Read berom BeIbrani 8 Bible Online

BeIbrani 8 - berom bible

BeIbrani 8

¹Tô pyɛ de wot a sé ha e ra hɛ ha sé ngan: Wot a vɔk yerê darwêy bepiris wane mo, ko e sangal e lagwi e vwɔ yegê gwofwa negwɔm Dagwi De A Vɔk Reto Mwa de a dal na nerey.

²Yɛ e ra fwôm darwêy bepiris e kwɔ̂n jɛrɛ wɔgɔ, e buk gwô tsak o gwomo de Darwey pyɛ mɛ à yong ko e mwasi wɛt.

³Be tɛ̀ kawɛ darwêy bepiris na a nása nenɔrɔ detidetu tanga nenɔrɔ̂ yas de be yɛt vɔk na Dagwi. Yaga ano, a sé gbing-gbing na darwêy bepiris o mwot a vɔk pyɛ cak na a bin nára yɛ arɔng.

⁴Ka a sé e jey, ka a yâng sè piris wɛt, yaga bepiris o ba sɛ́ vemo de be nása nenɔrɔ tyɛng na pyɛ de be simo e ji Badu BeYuda.

⁵Yɛn e ra fwom mɛn e Kwɔ̂n Jɛrɛ de ha sé sede rezina zɔng rê hemo de ha sé e lagwi. A sé tyɛng na pyɛ de yà té na Mose. Jeng de à sè kyè wɔ̀ lɔk bûk Dagwi, Dagwi o à yang ɛ, “Tē naka, na hwo yong kayɛ pyɛ tyɛng na yerê lɔ́k de bá dura a hwo e ra raku mo.”

⁶Ko wot a di, ba ga nɔ̂ng Yɛsu fwôm piris de gwa dal mwɛ́n na nerey. Ano arɔng, Yɛsu a wuna Dagwi tanga bemat na sira, ko wuna-na-sira mo ha dal roso mo na nerey. Hemo ha sé ano, yaga pyɛ́ de Dagwi à kana sira e ra yɛ̄ ya dal na nerey, ko e yɛ̄ de ya sé retîs wuna-na-sira hane mo.

⁷Ka wuna-na-sira hê mɛsɛng o hà kana vɔk buru hak e ji hɛ wɛt, ka bà yâng to simo be ra wuna-na-sira hê neba wɛt.

⁸Ko Dagwi à di buru hak e ji bemat mɛ, ko à ye, “E me Darwey de me tē: Jeng ya sé kyè vey de ma rɔda wuna me na sira e gwong pwas tanga BeIsrayɛl na yerê Yuda.

⁹Ha rɔda sè sede wuna-na-sira de mà kana ra na bedabeda mɛn wɛt e tuk de ma jut ɛn na vwɔ, na me kyè na yɛn yi e sevwêl Misra. Yɛn à gyeng wuna-na-sira mo de mà ra na yɛn wɛt, yaga ano, mà tɛ̀ tong e ra yɛn wɛt. E me Darwey de me ha ano.

¹⁰Di, ma rɔda wuna me tanga BeIsrayɛl na sira hemo e jeng de ye kyè vey. E me Darwey de me tē: Ma rɔda tɛ̀ badu hom e báre mɛn, ko ma rɔda jɛk vɛ e ra neyey mɛn arɔng. Ma rɔda sè Dagwi mɛn, ko yɛn a rɔda sè bemat hom.

¹¹Vit a hwak e ji mɛn de a rɔda basa a mwat vwara mɛ, kɛ a yâng gwa mɛ, ‘Masa, na hwo tɔk Dagwi.’ Yaga mwa hɛn yɛn a rɔda tɔk me, yi e womo de a dal na nesɛl vɔk e womo de a dal na nerey.

¹²Ma rɔda hàla a yɛn neves mɛn, ko ma rɔda to bare na banɛn mɛn ko tyɔng wɛt.”

¹³Jeng de Dagwi a ha e ra wuna-na-sira hê gwong pwas, a tɛ̀ hê mɛsɛng o ha ga tɛ́ ɛ roso mo. Kayɛ pyɛ de ya ga kwop, ko ya ga tɛ́ ɛ ryoso, ya vey bagât vuru hɛ.