Read berom BeIbrani 7 Bible Online

BeIbrani 7 - berom bible

BeIbrani 7

¹Yɛ Mɛlkisɛdɛk à sè gbɔng gwɔ̀m Salem, ko à to sè piris Dagwi De A Dal Na Reto Mwa. Jeng de Abraham à sè toyo yi e de como de à re begbɔng begwɔ̀m benaas, Mɛlkisɛdɛk à wɔ̀ man na yɛ, ko à tɛ̀ nerat e ra yɛ.

²Ko Abraham à nɔng ɛ pyɔlɔ̂ pyɛ jining e ji pyɛ́ kuru yi e kayɛ pyɛ de à sey ɛ̀. Cap rezâ Mɛlkisɛdɛk o yɛ à, “Gbɔng gwɔ̀m de a sé cik e bayîs Dagwi.” Ko sede remo de à sè gbɔng gwɔ̀m Salem, cap reza mɛ mo ya to sé wɔgɔ, “Gbɔng gwɔ̀m de e tɛ̀sɛ bemat be sangal tyang na bemɛn.”

³Ba sɛ̀ há hak e ra da kɛ neng Mɛlkisɛdɛk o wɛt, ko ba tɔk pyɛ cak e ra yere mɛ wɛt; ba sɛ̀ pyɛ cak e ra jeng tɔ́ mɛ kɛ e ra reku mɛ arɔng wɛt. Yɛ a sé sede Hwey Dagwi; yɛ e nàra piris nesheneshey.

⁴Di in yere nerey de Mɛlkisɛdɛk à vɔk: Gbɔng yere mot Abraham à nɔng ɛ pyɔlɔ̂ pyɛ jining e ji pyɛ́ kuru de à sey ɛ̀ e de como!

⁵E ji Badu Mose, ba nɔ̂ng mwa yere Levi yemo de ya sé bepiris nu, yɛn a tula pyɔlɔ̂ pyɛ jining e ji pyɛ́ kuru yi e pyɛ̂ mwa yê BeIsrayɛl. Hemo ha dura, yɛn a seres pyɛ́ mo yi na begwa mɛn a wane, mwa ano de begwa mɛn o ba sé yere Abraham arɔng.

⁶Ko Mɛlkisɛdɛk à sè yi e yere Levi wɛt, ko mwa ano, à sey pyɔlɔ̂ pyɛ jining e ji pyɛ́ kuru yi na Abraham. À tɛ̀ nerat e ra yɛ arɔng, yɛ de Dagwi à kana sira a yɛ zang pyak e ra pyɛ́ de a rɔda nɔng ɛ.

⁷Wot a tɔk tsɛng-tsɛng, mwat de e tɛ̀ nerat e ra mwat hwak a dal womo de e tɛ̀ a yɛ nerat o na nerey.

⁸E rà rehâ bepiris à — a sé e bemat de ba rɔda kushu de be seres pyɔlɔ̂ pyɛ jining e ji pyɛ́ kuru mo. Ko e rà rehâ Mɛlkisɛdɛk à — a sé e mwat de a rɔngɔl na neken de à sey pyɔlɔ mo, sede remo de bà ga jɛk e Bwok-basa Dagwi.

⁹Ko jeng de Abraham à tala pyɔlɔ̂ jining e ji pyɛ́ kuru mo, à sè sede Levi à tala yɛ̄ arɔng, mwa ano de a sé e yére mɛ de ye seres pyɔlɔ mo yi na bemat a remo.

¹⁰Wot e tɔk ha ano, yaga jeng de Mɛlkisɛdɛk à wɔ̀ man na Abraham, bà kana tɔ Levi e ngyen wɛt, ko à sè e ji yere Abraham.

¹¹A sé yi na bása de he dura, a sé e belɔ Levi zɔng de ba rɔda ra fwom bepiris, de Dagwi a nɔ̂ng BeIsrayɛl Badu mɛ. Ka sede fwom mɛn o gwa sila pyɛ de Dagwi a simo, ka bá yâng to simo na be tɛ̀ yerê piris o hwak wɛt, womo de a rɔda re nedanelɔ Mɛlkisɛdɛk, yaga yerê vemo de be re nedanelɔ Aharon bá yâng vey zɔng.

¹²Ko ka sede be sege yere de ye ra fwom bepiris, a rɔda sè gbing-gbing na be sege badu mo arɔng.

¹³Darwey mot de ba sé ha há hemo e ra yɛ á sè yi e yere dyuk o. Ko vit a mwat hwak e yere yane mo de a ga sang ra fwôm piris e kwɔn de be rangas ɛ̀ yas vɔk na Dagwi.

¹⁴Ba tɔk tsɛng-tsɛng, bá tɔ Darwey mot o e yere Yuda. Ko jeng de Mose à sè ha e ra bepiris, à ha pyɛ cak e ra yere yane mo wɛt.

¹⁵Ha de ha tɛ̀ pyɛ́ mo mwa ya gwɛ tɛ́ ɛ wɛshɛrɛk a hemo ngan: Piris hwak duk o a ga nusu womo de a sé sede Mɛlkisɛdɛk.

¹⁶Ba tɛ̀ ɛ, á sè piris yi na badu kɛ negwɔn bemasi wɛt, ko á sè yi na retô neken yere nemo de be tɔk wey na nɛ wɛt.

¹⁷Yaga bà jɛk e Bwok-basa Dagwi wɔgɔ, “Hwà rɔda sè piris nesheneshey yi e gwông rê nedanelɔ Mɛlkisɛdɛk.”

¹⁸Dagwi a ga hàla redu reroso mo, yaga ra radɛ, ko ra vɔk sɛlɛ wɛt.

¹⁹Yaga Badu Mose bà tɔk tɛ̀ bemat be sila gyat wɛt. Ko a remo, Dagwi a vey na pyɛ cak de ya dal ye raane, ko wot e sɛt yey mot e ra yɛ, yaga na wot a bin vey bagat na Dagwi.

²⁰Sirâ Dagwi ha to sɛ́ arɔng. Ko ba sira ano wɛt e jeng de ba tɛ̀ belɔ Levi be sè bepiris.

²¹Ko Yɛsu a tɛ́ ɛ piris yi na sira jeng de Dagwi a yang ɛ, “Darwey a ga sira, ko a rɔda to sege yey mɛ wɛt; a ye, ‘Hwà rɔda sè piris nesheneshey.’ ”

²²A sé yi na sira mo de Yɛsu a tɛ́ ɛ mwat de a tumal sede wo nuha e ra pyɛ mo ngan: Dagwi a wuna hɛ́ tanga wot na sira, ko wuna-na-sira mo ha dal na nerat.

²³Ko pyɛ cak ya to sé detu gbak, ya sé wɔgɔ: Bepiris ve raane mo bà sè pyak yaga yɛn a kushu, ko yi ano, yɛn à tɔk re nuyel na fwom mɛn o wɛt.

²⁴Ko Yɛsu a sé kwen gbak-gbak; yaga ano, vit a mwat hwak duk o de a rɔda jut fwom mɛ gwô piris o.

²⁵Yaga ano, e tɔk sey mwa vemo de be vey na Dagwi yi na yɛ a remo tanga kayɛ jeng, yaga a sé kwen nesheneshey na a bin ra won na Dagwi yaga yɛn.

²⁶A sé e Yɛsu de a sé darwêy bepiris de a jam na pyɛ de wot e simo. Yɛ a sé jɛrɛ, ko a vɔk renɛn kɛ pyɛ cak vyes e ji mɛ wɛt; Dagwi a ga tik ɛ jɛrɛ yi na bemât banɛn, ko a jut ɛ e rak o e ra tɛ̂t belagwi.

²⁷Yɛ a sé sede bedarwêy bepiris behak wɛt. Bé ka jāma a yɛ wɛt na a nása nenɔrɔ̂ yas de be yɛt vɔk na Dagwi kahɛ tuk yaga banɛn mɛ pyɛ mɛ e ngyen tanga yaga banɛ̂n bwang bemat arɔng. Yɛ á nára nɔrɔ̂ yas de be yɛt vɔk na Dagwi zang hining zɔng ko he pere vey yaga mwa jeng. Á ra ano e jeng de á nára nɔrɔ̂ tó mɛ.

²⁸A sé yi e gwông Badu Mose de be tɛ̀ bemat de ba sé gbɛrɛk e begwong detidetu be sè bedarwêy bepiris. Ko jeng de Dagwi à ra sira de ha jut kwɔ̂n Badu vane mo, à tɛ̀ Hwey mɛ de ba ga tɛ̀ he sila gyat gbak-gbak, na he sè darwêy bepiris mɛ.