɔng wɛt.”

¹⁸Sede remo de Dagwi a ga hàla pyɛ́ vyes yane mo, ko be to simo be nára nɔrɔ̂ yas de be yɛt vɔk na Dagwi wɛt na he jut mɛ̀ banɛn.

¹⁹À begwa hom wot a vɔk gwong pyot, na wot a bin yel e Duk Jɛrɛ Wo Jɛrɛ, yaga Yɛsu á shushu nemi mɛ e jeng reku.

²⁰Yɛ a ga wunta a wot gwong pwas de wot e raa vɔk e neken, gwomo de gwa kwey gworugû bâng rwi duk vɔk e Duk Jɛrɛ Wo Jɛrɛ. Á ra ano yi e rebek mɛ pyɛ rɛ de ra sé e tô gworugu gwane mo.

²¹Wot a vɔk gbɔng piris de a vɔk reto e ra bemât Dagwi.

²²Yaga ano, tik na wot a vey bagat na Dagwi na neyey de na vɔk bɔs wɛt, na wot a tɛ̀ gap mot mwa e ra yɛ. Wot e tɔk ra ano, yaga ba ga tɛ̀ neyey mot jɛrɛ na nemî Kristi yi na bare yey de he gang ot na shɔt, ko ba ga kus babek mot na nshi nerat.

²³Tik na wot a tɛ̀ neyey mot gak e ra pyɛ́ de wot e sɛt yey mot e ra yɛ̄, yēmo de wot e ha há wɛshɛrɛk e ra yɛ̄ arɔng. Wot rip ot wɛt, yaga yɛ de a ga sira hɛ e ra pyɛ́ yemo e sege há mɛ wɛt.

²⁴Ko tik na wot a jāma begwong de wot a rɔda sɛlɛ bemót, na wot a tɛ̀ yey na bemat, na wot a to ragas tomong rat arɔng.

²⁵Wot tik negwɔn manas na bemót wɛt, sede remo de behak be ragas. Ko tik na wot a gwɛ̌ gwɛsɛ a bemót gap, sede remo de yin a di, tuk de Darwey a rɔda vey ha sé kyè vey bagat.

²⁶Wot a sey tsak o, ko a remo, wot a tɔk wɛ. Yaga ano, ka sede wot e re nuyel na ragâs banɛn na simo mot, ko ba to vɔk nɔrɔ̂ yas de be yɛt vɔk na Dagwi hak de ha rɔda jut banɛn o wɛt.

²⁷Ko pyɛ de ya pɔl a wot ya sé ngan: Wot a gyeng na bengyip shɔt de ye kyè vey tanga kya de he ba re tyɔng wɛt, hemo de ha rɔda ba wey na vemo de be ra retek na Dagwi.

²⁸Be mɔrɔ kawɛ mwat de e kyɛ́ ɛ nà raà Badu Mose, e bama de ba gang ɛ na shɔt yi e nuha bemat beba kɛ betat, vit a wôk nemwishish mɛ.

²⁹Ka sede a sé ano, ko sɛ́ yê té na mwat de a byɛs Hwey Dagwi arɛt? Yɛ mwat de a jut sede yapyi zɔng nemi de Kristi a ga ra mɛ̀ fwom e de wuna-na-sira, nemo de na tɛ̀ ɛ a sè jɛrɛ yi e banɛn mɛ; yɛ de a dùsa Gabik hemo de he vey na nerat. Yerê tabak de ba rɔda tabak mɛ̀ mwat womo ha rɔda dal na nepep sizɔng!

³⁰Yaga wot a tɔk yɛ de a ye: “E me de ma rɔda toyo a yɛ na neves mɛ; ma rɔda tala hɛ arɔng.” Ko a to ye: “Darwey a rɔda ra a bemat mɛ shɔt.”

³¹A sé pyɛ bengyip sizɔng na mwat a yel e shɔt Dagwi wo neken!

³²Bàre hin na pyɛ de yá té na yin e jeng de yá kwey. E bama de negbêy Dagwi ná hwo e ra yin, yin á di reyɔm na pyɛ́ pyak. Ko mwa ano, reyɔm o rá di wɛng e ra yin wɛt, yaga yin á tumal gak.

³³E jeng cak, bá dùsa hin e bayîs bemat, ko bá tak a yin reyɔm. E jeng o cak, yin á wuna hin na vemo de bá teshe na yɛn ano arɔng.

³⁴Yin á wok nemwishish reyɔm de bá tak a bemât ngyang, ko jeng de bá sey ɛ̀ pyɛ̂ vɔ min mwa, yin á niri na nevît pyɛ́ min o na yey pyɛng zɔng. Yin á ra ano, yaga yin á tɔk, yin a rɔngɔl vɔk pyɛ́ cak de ya dal pyɛ́ yane mo mwa na nerat, yēmo de ya rɔda nàra na yin gbak-gbak.

³⁵Yaga ano, yin ye waa a yey ting min wɛt, yaga Dagwi a rɔda nɔ̂ng vemo de ba vɔk yey ting pyɔlɔ pyak.

³⁶A sé naka na yin a niri, na yin a ra pyɛ de Dagwi e simo, yaga na yin a bin sey pyɛ de a ga sira a yin e ra yɛ.

³⁷Yaga bà jɛk e Bwok-basa Dagwi wɔgɔ, “Yɛ womo de e kyè vey a rɔda vey e ji jeng tyɔng, ko a rɔda rɛn ɛ wɛt.

³⁸Mwat de a sé cik e bayis hom a rɔda tɛ̀ gap mɛ e ra me, ko a rɔda vɔk neken. Ko ka sede a toyo na bama, yey hom ya rɔda pɛngɛ na yɛ wɛt.”

³⁹Ko wot, wot a sé yerê bemat de be to ɛn na bama na be wey wɛt. Wot a tɛ̀ gap mot e ra Dagwi, yaga na a sey neken mot.