Read berom BeIbrani 4 Bible Online

BeIbrani 4 - berom bible

BeIbrani 4

¹Dagwi a ga sira a wot, wot ê yel e kwɔn de wot ê pɔng ɛ̀ tanga yɛ. Yaga ano, tik na wot a tē naka, be kwon sɛ̀ hwak e ji min de a radɛ nà sey pɔngɔ mo.

²Yaga wot arɔng wot a ga wok Yɛgɛt Yat, tyɛng sede remo de bedabeda mot bà kana wok yɛ̄. Yɛn à wok há mo, ko hà vɔk sɛlɛ yaga yɛn wɛt, yaga jeng de yɛn à wok hɛ, yɛn à sey tsak o na hɛ wɛt.

³Ko wot de wot a sey tsak o na há mo, wot e sey pɔngɔ hane mo. A sé tyɛng sede remo de Dagwi à ye, “Mà tɛ̀ shom na yɛn, ko mà ha na sirâ mwin wɔgɔ, ‘Yɛn a rɔda kyɛm be yel e kwɔn de be pɔng ɛ̀ tanga me ko tyɔng wɛt!’ ” À ha ano, mwa ano de fwom mɛ gwà kana tala hɛ yimo e jeng de à yong jey.

⁴Yaga e kwɔn hak e Bwok-basa Dagwi bà jɛk e ra tuk hê taama wɔgɔ, “Dagwi a pɔnglɔ e tuk hê taama yi e kagwɛ fwom mɛ.”

⁵Ko bà to ha e ra há hining hemo mo wɔgɔ, “Yɛn a rɔda kyɛm be yel e kwɔn de be pɔng ɛ̀ tanga me ko tyɔng wɛt!”

⁶Vemo de bà tānga wok Yɛgɛt Yat bà sey pɔngɔ hane mo wɛt, yaga yɛn à kyɛ́ ɛn nà gyeng yɛ̄. Ko behak ba sɛ́ de be simo a yɛn na yɛn a sey pɔngɔ mo.

⁷Yaga ano, Dagwi a tɛ̀ tuk hak de be tâng hɛ, à Yunung. E bama de neshey pyak na kwey, à to ha e ra tuk hane mo e nû Davit neha de wot á kana jɛk wɔgɔ, “Yunung, ka sede yin a wok fwɔ̂ Dagwi, yin sè gbàrak wɛt!”

⁸Ka sede Yɔshuwa à kana nɔ̂ng bemat o pɔngɔ mo, ka Dagwi à yâng to ha e bama mo e ra tuk hak wɛt.

⁹Hemo ha dura, bwang jeng ya sɛ́ de bemât Dagwi bê sɛ̀ pɔngɔ, sede remo de Dagwi à pɔng e tuk hê taama arɔng.

¹⁰Yaga kawɛ mwat de e yel e kwɔn de be pɔng ɛ̀ tanga Dagwi a rɔda pɔng yi e fwom mɛ, tyɛng sede remo de Dagwi à pɔng yi e mwɛ́ arɔng.

¹¹Yaga ano, tik na wot a ye ngyɛ́k, na wot a sey pɔngɔ mo. Mwat hwak e ji mot a kwon bidɛ hɛ, sede remo de bedabeda mot ba bidɛ, yaga yɛn à kyɛ́ ɛn nà gyeng hâ Dagwi.

¹²Hâ Dagwi ha sé ken, ko he to ra fwom naka. Ha dal wal de wa vɔk bak bà na nevootot, ko wo yɛt mwa pere wɔ̀ pat vɔk e kwɔn de neken na gabik ba man ɛ̀ tanga vɔk e kwɔn de bagâp rebek na sɔrɔng ba man ɛ̀ arɔng. He ra a cwey pyɛ́ tanga báre de mwasi a vɔk e yey mɛ shɔt.

¹³Vit a pyɛ cak de be tɔk lɛrɛ a Dagwi. Kayɛ pyɛ e ji pyɛ́ de ba yong mwa yā sé dɛdɛrɛng, yā to sé e wunta pyot e nuyêl bayis mɛ. E yɛ̀ wɛ de wot a rɔda nɔng ɛ yɛnɛ̂ pyɛ́ de wot a ga ra.

¹⁴Yaga ano, tik na wot a vɔk na gap pyɛ́ de wot a sey tsak o na yɛ̄, yēmo de wot e ha a bemat e ra yɛ̄ wɛshɛrɛk. Yaga wot a vɔk darwêy bepiris de a dal na nerey, womo de a ga wɔ e nuyêl Dagwi, yɛ Yɛsu, Hwey Dagwi.

¹⁵Wot a vɔk darwêy bepiris o womo de e kyɛm a wok nemwishish mot jeng de wot e radɛ hot ná gap e begwong detidetu. Yaga yɛ á kana sè sede wot, bá tɔgɔs hɛ e kagwɛ gwong, ko mwa ano, á ra renɛn wɛt.

¹⁶Yaga ano, tik na wot a vɔk yey ting, na wot a vey bagat e nuyêl gwofwa negwɔm Dagwi, e kwɔn de e nɔngɔ̂s bemat nerat mɛ. E kwɔn a hane de a rɔda tosho reyɔm mot, ko a rɔda dura a wot nerat mɛ, na a sɛlɛ hot e jeng de wot e simo hɛ.