Read berom BeIbrani 13 Bible Online

BeIbrani 13 - berom bible

BeIbrani 13

¹Tik na yin a re nuyel na tɛ̂ yey na bemín e gwong de begwa be tɛ̀ yey na bemɛn.

²Yin ye bam nà seres bekɛnɛt e nelɔ min wɛt. Yi e gwong gwomo, behak ba ga seres betom-lagwi sana tɔ́k mɛn.

³Bàre hin na vemo de ba sé e lɔ̂ ngyang, sede yin a sé e dem hining tanga yɛn. Bàre hin na vemo de be teshe na yɛn naka wɛt, sede be teshe na yin tyɛng sede yɛn arɔng.

⁴Tik na mwa bemat be jut weneng he sè pyɛ ryey o, na kawɛ mwat a gyeng weneng mɛ naka. Yaga Dagwi a rɔda ra a vemo de be ra nejwang shɔt.

⁵Negwɔn min ne kwon sè yerê ne tɛ̂ yey na dyām wɛt, ko tik na pyɛ de yin a vɔk ye vey a yin. Yaga Dagwi a ye, “Ma rɔda sang hàla hwo, kɛ me ye waa a hwo ko tyɔng wɛt.”

⁶Yaga ano, tik na wot a vɔk yey ting, na wot a ye, “E Dagwi de a sé wo sɛlɛ hom; ma rɔda vɔk bengyip wɛt. Mwasi a tɔk ra a me sɛ́ arɛt?”

⁷Bàre hin na bemât nuyel min de bá kana ha a yin hâ Dagwi. Bàre hin na yerê sangal mɛn e ji neken nemo vɔk e reku mɛn, na yin a masa hɛn e gwong de yɛn á sey tsak o na Dagwi arɔng.

⁸Yɛsu Kristi a sé tyɛng yunung sede á sè nayos, ko e ba sè tyɛng ano nesheneshey.

⁹Yin kwon simo na be doyo yey min na nedirî bása detidetu de yin á kana tɔ́k in na nɛ wɛt. A sé naka na a sé e nerat de Dagwi e dura a wot de ne gwɛ̌ a neyey min gap, ko a sè e badu e ra pyɛ̂ re wɛt. Badu mo be tɔk sɛlɛ vemo de be raa vɛ wɛt.

¹⁰Wot a vɔk gàgbang rangâs yas vɔk na Dagwi. Ko bepiris, de be ra fwom e buk mɛ, yɛn a vɔk reto na be re pyɛ́ de be nása e ra gàgbang rangas wane mo wɛt.

¹¹Darwey bepiris o e vɛ̀sɛ na nemî yas e ji Duk Jɛrɛ Wo Jɛrɛ, e nása nɛ yaga banɛ̂n bemat. Ko be rangas babêk yas o e bamâ bǔk bemat.

¹²Pyɛ ma yemo de ya tɛ̀, Yɛsu á ku e bamâ repomo arɔng, yaga na a bin kus bemat jɛrɛ yi e banɛn mɛn na nemi mɛ.

¹³Yaga ano, tik na wot a wɔ́ na yɛ e bamâ bǔk o, na wot a wuna hot na yɛ e ji rekyên reku mɛ mo.

¹⁴Yaga e ngamo e jey, wot a vɔk repomo remot de rê nàra gbak-gbak wɛt, ko wot a sé jāma repomo de ra rɔngɔl nà vey e ngyen.

¹⁵Ano kwong, tik na wot a dopse somo Dagwi yi na Yɛsu; ko somo mot hemo mo ha rɔda sè sede nɔrɔ̂ yas de be yɛt vɔk na Dagwi. Somo mot o he yís e nenu mot de wot e ha a bemat mɛ̀ wɛshɛrɛk e ra reza mɛ.

¹⁶Yin ye bam nà ra pyɛ́ ryat wɛt, na yin a to gas pyɛ́ de yin a vɔk na behak. E yerê nenɔrɔ ma nane de ne pɛngɛ a Dagwi yey.

¹⁷Gyéng in hâ bemât nuyel min, na yin a ra pyɛ́ de be ha a yin. Yɛn a sé belek min, yaga ba rɔda tɛ̀ ɛn, na yɛn a ha a Dagwi neyɛnɛ̂ pyɛ́ de yɛn a ga ra yaga yin. Ka sede yin e gyeng há mɛn, ko yɛn a rɔda ra fwom o na yey pyɛng. Ka sede yin e gyeng hɛ wɛt, ko yɛn ê ra gwɛ na lashê yey. Ko pyɛ́ yemo ya rɔda vɔk a yin sɛlɛ hak wɛt.

¹⁸Ré in nuyel na râ won yaga wot. Wot a tɔk tsɛng-tsɛng, neyey mot na gang ot na shɔt wɛt, yaga wot e simo na wot a ra pyɛ́ de ya sé tyɛng e kayɛ jeng.

¹⁹Ko ma to sé shonong e ra yin sizɔng wɔgɔ, rá in won yaga me, yaga na Dagwi a toyo na me vey na yin dey-dey.

²⁰Me ra won na Dagwi de e tɛ̀sɛ neyey bemat ne dyɛng. Yɛ a sene Darwey mot Yɛsu yi e reku, yɛ de a sé Gbɔng Lwek Vyēl yi na nemi mɛ de a shushu e jeng reku mɛ. A sé e nemî Yɛsu mo de Dagwi a ra mɛ̀ fwom e jeng de a wuna hɛ tanga wot na sira gbak-gbak.

²¹Me ra won na Dagwi, na a nɔng in kayɛ pyɛ de ya sé ryat, yaga na yin a bin ra pyɛ́ de yɛ e simo. Tik na a ra fwom e neyey mot yi na Yɛsu Kristi, yaga na negwɔn mot ne jam a yɛ. Tik na Yɛsu Kristi mo a vɔk gbɔng nerey neshey gbak-gbak! Ano.

²²À begwa, ma sé shonong e ra yin, na yin a niri e de wet betong na há hemo de he gwɛ̌ a yin gap. A sé bwok-rwang bwit o zɔng de ma ga jɛk a yin.

²³Me simo na yin a tɔk, ba ga hàla gwa mot Timotawus yi e ngyang. Ka sede a tānga vey, ko ma rɔda ba vɔk ɛ vey e hane e jeng de me kyè vey di in.

²⁴Tang în mwa bemât nuyel min tanga mwa bemât Dagwi show. Besa mot vê Italya be tang in show arɔng.

²⁵Tik na Dagwi a dura a yin mwa nerat mɛ.