Read berom BeIbrani 9 Bible Online

BeIbrani 9 - berom bible

BeIbrani 9

¹Jeng ye mɛsɛng o de Dagwi à wuna hɛ na sira tanga bemat, wuna-na-sira hane mo hà vɔk badu e ra gwông rê fongol, ko hà to vɔk kwɔn de mwasi à yong yaga rê fongol o arɔng.

²Bà lɔk bǔk ba, ko bà tâng gwô mɛsɛng o, à Duk Jɛrɛ. Bà tɛ̀ pyɛ tikîs kywa-kya e ji mo tanga tebut de bà tik ɛ̀ kpam-tuk de be nɔng nɔrɔ̂ wɛ vɔk na Dagwi.

³Ko e bamâ gworugû bâng rwi duk gwô neba bà lɔk ɛ̀ buk de bà yila gwɛ, à Duk Jɛrɛ Wo Jɛrɛ.

⁴E ji mo, bà tik gàgbang rangâs pyɛ nesang hyɔɔlɔl de bà yong na dyam shinang. Bà to tik Kundung Wuna-na-Sirâ Dagwi tanga bemat, gwomo de bà bang gwɛ mwa na dyam shinang arɔng. E ji kundung o, bà tik ɛ̀ gacɔ̂ng dyam shinang de bà tɛ̀ mana e ji wɛ. Ko gwogwele Aharon de gwà kana túruk berang gwà sè e hwomo, mwa na beta beba de bà yong vɛ naka, vemo de bà jɛk ɛ̀ badu e ra vɛ.

⁵Ko pyɛ́ de yà sè sede bekɛrup kɛ betom-lagwi, de yà dura sangal Dagwi na bemat mɛ, yà sè e ra tɛ̂t kundung o. Yà shara bafabâk yɛ̄ e ra kwɔn de Dagwi à halsa a bemat banɛn mɛn. Ko jeng ya sɛ́ na be misang pyɛ́ yemo mo yɛɛlɛl a remo wɛt.

⁶Bama de bá kana ngyɛrɛ pyɛ́ mo ano, ko bepiris be kyese e buk o gwô mɛsɛng o kahɛ tuk na be ragas tom mɛn.

⁷Ko a sé e darwêy bepiris zɔng de e kyese e buk o gwô neba, ko e ragas ano zang hining zɔng e shey. E jeng o, e vɔk ɛ̀ nemi de e nára a Dagwi yaga banɛn mɛ pyɛ mɛ tanga vê bemat de ba ga ra sana tɔk, yɛn a sé ra banɛn.

⁸Yi ano, Gabik Jɛrɛ he dura a wot wɛshɛrɛk pyɛ yemo ngan: E jeng de buk gwô mɛsɛng o gwa rɔngɔl, gwong gwa sɛ́ wɛt de bemat be yel e Duk Jɛrɛ Wo Jɛrɛ.

⁹Hemo ha sé gwɔrɔ-há de he dura pyɛ́ de ya té e jeng yemo. He dura, nenɔrɔ detidetu tanga nenɔrɔ̂ yas de be yɛt vɔk na Dagwi ne tɔk tɛ̀ yêy mwat de e re a Dagwi fongol ye sè gyat wɛt.

¹⁰Nenɔrɔ mo na sé e ra pyɛ̂ re, na pyɛ̂ sɔ, tanga begwong kus detidetu de be ra na be bin sè haalal. Pyɛ́ yemo mwa ya sé e ra pyɛ̂ rebek zɔng, ko be ka ra fwom na yɛ̄ sɛ̌ jeng de Dagwi a rɔda tɛ̀ pyɛ̂ mwa e gwong pwas.

¹¹Ko Kristi a ga kana vey sede darwêy bepiris wo pyɛ́ ryat de yá kana sè e ngamo gyam. Buk gwomo de e ra fwom e gwɛ gwa dal gwô jey na nerey, ko gwa sé gyat gwa dal gwane mo arɔng. Gwa sé buk de mwasi a yong na vwɔ mɛ wɛt; yaga ano, gwa sé pyɛ cak e ji pyɛ́ de be yong e jey yemo wɛt.

¹²Jeng de Kristi á yel e Duk Jɛrɛ Wo Jɛrɛ, á yel zang hining zɔng ko he pere vey yaga mwa jeng. Á sè e nemî vyēl shi na ne nèy ngyī wɛt de a nára sede nɔrɔ yas de be yɛt vɔk na Dagwi, ko á sè e nemi mɛ pyɛ mɛ. Yi na nɛ a vibis hot yi e banɛn mot neshey gbak-gbak.

¹³Be zagat bemat de ba sé ligis e ra negwɔn rê fongol ne BeYuda na nemî vyēl shi, na ne bemus, tanga bèlilî shep ngyi. Zágat o he tɛ̀sɛ hɛn haalal, yaga he kus ɛn yi e neligis nane mo.

¹⁴Sede remo de nemî ngyāma mo na tɔk tɛ̀ bemat haalal, ko nemî Kristi ne ra pyɛ́ de ya dal yane mo sizɔng. Yi na retô Gabik de ha vɔk yɛnɛ wɛt, yɛ Kristi á nára tó mɛ sede nɔrɔ̂ yas de be yɛt vɔk na Dagwi hemo de ha sé gyat. Ko nemi mɛ arɔng na rɔda kus neyey mot jɛrɛ yi e ragâs pyɛ́ de ye vɛ̀sɛ na reku, yaga na wot a bin ra a Dagwi wo neken fwom.

¹⁵Pyɛ ma yemo de ya tɛ̀, a sé e Kristi de a wuna Dagwi tanga bemat na sira e gwong pwas. A ra ano, yaga na mwa vemo de Dagwi a ga yila hɛn yɛn a bin sey nerat de na vɔk yɛnɛ wɛt, nemo de Dagwi a ga kana sira, a rɔda nɔng ɛn. Be tɔk ra ano, yaga Kristi a ga ku, ko reku mɛ mo re vibis bemat yi e pyɛ́ de ya sé vyes, yēmo de yɛn a ragas e jeng de ba ga wuna hɛn na sira e gwong gwô mɛsɛng o.

¹⁶E rà rehâ gâs pyɛ́ de mwat e tik à — a sé gbing-gbing na be dura tsɛng-tsɛng, mwat o a ga ku e ngyen na be de hwo gâs yɛ̄.

¹⁷Rehâ gâs pyɛ́ ra sé pyɛ cak wɛt e jeng de mwat de a ha há mo a rɔngɔl kwen; be ra fwom na há mɛ mo e jeng de a ga kana ku zɔng.

¹⁸Pyɛ ma yemo de ya tɛ̀, ba hwo ra fwom na wuna-na-sira hê mɛsɛng o wɛt, sɛ̌ ba shushu nemi e ngyen.

¹⁹E susu mo, Mose à tānga ha a bemât mwa reha e ra karɛ redu de bà jɛk e Bwok-basa Badu. E bama mo, à hanta kelang hísɔ̀p, ko à wuna kɛ na wuulu swinang zoyong; à tɛ̀ yɛ̄ e ji nemî bemus tanga ne vyēl shi de à wuna nɛ na nshi, ko à zagat mɛ̀ Bwok-basa Badu tanga mwa bemat o.

²⁰Ko à ye, “Nemi ma nemo de ne man wuna-na-sira de Dagwi a nɔng in nu, na yin a gyeng hɛ.”

²¹E gwong gwomo arɔng, Mose à zagat nemi e ra buk o tanga e ra mwa pyɛ́ de bà ra fwom na yɛ̄ e jeng rê fongol.

²²Ko e ji hâ mwin, bwang o tyɔng na be kus kayɛ pyɛ jɛrɛ na nemi, sede remo de bà jɛk e Bwok-basa Badu. Vit a gwong de be hàla banɛn, sɛ̌ ba tānga shushu nemi e ngyen.

²³À kana sè gbing-gbing na be tɛ̀ pyɛ́ de ya sé sede rezinâ pyɛ́ yê lagwi jɛrɛ e gwông shushû nemi mo. Ko e rà pyɛ́ mo yê lagwi à — a sé gbing-gbing na be nára nɔrɔ̂ yas de be yɛt vɔk na Dagwi yerê hemo de ha dal na nerat, na be tɛ̀ yɛ̄ jɛrɛ.

²⁴Yaga Kristi á yel e yerê buk de mwasi a yong na vɔ mɛ wɛt, gwomo de gwa sé sede rezinâ buk gwô mwin o zɔng. Ko á wɔ̀ yel e lagwi pyɛ wɛ, yaga na a sè e nuyêl Dagwi e to mot a remo.

²⁵Kahɛ shey, darwêy bepiris wo BeYuda e kyese na nemî yas e Duk Jɛrɛ Wo Jɛrɛ. Ko Kristi a wɔ̀ yel na a nása tó mɛ zang pyak wɛt.

²⁶Ka ano, ka a yâng sangal e de sɔ̂ reyɔm zang pyak yimo de bà yong jey. Ko e ji hâ mwin, a ga dura tó mɛ zang hining zɔng ko he pere vey yaga mwa jeng. A vey a remo, e jeng de kayɛ pyɛ ye kyè wɔ̀ tala hɛ; ko a ra ano, yaga na a jut banɛn yi na nára tó mɛ sede nɔrɔ̂ yas de be yɛt vɔk na Dagwi.

²⁷Bà kana yong ɛ̀ gyam na kawɛ mwat a ku zang hining, ko e bama mo, Dagwi a rɔda ra a yɛ shɔt.

²⁸Ano arɔng, Kristi a nára tó mɛ sede nɔrɔ̂ yas de be yɛt vɔk na Dagwi zang hining, na a jut banɛ̂n bemat pyak. Ko a rɔda to ba dura tó mɛ hê neba; e jeng o, a rɔda vey, na a to ra hwâl banɛn wɛt, ko yaga na a sey vemo de ba sé gyeng ɛ.