Read berom BeIbrani 11 Bible Online

BeIbrani 11 - berom bible

BeIbrani 11

¹Tɛ̂ gap e ra Dagwi ha sé ngan: Wot a tɔk tsɛng-tsɛng, wot a rɔda sɛ̀ pyɛ́ de wot e sɛt yey mot e ra yɛ̄, ko wot a to tɔk, pyɛ́ de wot e kyɛm wot a di na bayis mot wɛt ya sɛ́.

²A sé yaga bemât raane bà tɛ̀ gap mɛn e ra Dagwi de Dagwi o à simo hɛn mɛ̀.

³A sé yaga wot a tɛ̀ gap mot e ra Dagwi de wot a tɔk pyɛ yemo ngan: Dagwi à yong jey yemo na hâ nu mɛ wɔgɔ, bà yong pyɛ́ de wot e tɔk di a remo yi na pyɛ́ de bà tɔk di wɛt.

⁴À sè yaga Hɛvɛl à tɛ̀ gap mɛ e ra Dagwi de à nára a yɛ nɔrɔ̂ yas de be yɛt de hà dal nɔrɔ hê Kayin. Ko à sè yi na tɛ̂ gap hane mo de Dagwi à jut ɛ sede mwat de a sé cik e bayis mɛ. Dagwi à dura ano jeng de à sey nenɔrɔ mɛ mo. Mwa ano de Hɛvɛl à ga ku, ko a sé yi na tɛ̂ gap mɛ mo de a sé rɔngɔl ha.

⁵À sè yaga Enok à tɛ̀ gap mɛ e ra Dagwi de à ku wɛt, ko bà jut ɛ vɔk na Dagwi. Vit a mwat de à tɔk sɛ̀ ɛ, yaga Dagwi à jut ɛ. E Bwok-basa Dagwi bà jɛk e ra yɛ wɔgɔ, yɛ Enok à pɛngɛ a Dagwi yey gyam na be de jut ɛ mo.

⁶Vit a mwat de e tɔk pɛngɛ a Dagwi yey, sɛ̌ a tɛ̀ gap mɛ e ra yɛ. A sé gbing-gbing na kawɛ mwat de e vɛ̀sɛ na Dagwi a sey tsak o, Dagwi a sɛ́, ko e nɔ̂ng vemo de be jāma hɛ pyɔlɔ mɛn.

⁷À sè yaga Nowa à tɛ̀ gap mɛ e ra Dagwi de à wok tabak mɛ e ra pyɛ́ de ya rɔda ba té e nuyel. Mwa ano de à tɔk di pyɛ́ mo wɛt, ko à raa hâ Dagwi. À lɔk gbɔng dwa-nshi, ko bà sey ɛ tanga belɔ mɛ e ji wɛ. Yi ano, à dura, negwɔn bemat jey na sé neves. Ko Dagwi a tɛ̀ ɛ a sè cik e bayis mɛ, yaga à tɛ̀ gap mɛ e ra yɛ.

⁸À sè yaga Abraham à tɛ̀ gap mɛ e ra Dagwi de à raa há mɛ jeng de Dagwi o à yila hɛ. À nusu yi e sevwel mɛ vɔk e sevwel sehak de Dagwi à sira, a rɔda nɔng ɛ sɛ. À hàla sevwel mɛ mo sana tɔk kwɔn de e kyè vɔk ɛ̀.

⁹Ko yi na tɛ̂ gap mɛ mo à sangal sede kwɛnɛt e sevwel de Dagwi à ga sira a yɛ e ra sɛ. À sangal e buk, tyɛng sede remo de Yishak na Yakɔp bà ra, vemo de Dagwi à sira a yɛn e ra pyɛ jining o arɔng.

¹⁰Yaga Abraham à sè gyeng repomo de Dagwi à yong rɛ, remo de à to lɔk rɛ e ra retis de ra sé gbarak naka.

¹¹À sè yaga Abraham à tɛ̀ gap mɛ e ra Dagwi de à tɔk tɛ́ ɛ dâ hwey, mwa ano de jeng mɛ ya ga kana kwey yi na sekwopa, ko hwā mɛ Sara arɔng à sè sang-gwon. À tó yey wɛt wɔgɔ, Dagwi a rɔda sila pyɛ de à ga sira a yɛ e ra yɛ.

¹²Mwa ano de Abraham à sè sede revin o zɔng, ko yi na yɛ gwining o ba sɛ̀ yére bemat pyak. Nepyak yɛ̄ nà sè sede nepyak netangacɛn e lagwi, nà to sè sede bazɛk e rekwogôm gworep de vit a mwat de e tɔk basa vɛ.

¹³Mwa bemat vane mo bà tɛ̀ gap mɛn e ra Dagwi pere vɔk e reku mɛn. Yɛn à sey pyɛ́ de Dagwi à sira a yɛn e ra yɛ̄ wɛt, yɛn à di yɛ̄ yikyik zɔng, ko yɛn à vɔk yey pyɛng na yɛ̄. Yɛn à ha wɛshɛrɛk, yɛn à sè bekɛnɛt de vit a hɛn na kwɔ̂n sangal e jey.

¹⁴Bemat de be ha pyɛ́ yere yemo ano be dura wɛshɛrɛk, yɛn a sé jāma vwel de ha sé mɛn.

¹⁵Yɛn à to bare na vwel de yɛn à hàla hɛ wɛt. Ka sede yɛn à bare na hɛ, ka yɛn à yâng sɛ̀ gwong na be to ɛn vɔk e hwomo.

¹⁶Ko yɛn à vɔk cwey jāma vwel de ha dal na nerat, hɛ à vwel lagwi. Yaga ano, Dagwi à vo rekyen na yɛn a yila hɛ, à Dagwi mɛn wɛt, yaga a yong repomo yaga yɛn.

¹⁷À sè yaga Abraham à tɛ̀ gap mɛ e ra Dagwi de à nára hwey mɛ Yishak sede nɔrɔ̂ yas de be yɛt e jeng de Dagwi o à mara hɛ. Abraham à yong ɛ na a nára hwey mɛ, de ba tɔ hɛ nju hɛ zɔng, sede nɔrɔ̂ yas de be yɛt vɔk na Dagwi. À ra ano, mwa ano de Dagwi à kana sira a yɛ wɔgɔ,

¹⁸“A sé yi na Yishak de hwà rɔda sɛ̀ yére mō.”

¹⁹Abraham à tó yey mɛ wɛt wɔgɔ, Dagwi a vɔk reto na a sene mwat yi e reku. Ko ka sede wot a ha na gwɔrɔ-há — Abraham à to sey hwey mɛ Yishak yi e reku a wane.

²⁰À sè yaga Yishak à tɛ̀ gap mɛ e ra Dagwi de à tɛ̀ nerat e ra Yakɔp na Esau. À ha e ra pyɛ́ ryat de yɛn a rɔda sɛ̀ e ngamo nuyel.

²¹À sè yaga Yakɔp à tɛ̀ gap mɛ e ra Dagwi de à tɛ̀ nerat e ra kahɛ hwey wen hê Yɔsɛf gyam na a ku. E jeng o, à ye yɛndɛng e ra tɛ̂t gwele mɛ, ko à re a Dagwi fongol.

²²À sè yaga Yɔsɛf à tɛ̀ gap mɛ e ra Dagwi de à ha rehâ núsu BeIsrayɛl yi e sevwel Misra. À ha ano jeng de à sè kyè wɔ̀ ku, ko à to ha a yɛn pyɛ de yɛn a rɔda ba ra na rebek mɛ arɔng.

²³À sè yaga belɔ Mose bà tɛ̀ gap mɛn e ra Dagwi de bà lɛrɛ hɛ pɛl tat bama de bà tɔ ɛ. Yɛn à di, à sè hwey de hà sè rat e bɛrɛng, ko yaga ano, yɛn à vɔk bengyip wɛt na be gyili redu gbɔng gwɔ̀m.

²⁴À sè yaga Mose à tɛ̀ gap mɛ e ra Dagwi de à kyɛ́ ɛ ná be to tang ɛ, à hwêy hwông Gbɔng Gwɔ̀m Farawo mo jeng de a ga vey mwat.

²⁵À dal na simo a di reyɔm tanga bemât Dagwi, de a wok netâ banɛn yaga jeng tyɔng.

²⁶À di e yey mɛ, ka sede yɛ a sé pyɛ sedusa yaga rezâ Kristi, hemo ha dal a yɛ pyɛ̂ nedanerey mwa yê sevwel Misra. À di ano, yaga à tɛ̀ bayis mɛ e ra pyɔlɔ de a rɔda ba sɛ̀ e nuyel.

²⁷À sè yaga Mose à tɛ̀ gap mɛ e ra Dagwi de à hàla sevwêl Misra, ko à wok bengyip shôm gbɔng gwɔ̀m o wɛt. À sè a yɛ sede à di Dagwi de bemasi be tɔk di wɛt, ko yaga ano, à tumal ting.

²⁸À sè yaga à tɛ̀ gap mɛ e ra Dagwi de à tɛ̀ bemat be ra Nzem Gyilsit Nelɔ BeIsrayɛl. À nɔ̂ng bemat nu na be mɔmɔ nemi e ra ri duk, yaga na tom-lagwi de a vey na reku à tɔk mɔrɔ nèy negel bewen ne BeIsrayɛl wɛt.

²⁹À sè yaga BeIsrayɛl bà tɛ̀ gap mɛn e ra Dagwi de bà tɔk ye dɔ à Gbɔng Rep Swinang, sede be kyè e ra vwel de ha hworok. Ko jeng de BeMisra bà simo na be kwey ɛ̀ arɔng, nshi mo nà pere vos ɛn mwa hywiri.

³⁰À sè yaga BeIsrayɛl bà tɛ̀ gap mɛn e ra Dagwi de bejwa-pomô Yeriko bà pere gaba e bama de BeIsrayɛl bà kana gwɔsɔ vɛ nepɔlɔ netaama.

³¹À sè yaga devwes Rahap à tɛ̀ gap mɛ e ra Dagwi de à sey BeIsrayɛl, de bà wɔ̀ bɛrɛng nekanâng sevwel o, sede besa mɛ. Yaga ano, à nusu hɛ hyɔl sana wey tanga vemo de bà kyɛ́ ɛn nà gyeng hâ Dagwi.

³²Mê to gwɛ̌ ye ala arɛt? Jeng yê vey a me wɛt, na me ha e ra Gidɛyɔn, na Barak, na Samsɔn, na Yɛfta, na Davit, na Samwɛl, tanga bezarap Dagwi.

³³À sè yaga yɛn à tɛ̀ gap mɛn e ra Dagwi de bà tó como na begbɔng begwɔ̀m, ko ba re vɛ. Yɛn à gas badu e tē, ko yɛn à sey pyɛ́ de Dagwi à kana sira a yɛn e ra yɛ̄. Yɛn à bang nenu begukum,

³⁴ko yɛn à rimi nekya de nà re na gap sizɔng. Yɛn à hywit ɛn e jeng de bà simo be mɔbɔs hɛn na bewal. Yɛn à vɔk gâp rebek wɛt, ko yɛn à tɛ́ ɛn vê gap. Yɛn à sè bemât como de ba vɔk gap tyɔng wɛt, ko yɛn à ro mwa nezap bemât como beduk.

³⁵Beha behak de bà tɛ̀ gap mɛn e ra Dagwi bà to sey cáng mɛn de ba ga sene yɛ̄ na neken yi e reku. Behak arɔng bà kyɛ́ ɛn nà simo sangâl newashak mɛn, ko yɛn à kushu yi na reyɔm de bà tak a yɛn. Yɛn à simo ano, yaga na be bin sene hɛn na neken de na dal nane mo.

³⁶Bà tabas a behak nengyas, ko bà to dak ɛn na bezining; bà tɛ̀ a yɛn ngyang, na be tik ɛn e lɔ̂ ngyang.

³⁷Bà tó ɛn na beta na be mɔbɔs hɛn, bà vugus behak na be gas ɛn zang ba, ko bà mɔbɔs behak na bewal. Bemat vane mo yɛn à sè bepɛng, ko yɛn à bangas hɛn na bahwô vyēl pyɛng kɛ vyēl shi, bà kyě kyè mɛ̀. Bà nɔng ɛn rezot, ko bà teshe na yɛn naka wɛt.

³⁸Yɛn à kyě gǎ e hey tanga e beraku sede bemat de vit a hɛn na kwɔ̂n sangal. Yɛn à kyě sangsal e tara tanga e bavɔng e ji vwel. Jey yemo yà jam yaga yɛn wɛt!

³⁹Dagwi à ha há rat e ra mwa bemat vane mo, yaga yɛn à tɛ̀ gap mɛn e ra yɛ! Ko mwa ano, yɛn à sey wɛt pyɛ de Dagwi à kana sira, a rɔda nɔng ɛn.

⁴⁰Dagwi à ga yong a wot gwong o hwak de gwa dal na nerat. Ko gwong o gwà sè wɔgɔ, sɛ̌ yɛn a sé tanga wot e ngyen, na be de tɛ̀ ɛn be sila gyat e bayis mɛ.