Read berom BeIbrani 5 Bible Online

BeIbrani 5 - berom bible

BeIbrani 5

¹Bé kasa kawɛ darwêy bepiris yi e ji bemasi. Be tɛ̀ ɛ na a ra a Dagwi fwom e tô bemɛn, yaga na a bin nása nenɔrɔ detidetu tanga nenɔrɔ̂ yas de be yɛt vɔk na Dagwi yaga banɛn mɛn.

²Sede remo de yɛ pyɛ mɛ a sé gbɛrɛk e begwong detidetu, ko e tɔk ra hywɛ na vemo de be ra pyɛ́ sana tɔ́k mɛn, de be to kyě buru arɔng.

³Ko yaga yɛ a sé gbɛrɛk ano, a sé gbing-gbing na a nása nenɔrɔ̂ yas de be yɛt vɔk na Dagwi yaga banɛn mɛ arɔng, mwa na vê bemat.

⁴Vit a mwat de e jāma a tó mɛ nerey na a sè darwêy bepiris. A sé yi na yíla Dagwi zɔng de be tɛ̀ mwat a sè darwêy bepiris mɛ tyɛng sede remo de à kana yila Aharon.

⁵Á sè tyɛng ano arɔng na Kristi, de á jut a tó mɛ nerey na a sè darwêy bepiris wɛt. Ko Dagwi á kana yang ɛ, “Hwà sé Hwey hom, yunung ma ga tɛ́ me Da mō.”

⁶Ko a to ye e kwɔn hak, “Hwà rɔda sè piris gbak-gbak yi e ji gwông rê nedanelɔ Mɛlkisɛdɛk.”

⁷E jeng de Yɛsu á sangal e jey, á ra nerosol na newon mɛ na gbɔng sesin tanga nemwishil vɔk na Dagwi de á tɔk sey ɛ yi e reku. Ko Dagwi á wok ɛ, yaga Yɛsu á sap ɛ.

⁸Mwa ano de á sè Hwey Dagwi, ko á masa gyêng há yi na reyɔm de á di.

⁹Jeng de ba tɛ̀ ɛ a sila gyat, a tɛ́ ɛ womo de e tɔk sey mwa vemo de be gyeng há mɛ, na be sɛ̀ neken gbak-gbak.

¹⁰Ko Dagwi a tɛ̀ ɛ a sè darwêy bepiris mɛ yi e gwông rê nedanelɔ Mɛlkisɛdɛk.

¹¹Pyɛ́ ya sé pyak de wot e simo ha a yin yɛ̄ e ra há hemo, ko a sé gbang na be misang a yin yɛ̄, yaga yin e tɔk pyɛ́ dey wɛt.

¹²Jeng a yemo de ya sé naka na yin a yâng sè bemât basa a behak. Ko mwa ano, yin e rɔɔ jāma mwat hwak a basa a yin pyɛ́ yê susu mo yê rehâ Dagwi. A yâng jam ka yin a sé re pyɛ́ tying, ko yin a sé rɔngɔl sɔ nevasal zɔng!

¹³Kawɛ mwat de e simo a sɔ nevasal a rɔngɔl hwey sɛl e ngyen, ko a tɔ́k ɛ na gâs pyɛ́ de ya sé cik na yēmo de ya sé cik wɛt.

¹⁴Ko pyɛ̂ re de ya sé tying ya sé yaga bemat de ba ga vey, vemo de ba ga masa a bato mɛn yi na râ pyɛ́ yane, na yɛn a tɔk gas pyɛ́ de ya sé ryat na yēmo de ya sé vyes.