Read berom Yakɔp 5 Bible Online

Yakɔp 5 - berom bible

Yakɔp 5

¹À yin bedaberey, wok in há hom! Tosho hin, na yin a to dak sekun yaga gawey detidetu de he ba hwo e ra yin.

²Yas min ya ga wey, ko bekǔt ba ga re berugu min arɔng!

³Dyam shinang na dyam pyɛng min ya ga senge, ko senge mo ha rɔda nɔng nuha e ra yin, ko — tyɛng sede senge ha ga re dyām min — ha rɔda re babek min sede kya he re vɛ. Yin a ga tula yas min pyak e jeng yemo de ya sé ye yɛnɛ mo!

⁴Wok in, bemat de ba ga ra fwom e hiri min ba sé tosho na gbɔng tɔ̀, yaga yin a tala hɛn dyām fwom mɛn wɛt. Ko Darwey Wo Retô Mwa a ga wok sesîn bemât yɛ̂t bwal o.

⁵Yin a ga sangal e jey yemo e ji neta pyak, ko yin a ga raa netâ jey. Yin a ga mɔsɔ sede ngyī de be gyeng yɛ̄ naka yaga tuk de be ba yɛt yɛ̄.

⁶Yin a ga gang vemo de ba ra pyɛ cak vyes wɛt na shɔt, yin a ga to mɔbɔs hɛn, ko yɛn a ga ra retek na yin wɛt.

⁷Ano kwong, à begwa, niri hin sɛ̌ jeng de Darwey e ba vɛ̄ hɛ. Bàre hin na mwât cap de e gyeng pyɛ́ ryat yê hwiri mɛ. E niri e de gyêng yɛ̄ yi e rwak pwas vɔk e wo hywɛp.

⁸Ko yin arɔng, niri hin ano. Yóng in neyey min na yin a tumal gak, yaga jeng vêy Darwey ya ga vey bagat.

⁹À begwa, yin gwɔrɔng e ra bemín wɛt, yaga na Dagwi a kwon ra a yin shɔt wɛt. Mwât Shɔt o a ga vey bagat, a sé tumal e rwi duk.

¹⁰À begwa, bàre hin na bezarap Dagwi de bà ha há e ji rezâ Darwey o. Jeng de yɛn à di reyɔm, yɛn à niri. Raa hin nekyɔ̌n bol mɛn ano arɔng.

¹¹Di, e yɛn de wot e tang ɛn, à bemât yey pyɛng, yaga yɛn à tumal gak. Yin á kana wok rehâ nirî Iyɔp, ko yin a tɔk pyɛ́ ryat de Darwey à ra a yɛ e yɛnɛ mo. Mwin, Darwey e wok nemwishish bemat sizɔng, ko e tosho reyɔm mɛn tyɔng wɛt.

¹²À begwa hom, pyɛ de ya dal mwa a yet ngan: Yin sira wɛt. Yin sira na lagwi, kɛ na jey, kɛ na pyɛ cak mwa wɛt. Ka sede yin a di pyɛ mo ya sé tyɛng, ko yin ye “ey” zɔng. Ko ka sede ya sé tyɛng wɛt, ko yin ye “wey” zɔng arɔng. Ka sede yin a ra ano, ko Dagwi a rɔda gang in na shɔt wɛt.

¹³Ka sede hwak e ji min a sé di reyɔm, tik na a ra won. Ka sede hwak a vɔk yey pyɛng, tik na a somo Dagwi na râ lɛlɛ.

¹⁴Ko ka sede hwak e ro ɛ, tik na a yila bemakûk ekilisiya na be ra a yɛ won, na be mɔmɔ hɛ na něy e ji rezâ Darwey.

¹⁵Ka sede yɛn a sey tsak o, Dagwi a rɔda ra pyɛ de yɛn a ra wôn yɛ, ko won o ha rɔda tɛ̀ mwat o tyang. Darwey a rɔda tɛ̀ ɛ, a sogo cik, ko a rɔda hàla a yɛ banɛn de a ga ra arɔng.

¹⁶Yaga ano, kulsa hin banɛn min na bemín, na yin a ra a bemín won, yaga na be bin tɛ̀ in tyang. Won mwat de a sé cik e bayîs Dagwi ha vɔk reto, na he tɛ̀ gbɔng pyɛ́ ye té.

¹⁷Eliya à sè mwasi tyɛng sede wot. À ra won na gap mɛ mwa wɔgɔ, rwak wo rop wɛt. Ko rwak wà rop e sevwel o wɛt neshey netat na pɛl tyiimin.

¹⁸E bama mo, à to ra won, ko Dagwi à tɛ̀ rwak wo to hwo ropos, ko pyɛ́ yà hwo tabas mwa naka.

¹⁹À begwa hom, ka sede hwak e ji min a ye rɛ̀ng yi e gwông Dagwi de gwa sé tsak o, ko hwak e ji min a toyo na yɛ e ji gwɛ,

²⁰tik na yin a tɔk: Kawɛ mwat de a toyo na mwât banɛn yi e gwong vwes mɛ a sey nekên mwat o yi e reku, ko Dagwi ê to bang a yɛ banɛn pyak.