Read berom Yakɔp 3 Bible Online

Yakɔp 3 - berom bible

Yakɔp 3

¹À begwa hom, tik na tyɔng e ji min zɔng be sè bemât basa, yaga yin a tɔk, ba rɔda ba ra a wot, bemât basa, shɔt de ya dal ye bwang o na nepep.

²Wot mwa wot e buru zang pyak. Ko ka sede mwat hwak e buru ko tyɔng wɛt e ji há de e ha, yɛ wane a sé mwat de a sila gyat, ko e tɔk gyeng tó mɛ e ji kayɛ pyɛ arɔng.

³Sede ngan: Wot e tɛ̀ a dwa nerwěy, yaga na wo ra pyɛ de wot e simo, ko wot e tɔk doyo rebek wɛ mwa vɔk e kahɛ kwɔn.

⁴Bàre hin na begbɔng bedwa-nshi arɔng: Mwa ano de ba sé berey o sedesi, ko mwa ano de gwogul gwo gangas vɛ, be ngyisi vɛ na kedyam kesɛl o zɔng na be kyè vɔk e kahɛ kwɔn de mwat ngyisi mo e simo.

⁵A sé ano na relêm mwasi arɔng: Mwa ano de ra sé pyɛ shɛl o, ko re ra kaa e ra pyɛ́ ryey o sizɔng. Yin a tɔk, e kelem kya kesɛl o zɔng de ke tɔk tɛ̀ kya he re gbɔng rehwot.

⁶Ko relem ra sé sede kya arɔng. E ji bwang nedem babek mot, a sé e relem de re yís na kayɛ yerê neves ne jey yemo, ko re shara nɛ na ne lashe mwat o mwa. Relem re tɛ̀ mwat, a sɔ reyɔm yi e jeng tɔ́ mɛ vɔk e jeng reku mɛ, sede ba ga tɛ̀ kya e ra yɛ. Ko kya mo ha sé yi e kwɔ̂n kya.

⁷Mwasi a vɔk reto na a tɛ̀ kayɛ yére ngyāma na benon, na pyɛ́ gabaga, tanga nezap ngyāma de na sé e ji nshi ye ra pyɛ de e simo, ko mwin, a ga ra ano.

⁸Ko vit a mwasi de ê kyɛm a vɔk reto e ra relem mɛ. Rā sé pyɛ vyes de re tɔk sǎ yaang wɛt, ko neves sede nedɔm de ne mɔrɔ mwat na yi e rɛ̄.

⁹Wot e somo Darwey Da mot na rɛ, ko wot e to dùsa mɛ̀ bemat de Dagwi a yong sede yɛ pyɛ mɛ arɔng.

¹⁰A sé yi e nu hining o de wot e somo Dagwi, ko yi e hɛ̄ arɔng de wot e dùsa bemat. À begwa hom, pyɛ́ yemo ya jam ano wɛt!

¹¹Nshi de ne ta na nemo de ne reneng ne tɔk nunus yi e lwel gwining o arɛt? Kée wey!

¹²À begwa hom, retîn regwi re tɔk tɔs nèy pwat, kɛ retîn anap re tɔk tɔs nèy regwi arɛt? Ano arɔng, be tɔk sɛ̀ nshi de ne ta e lwel de gwo reneng wɛt.

¹³E wɛ̌ e ji min de a vɔk netsitsɛng, de a to tɔk kayɛ pyɛ naka arɛt? Tik na a dura ano na negwɔn nerat mɛ. Tik na a ra tomong rat e gwong de gwo dura dyɛ̂ng to mɛ de ha yi na netsitsɛng.

¹⁴Ko ka sede yin e kyɛ́ in nà simo na bemat behak be sɛ̀ pyɛ cak ko tyɔng wɛt, na yin a to kat simô bato min arɔng, yin kwon dak ragey yaga netsitsɛng min o wɛt. Ka sede yin e ra ano, ko yin e sege há de ha sé tsak o.

¹⁵Netsitsɛng yerê nane ne yi e lagwi wɛt, ko ne yi e jey, na sé ne Gabik Dagwi wɛt, ko na sé yerê ne Shetan.

¹⁶Yaga e kahɛ kwɔn de bemat be kyɛ́ ɛn nà simo na bemat behak be sɛ̀ pyɛ cak, na be to simo bato mɛn, ko bé sɛ̀ sogô nehywɛ na kavɛ tomong ves arɔng.

¹⁷Ko mwat de a vɔk yerê netsitsɛng de ne yi e lagwi e tānga sè jɛrɛ, ko e to sangal tyang na bemat; e sè hywɛ, ko e sè gbàrak wɛt; e tosho reyɔ̂m bemat tyɔng wɛt, ko e dopse ragas tomong rat. E dura kasa bemat behak wɛt, ko e vɔk nenu-neba arɔng wɛt.

¹⁸Bemat de be sǎ tyang, na be to tɛ̀sɛ bemat be sǎ tyang na bemɛn yɛn a rɔda di nerat pyak de ne yi na fwom mɛn o. Ko nerat nane mo na sé sede bwal de be yɛt e pyɛ́ ryat de bá kana tus gyam.