Read berom BeIbrani 2 Bible Online

BeIbrani 2 - berom bible

BeIbrani 2

¹Yaga ano, a sé gbing-gbing na wot a gwɛ̌ tɛ̀ nehywɛ mot e ra neha nemo de wot a ga wok, yaga na wot a kwon kyè kpɛɛ zɔng wɛt.

²Wot a di, há de betom-lagwi bà kana ha a bedabeda mot hà sè tsak o. Bà tabak kawɛ mwat de à raa hɛ wɛt, kɛ à gyeng há mɛ arɔng wɛt na tabak de hà sè tyɛng yaga yɛ.

³Ka à kana sè ano, ko yi e rɛ̌ de wot a rɔda hywit ot, sede wot e tē shɔngɔlɔng na gbɔng fwom de Dagwi a ra na a sey neken mot arɛt? Á sè e Darwey pyɛ mɛ de á tānga ha a bemat rehâ gwông sêy neken nane mo. Ko mwa vemo de bá wok há mɛ mo bá dura a wot tsɛng-tsɛng, ha sé tsak o.

⁴Dagwi arɔng á gwɛ̌ nuha mɛ e ra mɛ́n o yi na ragâs pyɛ̂ langat na pyɛ̂ bes detidetu, ko a to kyě nɔngɔ̂s bemat nenɔrɔ̂ Gabik Jɛrɛ tyɛng na pyɛ de a simo.

⁵A sé e betom-lagwi wɛt de Dagwi a ga tɛ̀, be re negwɔm e ra jey de ye kyè vey, yemo de wot a sé ha e ra yɛ.

⁶Ko a sé sede remo de bà jɛk e kwɔn hak e Bwok-basa Dagwi wɔgɔ, “À Dagwi, mwasi a sé sɛ́ de hwó bare na yɛ arɛt? Yɛ a sé sɛ́ de hwó bɛrɛng hɛ naka arɛt?

⁷Hwá yong ɛ, na a radɛ betom-lagwi yaga kejeng tyɔng; e bama mo, hwá nɔng ɛ gbɔng nerat na nerey yerê nemo de be nɔ̂ng gbɔng gwɔ̀m,

⁸ko hwá tɛ̀ ɛ, a re negwɔm e ra pyɛ̂ mwa.” Bà ye, Dagwi a tɛ̀ mwasi “a re negwɔm e ra pyɛ̂ mwa.” Hemo he dura, vit a pyɛ de e tik nà re negwɔm e ra yɛ. Ko mwa ano, a remo wot a di, mwasi e re negwɔm e ra kayɛ pyɛ e ngyen wɛt.

⁹Ko wot e di pyɛ yemo ngan: Dagwi á kana tɛ̀ Yɛsu a radɛ betom-lagwi yaga kejeng tyɔng. Á ra ano, yaga na, yi na nerât Dagwi, Yɛsu á ku yaga bemasî mwa. Ko a remo, wot e di Yɛsu de Dagwi a nɔng ɛ gbɔng nerat na nerey yere nemo de be nɔ̂ng gbɔng gwɔ̀m, yaga á sɔ reyɔm, ko á ku.

¹⁰A sé e Dagwi de à yong pyɛ̂ mwa, ko à yong yɛ̄ yaga tó mɛ arɔng. Yaga ano, a jam na a tɛ̀ Yɛsu a sila gyat yi na reyɔm rane mo. A ra ano, yaga na Yɛsu mo a bin tɛ̀ bemat pyak be tɛ́ ɛn nèy mɛ, na a nɔng nɛ numo mɛn hê gbɔng nerat mɛ. Yaga a sé e Yɛsu de e kyɔkɔs hɛn, na be sey neken mɛn.

¹¹Yɛ e tɛ̀sɛ bemat jɛrɛ yi e banɛn mɛn, ko yɛ tanga vemo de be tɛ̀sɛ hɛn jɛrɛ mo yɛn a vɔk Da gwining o. Pyɛ ma yemo de ya tɛ̀, Yɛsu a vo rekyen wɛt, na a tang ɛn, à begwa mɛ.

¹²Ko a yâng Dagwi, “Ma rɔda ha a begwa hom e ra hwo, ko ma rɔda somo hwo e kwɔ̂n tula mɛn.”

¹³A to ye, “Ma rɔda ye yɛndɛng e ra Dagwi.” Ko a to ye, “Di, me a womo tanga nèy de Dagwi a ga nɔng me.”

¹⁴Sede remo de nèy o na sé bemasi vê renama tanga nemi, Yɛsu pyɛ mɛ a tɛ́ ɛ mwasi sede nɛ. A ra ano, yaga na, yi e reku mɛ, a tɔk wey na gwɔ̀m cēng de a vɔk reto e ra reku.

¹⁵E gwong gwomo, a vibis washak vemo de bá kana sè besam, yaga yɛn a vɔk bengyip reku yimo tɔs mɛn.

¹⁶A sé wɛshɛrɛk, a sé e betom-lagwi de e sɛlsɛ vɛ wɛt, ko e sɛlsɛ yére Abraham.

¹⁷Yaga ano, á sè gbing-gbing na a tɛ́ ɛ sede begwa mɛ e kagwɛ gwong. Yi ano, á tɔk sè darwêy bepiris, de e tosho reyɔ̂m bemat e ji fwom mɛ, womo de be tó yey na yɛ arɔng wɛt, yaga na a tɔk hashe a bemat banɛn mɛn.

¹⁸Yaga yɛ pyɛ mɛ á di reyɔm e jeng de bá tɔgɔs hɛ, ko a remo yɛ e tɔk sɛlɛ vemo de be tɔgɔs hɛn.