Read berom BeIbrani 6 Bible Online

BeIbrani 6 - berom bible

BeIbrani 6

¹Yaga ano, tik na wot a tik e bama reha pyɛ́ yê susu mo de wot a tānga masa e ra Kristi, na wot a re nuyel vɔk e bása hê bemat de ba ga vey naka e gwông raa. Wot e simo na wot a to basa bása hê mɛsɛng o wɛt wɔgɔ: Há e ra doyo yi e râ pyɛ́ de ye vɛ̀sɛ na reku na há e ra sêy tsak o na Dagwi;

²há e ra begwông tɛ́sɛ batisma detidetu, na há e ra tɛ́sɛ vɔ e ra batô bemat; há e ra sensa bemat yi e reku tanga há e ra shɔt ye yɛnɛ mo.

³Tik na wot a re nuyel! A sé e pyɛ ma yemo de wot a rɔda ra, ka sede Dagwi a simo.

⁴Yi e rɛ̌ de vemo de bê doyo yi na Dagwi ba rɔda tɔk to vey, na yɛn a to doyo yi e banɛn mɛn arɛt? Yɛn á kana sè e ji negbêy Dagwi, yɛn á kana wok netâ nɔrɔ de he yi e lagwi, ko yɛn á kana sɛ̀ Gabik Jɛrɛ sede bemat-raa behak arɔng.

⁵Yi e begwong sangal mɛn, yɛn á kana tɔk, rehâ Dagwi ra sé naka, ko yɛn á kana di reto rê jey de ye kyè vey.

⁶Ko e bama mo, yɛn á doyo yi na Dagwi! Ba rɔda kyɛm na be to vey na yɛn ko tyɔng wɛt, na yɛn a doyo yi e banɛn mɛn, yaga yɛn a to sé kak Hwey Dagwi e ra cɔ́gɔt, ko yɛn a to sé tɛ̀ a yɛ rekyen e nuyel bemat.

⁷Dagwi e tɛ̀sɛ nerat e ra vwel de he sɔ nshî rwak de ne sǎ e de rop e ra hɛ, ko he tɛ̀sɛ pyɛ́ de ya vɔk sɛlɛ yaga bemât hôw hɛ arɔng.

⁸Ko ka sede serɔgɔ tanga jaal zɔng be tabas e vwel o, ko ha vɔk nerât pyɛ cak wɛt. Dagwi a vey bagât dùsa hɛ, ko e yɛnɛ mo ba rɔda rangas hɛ na kya.

⁹A besâ yey hom, mwa ano de wot a ka ha ano, ko wot a tɔk tsɛng-tsɛng e ra yin wɔgɔ, yin e raa pyɛ́ de ya dal na nerat, yēmo de ye dura a yin gwông sêy neken min.

¹⁰Dagwi a sé mwat de e tik nà gas badu e tē wɛt. A rɔda ye bam à fwom de yin a ga ra wɛt. Yin a sɛlɛ besa min bemat-raa, ko yin a sé rɔngɔl re nuyel na sɛlɛ mɛn a remo. Yi ano, yin e dura tɛ̂ yey min vɔk na yɛ.

¹¹Pyɛ de wot a vɔk cwey yɛ ya sé wɔgɔ: Kawɛ e ji min a re nuyel na ye ngyɛ́k e ji pyɛ́ yemo pere vɔk e yɛnɛ mo, yaga na yin a sey kayɛ pyɛ de yin a sɛt yey min e ra yɛ.

¹²Wot e simo yin a sè beriri wɛt. Ko masa hin vemo de be sey tsak o, na be to niri. Ano kwong, yɛn a rɔda sey pyɛ́ de Dagwi a ga sira a yɛn e ra yɛ̄.

¹³Jeng de Dagwi à kana sira a Abraham wɔgɔ, a rɔda nɔng ɛ pyɛ cak, à sira na reza mɛ pyɛ mɛ. À ra ano, yaga vit a mwat hwak de a dal ɛ de a rɔda sira hɛ na yɛ.

¹⁴À ye, “Mwin, ma rɔda tɛ̀ nerat e ra hwo, ko ma rɔda to nɔng o yére pyak.”

¹⁵Abraham à niri, ko yaga ano, à sey pyɛ́ de Dagwi à kana ha a yɛ e ra yɛ̄ mo.

¹⁶Jeng de bemat be sira e ra pyɛ cak, ko be vo rezâ mwat hwak de a dal ɛn na nerey. Sira hane mo he dura, pyɛ de ba ga kana ha ya sé tyɛng, ko he dul tô cuna e ra pyɛ mo.

¹⁷Dagwi à simo na a dura wɛshɛrɛk a yɛn vemo de ba rɔda sey pyɛ́ mo wɔgɔ, a rɔda sege pyɛ de a ga kana yong ɛ̀ ko tyɔng wɛt. Yaga ano, à gwɛ̌ há mɛ e ra pyɛ́ de a rɔda nɔ̂ng bemat na sira mɛ.

¹⁸Dagwi a ra fwom na pyɛ́ bya yemo de be tɔk sege yɛ̄ wɛt, ko e tɔk vɛ́ bɔs e ra yɛ̄ arɔng wɛt. Yaga ano, wot vemo de wot a ga sɛ̀ kwɔ̂n lɛrɛ mot na Dagwi, wot a vɔk yey ting, na wot a kaba gak pyɛ́ de wot e sɛt yey mot e ra yɛ̄ na wot a sɛ̀ yɛ̄, yēmo de Dagwi a ga tɛ̀ e nuyel mot.

¹⁹Pyɛ́ mo de wot e sɛt yey e ra yɛ̄ ya vɔk neken mot gak, yaga na wot a tumal ting. Pyɛ́ ma yemo de ye tɛ̀, wot e kwey gworugû bâng rwi duk de be gas mɛ̀ Gbɔng Duk Re Fongol wo lagwi tanga kwɔ̂n sangâl Dagwi hê jɛrɛ de ha sé e ji mo.

²⁰Yɛsu a ga tānga wɔ e kwɔn hane mo e to mot, yaga a ga tɛ́ ɛ darwêy bepiris gbak-gbak yi e ji gwông rê nedanelɔ Mɛlkisɛdɛk.