Read berom BeIbrani 3 Bible Online

BeIbrani 3 - berom bible

BeIbrani 3

¹À begwa, Dagwi a tik in jaram na yin a sè bemɛ, ko a ga yila hin na yin a sɛ̀ numo min e lagwi arɔng. Yaga ano, bàre hin na Yɛsu, de Dagwi a tomo na a sè darwêy bepiris mɛ, e yɛ de wot e ha wɛshɛrɛk e ra yɛ wɔgɔ, a sé darwêy bepiris mwot.

²Dagwi a kasa hɛ na a ra fwom o, ko a ra gwɛ e gwong de Dagwi o a tó yey na yɛ wɛt, tyɛng sede remo de Mose arɔng à kana ra fwom mɛ e gwong de bà tó yey na yɛ wɛt. Fwom mɛ mo gwà sè yaga bemât Dagwi mwa.

³Yɛsu a vey na be nɔng ɛ nerey de na dal ne Mose sizɔng, sede remo de mwat de e lɔk lɔ e sɛ̀ nerey de na dal ne lɔ mo.

⁴Kahɛ lɔ ha vɔk mwat de a lɔk hɛ, ko womo de a lɔk pyɛ̂ mwa, yɛ à Dagwi.

⁵Mose à kana sè mwât fwom yaga mwa bemât Dagwi, ko à ra fwom o e gwong de bà tó yey na yɛ wɛt. Yɛ à ha há e ra pyɛ́ de Dagwi a rɔda ba ha e jeng de ye kyè vey.

⁶Ko Kristi a sé Hwey de ha vɔk reto e ra bemât Dagwi, ko yɛ arɔng e rá fwom mɛ e gwong de be tó yey na yɛ wɛt. E wot de wot a sé bemat mɛ, ka sede wot e re nuyel na vɔ̂k yey ting, na wot a to sangal sana sap pyɛ cak e de gyêng pyɛ́ de wot a sɛt yey mot e ra yɛ̄.

⁷Sede remo de Dagwi a ye e nû Gabik Jɛrɛ wɔgɔ, “Yunung, ka sede yin a wok fwɔ hom,

⁸yin sè gbàrak wɛt, sede remo de bedabeda min bà kana sè gbàrak jeng de yɛn à ra retek na me. À sè e tuk hane mo e hey de yɛn à mara me.

⁹Yɛn à mara me, ko bà to mɔktɔ me e kwɔn hane mo, mwa ano de yɛn à kana di pyɛ́ de mà ra e neshey kuru banaas.

¹⁰Ko yaga ano, mà tɛ̀ shom na bemat vane mo, ko mà ye, ‘Báre mɛn he kyè kpɛɛ yi na me, ko yɛn a tɔk begwong hom wɛt.’

¹¹Mà tɛ̀ shom na yɛn, ko mà sira wɔgɔ, ‘Yɛn a rɔda kyɛm be yel e kwɔn de be pɔng ɛ̀ tanga me ko tyɔng wɛt!’ ”

¹²À begwa, tē in naka, hwak e ji min a kwon vɔk yey vyes de ye kyɛ́ ɛ nà sey tsak o. A sé e hemo de he tɛ̀ ɛ, a ye rɛng yi e gwông Dagwi wo neken.

¹³Ko tik na yin a gwɛ̌ a bemin gap kahɛ tuk, sede remo de jeng de be tâng yɛ, à Yunung ya rɔngɔl. Yi ano, yin ê dul hwak e ji min nà tɛ́ ɛ gbàrak, yaga renɛn ra kwɛlɛng hɛ.

¹⁴Wot a vɔk numo mot e ji kayɛ pyɛ de Kristi a vɔk, ka sede wot a kaba na gap vɔk e yɛnɛ mo pyɛ́ de wot a tɛ̀ gap mot e ra yɛ̄ yi e mɛsɛng o.

¹⁵Pyɛ ma yemo de bà jɛk e Bwok-basa Dagwi wɔgɔ, “Yunung, ka sede yin a wok fwɔ̂ Dagwi, yin sè gbàrak wɛt, sede remo de bedabeda min bà kana sè gbàrak jeng de yɛn à ra retek na Dagwi.”

¹⁶E vɛ̌ bemat de bà kana wok fwɔ̂ Dagwi, ko bà ra retek na yɛ arɛt? À sè e mwa vemo de Mose à pat ɛn yi e sevwêl Misra.

¹⁷E beva de Dagwi à vɔk shom na yɛn neshey kuru banaas (40) arɛt? À sè na bemat de bà ra banɛn, vemo de bà kushu, ko bavin mɛn bà sè kpɛɛ e hey.

¹⁸Jeng de Dagwi à sira wɔgɔ, yɛn a rɔda kyɛm be yel e kwɔn de be pɔng ɛ̀ tanga yɛ ko tyɔng wɛt, à sè ha e ra beva arɛt? À sè e ra vemo de bà kyɛ́ ɛn nà gyeng há mɛ.

¹⁹Yaga ano, wot a di, yɛn à tɔk yel e kwɔn o wɛt, yaga yɛn à sey tsak o na hâ Dagwi wɛt.