Read berom BeIbrani 12 Bible Online

BeIbrani 12 - berom bible

BeIbrani 12

¹Ko di, wot à, wot a vɔk gbɔng regyɛng bemat de be ha wɛshɛrɛk e ra rehâ tɛ̂ gap e ra Dagwi, vemo de ba gwɔrɔ hot. Yaga ano, tik na wot a paa kayɛ pyɛ de ye gansa hot, mwa na banɛn de ba man ɛn e ra wot. Ko tik na wot a niri e ji setele de ba tɛ̀ e nuyel mot.

²Tik na wot a tɛ̀ bayis mot e ra Yɛsu. E yɛ de a wunta a wot gwông tɛ̂ gap e ra yɛ e mɛsɛng o, ko e yɛ de a rɔda kyè na wot vɔk e yɛnɛ mo arɔng. A tɛ̀, reku e ra cɔ́gɔt-kak ra sé pyɛ wɛt, mwa ano de ra sé pyɛ rekyen. A niri, yaga na a bin vɔk yey pyɛng de ba tɛ̀ e nuyel mɛ, ko a remo, a sé sangal e vwɔ yegê gwofwa negwɔm Dagwi.

³Bàre hin na Yɛsu, yɛ de a niri na repugu ves de bemât banɛn ba dura a yɛ. Bàre hin na yɛ, yaga na yin a kwon ruru kɛ yin a ye waa arɔng wɛt.

⁴A sé sede yin e tó como na neves; ko como mo ya ga wul na be shushu nemi min e ngyen wɛt.

⁵Yin a ga ye bam na rehâ Dagwi de re gwɛ̌ a yin gap arɛt? A yila hin, à nèy mɛ e jeng de a ye, “À hwey hom, hwo jut tabâk Dagwi, hwo tɛ́ mɛ̀ pyɛ neshɔngɔlɔng wɛt. Hwo kwon ye waa jeng de e gyong o wɛt.

⁶Yaga Darwey e tabak kawɛ mwat de a tɛ̀ yey na yɛ, ko e dak kawɛ mwat de a sey sede hwey mɛ.”

⁷Niri hin na reyɔm de yin e sɔ, ko séy in hɛ sede tabak. Dagwi a sé tē na yin sede nèy mɛ. E hɛ̌ hwey de dâ hɛ e tabak hɛ wɛt arɛt?

⁸Ka sede ba tabak hin wɛt, sede remo de be tabak kawɛ mwat, ko hemo he dura, yin a sé nèy de ba tɔs e ji nejwang zɔng, ko yin a sé nèy mwin o wɛt.

⁹Ko di arɔng, wot á vɔk beda mot vê jey de bá kana tabak hot, ko wot á nɔng ɛn nerey. Ano kwong, ê dal naka na wot a dyɛng bato mot na Da mot wo lagwi, yaga na wot a bin sɛ̀ neken!

¹⁰Yɛn beda mot o bá tabak hot yaga jeng tyɔng zɔng, sede yɛn á di, a sé naka na be ra ano. Ko yɛ Dagwi e tabak hot, yaga na tabak o he sɛlɛ hot, na wot a tɛ́ ot jɛrɛ sede yɛ.

¹¹E jeng de be tabak hot, neyey mot ne lashe hɛn, ko wot e vɔk yey pyɛng wɛt. E bama mo, tabak o he tɛ̀ vemo de ba ga tɔ́k ɛn na hɛ, be ra kayɛ pyɛ cik, na neyey mɛn ne dyɛng arɔng.

¹²Tik na yin a hwɔtɔ vɔ min de ba ga tɛ́ ɛn dɔshɔk! Tik na bakwot min de ba sé gbɛrɛk be to vɔk gap arɔng!

¹³Yóng in gwong cik yaga bol min, yaga na mwat de e yɔmɔng a kwon to gwɛ̌ mǎ bwol mɛ mo wɛt, ko na gwo tɛ̀ tyang e negya.

¹⁴Yē in ngyɛ́k na yin a sangal tyang na kawɛ mwat. Yē in ngyɛ́k arɔng na negwɔn min ne sè jɛrɛ, yaga vit a mwat de a rɔda di Darwey, sɛ̌ negwɔn mɛ na sé jɛrɛ.

¹⁵Tē in naka, mwat hwak a kwon bidɛ nerat Dagwi wɛt. Tē in naka arɔng, hwak a kwon tɛ́ ɛ sede cɔgɔt de ya sé kpashak, yemo de ye ras, ko nedɔ̂m yɛ ne vɛ̀sɛ na reyɔm pyak.

¹⁶Mwat hwak a kwon ra nejwang kɛ a byɛs pyɛ̂ Dagwi sede Esau wɛt, womo de à row nedanelɔ mɛ ne hwêy negel, yaga na a sɛ̀ mɛ̀ pyɛ̂ re zang hining zɔng.

¹⁷Yin a tɔk, e bama de à ra ano, à simo na da mɛ a tɛ̀ nerat e ra yɛ, ko da mɛ mo à kyɛ́ ɛ. Ko mwa ano de à jāma nɛ na nemwishil, à tɔk sɛ̀ gwong na a sege pyɛ de à kana ra wɛt.

¹⁸Yin a sé sede BeIsrayɛl vê raane wɛt. Yɛn à kana vey e Raku Sinai de bà tɔk ra wɛ. E jeng o, raku mo wà vɔk kya de hà lolo, kwɔn o hà sè hywiinin, hà to sè mwangalang tyɔng wɛt, ko jey yà to tút sede yê rop rwak.

¹⁹Bà wok fwɔ̂ durum tanga fwɔ mo hwak. Neha de fwɔ mo gwa ha nà nɔ̂ng BeIsrayɛl bengyip sizɔng, ko bà ra won wɔgɔ, yɛn e to simo be wok gwɛ wɛt.

²⁰Yɛn à ra ano, yaga yɛn à tɔk niri na redu rane wɛt de ba nɔng rɛ wɔgɔ, “Kayɛ pyɛ, ka ya ka sé yas mwa ayi, de ya ra raku mo, ko be tó yɛ na beta na ye ku.”

²¹Pyɛ de yɛn à di yà sè pyɛ bengyip sizɔng, ko Mose pyɛ mɛ à ye, “Me vow na bengyip.”

²²Ko yin à, yin a ga vey e Raku Siyɔn tanga e ji repomo Dagwi wo neken. Be tâng repomo mo, à Yɛrusalɛm wo lagwi, ko betom-lagwi gu sana basa be tula hɛn ɛ̀ na yey pyɛng.

²³Yin a vey e de tula hê nèy de nê re nedanelɔ Dagwi o, nèy nemo de ba jɛk bazâ nɛ e lagwi. Yin a vey tumal e nuyel Dagwi de e ra a bemât mwa shɔt; ko yin a vey e kwɔn begabik bemat de ba sé cik e bayîs Dagwi, vemo de a ga kana tɛ̀ ɛn be sila gyat.

²⁴Yin a ga vey na Yɛsu de a ga wuna Dagwi tanga bemat na sira e gwong pwas; ko yin a to vey vɔk e kwɔ̂n nemi mɛ de bá shushu, nemo de ne dura a wot pyɛ́ de ya dal yēmo de nemi Hɛvɛl na ga dura.

²⁵Tē in naka, yin kwon kyɛ́ in nà wok Dagwi de e ha na yin. Vemo de bà kana kyɛ́ ɛn nà wok mwat de à yi na há yi na Dagwi e ngamo e jey, yɛn à hywit ɛn wɛt. E gwɛ̌ gwong de wot a vɔk, de wot a rɔda tɔk hywit ot ɛ̀, ka sede wot e doyo a womo de e ha yi e lagwi bama arɛt?

²⁶E jeng yane mo, fwɔ̂ Dagwi gwà digis jey, ko a remo, a ga sira wɔgɔ, “Bwang zang hining zɔng, ma rɔda digis jey, ko jey zɔng wɛt ko lagwi mwa arɔng.”

²⁷Neha nemo wɔgɔ, “Bwang zang hining zɔng” ne dura, Dagwi a rɔda paa pyɛ́ de be tɔk digis yɛ̄ yi e kwɔ̂n yɛ̄, yɛ̄ à pyɛ́ de à kana yong. A rɔda ra ano, yaga na be tik ɛ̀ pyɛ́ de be tɔk digis yɛ̄ wɛt e kwɔ̂n yɛ̄ arɔng.

²⁸Ano kwong, tik na wot a feng a Dagwi, yaga wot ê sey kwɔn de wot ê re negwɔm e ra hɛ, hemo de be tɔk digis hɛ wɛt. Tik na wot a nɔng ɛ nerey, na wot a sap ɛ arɔng e jeng de wot e re a yɛ fongol e gwong de gwa jam a yɛ.

²⁹Yaga Dagwi mot a sé sede kya de he re pyɛ̂ mwa hywiri.