Read berom Yakɔp 4 Bible Online

Yakɔp 4 - berom bible

Yakɔp 4

¹E sɛ́ de ye vɛ̀sɛ na como tanga yol e tē min arɛt? E cwey pyɛ́ vyes de ye tó como na bemɛn e neyey min.

²Yin e masa yis e ra pyɛ cak, ko yin e tɔk sɛ̀ yɛ wɛt; yaga ano, yin e mɔbɔs bemat. Yin a vɔk cwey pyɛ cak, ko yin e tɔk sɛ̀ yɛ wɛt; yaga ano, yin e ra yol, ko yin e tó como na bemín. Yin e sɛ̀ pyɛ wɛt, yaga yin e ra won na Dagwi wɛt.

³Ko jeng de yin e ra won na yɛ, yin e sɛ̀ pyɛ mo wɛt, yaga báre min ha sé ves. Yin e simo yin a wey na pyɛ mo yaga netâ babek min zɔng.

⁴À yin de yin e kyɛ́ in nà raa Dagwi! Yin a tɔk, vô nesa na pyɛ̂ jey yemo ha sé repugu na Dagwi. Kawɛ mwat de e simo a vo nesa na jey yemo a sé tɛ̀ tó mɛ wo repugû Dagwi.

⁵Yin bare wɛt wɔgɔ, há hemo de bà kana jɛk e Bwok-basa Dagwi ha sé yapyi zɔng, hɛ à het ngan: “Gabik de Dagwi a tɛ̀ hɛ, he sangal e neyey mot ha sila hɛ na simo na wot a sè bemɛ zɔng.”

⁶Ko sɛlɛ de Dagwi e nɔng ot e nɔrɔ he dal simo hane mo. Sede remo de bà to jɛk wɔgɔ, “Dagwi e kyɛ́ ɛ vemo de be tos bato mɛn, ko e nɔng vemo de be dyɛng bato mɛn sɛlɛ mɛ e nɔrɔ.”

⁷Yaga ano, dyɛ́ng in bato min na Dagwi. Rá in retek na gwɔ̀m cēng, ko a rɔda tele yi na yin.

⁸Gwɛ̌ sek in bagat na Dagwi, ko yɛ a rɔda gwɛ̌ sek bagat na yin arɔng. À yin bemât banɛn, pat in vɔ min yi e pyɛ́ vyes! À yin bemât neyey neba, tɛ̀ in neyey min jɛrɛ arɔng!

⁹Sangal hin yɔɔm; lashe hin neyey min, na yin a tosho yaga banɛn min. Tik na seshɛgɛsh min se tɛ́ ɛ sesin, na yey pyɛng min arɔng ye tɛ́ ɛ lashê yey.

¹⁰Dyɛ́ng in bato min e nuyêl Darwey, ko a rɔda nɔng in nerey.

¹¹À begwa hom, yin ha há ves e ra bemín wɛt. Kawɛ de a sé ha há ves e ra gwa mɛ, kɛ a sé ra a yɛ shɔt, a sé ha há ves e ra Badu Dagwi, ko a sé ra a vɛ shɔt arɔng. Ka sede hwà sé ra shɔt e ra Badu mo, na hwo to gyeng vɛ wɛt, ko hwà ga tɛ́ o mwât ra a vɛ shɔt.

¹²Mwat a sé gwining zɔng de e nɔng Badu, ko yɛ Dagwi nju mɛ zɔng de e ra a bemat shɔt. E yɛ wɛ de a vɔk reto na a sey bemat, na a to wey na yɛn arɔng. Ko hwo hwà sé wà de hwó ra a mwât vwara mō shɔt arɛt?

¹³Wok in há hom, à yin de yin e tē, “Yunung kɛ nahwol wot a rɔda wɔ e repomo ret kɛ ret, na wot a bin sangal ɛ̀ shey hining, na wot a ra byɛ, na wot a sɛ̀ dyām pyak.”

¹⁴Hm! Yin a ka tɔk pyɛ de ya rɔda ba té nahwol wɛt. Neken min na sé sɛ́ arɛt? Na sé sede wút de be di wɛ nagasi, ko e bamâ jeng tyɔng wo to tala hɛ.

¹⁵Ko tik na yin a ye e negya wɔgɔ, “Ka sede Darwey a simo, na a wul na wot tyang, ko wot a rɔda ra pyɛ yet kɛ yet.”

¹⁶Ko di, a remo yin e dak kaa, yin e to dak ragey. Mwa yerê dak kaa mo ha sé ves.

¹⁷Ano kwong, kawɛ mwat de a tɔk pyɛ de ya sé naka na a ra, ko a ra yɛ wɛt, yɛ a ga ra renɛn.