Read berom 1 Bitrus 1 Bible Online

1 Bitrus 1 - berom bible

1 Bitrus 1

¹Bwok-rwang gwomo yi e vwɔ hom Bitrus, tom Yɛsu Kristi. Vɔk na yin de Dagwi a ga kasa hin na yin a sè bemɛ. Yin de bá shara hin vɔk e bavwêl Pɔntus, na Galatya, na Kapadokya, na Asiya, tanga Bitinya, ko yin a sé sangal e hwomo sede bekɛnɛt.

²Dagwi Da à kana kasa hin na yin a sè bemɛ, sede remo de à kana yong ɛ̀ yimo gyam. Ko Gabik mɛ há tɛ̀ in jaram, na yin a sè vê Dagwi, yaga na yin a gyeng hâ Yɛsu Kristi, na yin a bin sè jɛrɛ yi na nemi mɛ: Tik na Dagwi a dura a yin nerat mɛ shɛrɛk, na a gwɛ̌ tɛ̀ yey min ye dyɛng.

³Tik na wot a feng a Dagwi, yɛ de a sé Dâ Darwey mot Yɛsu Kristi! A tosho reyɔm mot ding-ding; yaga ano, a nɔng ot neken nepas, ko a ra ano yi na séne Yɛsu Kristi yi e reku. A sé yaga pyɛ yane de wot a sɛt yey mot, wot a rɔda vɔk neken tanga yɛ,

⁴ko wot a rɔda sɛ̀ pyɛ̂ nedanelɔ ryat de Dagwi a tik a bemɛ. A tik yɛ̄ e lagwi, e kwɔn de ye tɔk wey kɛ ye lashe hɛ wɛt, ko ye to tɔk tɛt ɛ arɔng wɛt.

⁵Yaga yin a tɛ̀ gap min e ra Kristi, Dagwi a sé gyep in na reto mɛ, sɛ̌ a ba sey neken min. A yong ɛ, na a ba dura wɛshɛrɛk e jeng ye yɛnɛ mo gwong de a rɔda ba sey in.

⁶Yaga ano, yin a vɔk yey pyɛng ding-ding, mwa ano de neyey min ne lashe hɛn a remo, yaga ba sé masa hin e begwong detidetu. Ko yin a tɔk mása hane mo ha rɔda ros wɛt.

⁷Ba sé masa hin ano, na be bin di, tɛ̂ gap min e ra Kristi mo ha sé hê mwin. Di, dyam shinang ya sé pyɛ de be tɔk lashe yɛ̄, ko mwa ano, be mara nerât yɛ̄ na kya. Ano arɔng ba rɔda masa tɛ̂ gap min e ra Kristi de ha dal dyam shinang na nerey ding-ding, yaga na be di nerât hɛ kɛ na sé mwin arɛt? Hemo ha rɔda tɛ̀, be somo hin, na be nɔng in gbɔng nerat na nerey jeng de Yɛsu Kristi a rɔda ba dura tó mɛ wɛshɛrɛk.

⁸Yin a tɛ̀ yey min na yɛ, mwa ano de yin a ga di ɛ wɛt, ko yin a tɛ̀ gap min e ra yɛ, mwa ano de a remo yin e tɔk di ɛ wɛt. Yin a ga sila hin na gbɔng yey pyɛng, de ya dal gâp há.

⁹Yin a vɔk yey pyɛng ano, yaga Dagwi a rɔda sey neken min. Pyɛ ma yemo de ya tɛ̀, yin a tɛ̀ gap min e ra Kristi.

¹⁰À sè e ra rehâ sêy neken o de bezarap Dagwi bà jāma yɛɛlɛl na be to ngyɛgɛt, ko bà ha e ra nɔrɔ rat de Dagwi à ye, a rɔda nɔng in.

¹¹Gabik Kristi de hà sè e neyey mɛn hà kana ha a yɛn wɔgɔ, Kristi a rɔda di reyɔm gyam na a de sɛ̀ gbɔng nerey. Ano kwong, yɛn à simo na be tɔk jeng de pyɛ́ yemo ya rɔda ba té tanga begwong de ya rɔda ba té ɛ̀ arɔng.

¹²Dagwi à ga dura a yɛn, a sé yaga bato mɛn de yɛn a zarap yi na yɛ wɛt, ko a sé yaga yin. Ko a remo, bemât sharâ Yɛgɛt Yat ba ga ha a yin pyɛ́ mo mwa yi na retô Gabik Jɛrɛ de Dagwi a tomo yi e lagwi. Ko a sé e pyɛ́ ma yemo de betom-lagwi pyɛ vɛ ba wok cwey tɔ̂k yɛ̄ arɔng.

¹³Yaga ano, yóng in neyey min yaga fwom de yin a rɔda ra, ko yɛklɛ hin arɔng. Sɛt in yey min mwa e ra nɔrɔ rat de yin a rɔda ba sɛ̀ jeng de Yɛsu Kristi a rɔda ba dura tó mɛ wɛshɛrɛk.

¹⁴Gyeng in hâ Dagwi, ko yin kwon raa cwey pyɛ́ de yin á ra raane e jeng de yin á rɔngɔl e ji dunûs Yɛgɛt Yat.

¹⁵Ko sè in jɛrɛ e ji kayɛ pyɛ de yin e ra, tyɛng sede remo de Dagwi a sé jɛrɛ, yɛ de a yila hin na yin a sè bemɛ.

¹⁶Yaga bà jɛk e Bwok-basa Dagwi wɔgɔ, “Sè in jɛrɛ, yaga me ma sé jɛrɛ.”

¹⁷Jeng de yin e ra won na Dagwi, yin e yila hɛ, à Da. Ko bàre hin, jeng de e ra a bemat shɔt, e dura kasa mwat hwak wɛt, ko e rá shɔt o tyɛng na pyɛ́ de kawɛ mwat a ra. Yaga ano, bwang jeng de yin a rɔngɔl sede bekɛnɛt e ngamo e jey, tik na negwɔn min ne dura, yin e wok bengyip Dagwi.

¹⁸Yin a tɔk pyɛ de ba vibis hin mɛ̀ yi e negwɔn de na sé yapyi nemo de yin a masa yi na bedabeda min. A sé e pyɛ de ye tɔk lashe hɛ sede dyam pyɛng kɛ dyam shinang wɛt,

¹⁹ko a sé e nemi Kristi de na vɔk nerey. Yɛ a sé sede ketyimit de ba yɛrɛ vɔk na Dagwi, vit a kɛ na ram kɛ pyɛ cak vyes.

²⁰Yimo raane, gyam na be yong jey, Dagwi à kana kasa Kristi mo yaga fwom gwane mo. Ko a sé a remo, e jeng ye yɛnɛ mo de á de dura tó mɛ wɛshɛrɛk, yaga na a sɛlɛ hin.

²¹E yɛ de a tɛ̀, yin a sey tsak o na Dagwi, de a sene hɛ yi e reku, ko a to nɔng ɛ gbɔng nerat. Yaga ano, yin e tɛ̀sɛ gap min mwa e ra Dagwi, ko yin e sɛt yey min mwa e ra yɛ arɔng.

²²Yin a ga tɛ̀ bato min jɛrɛ yi na raà pyɛ́ de ya sé tsak o, ko yi ano, yin a tɛ̀ yey min na begwa min vê raa e gwong de gwa sé mwin. Yaga ano, tɛ̀ in yey na bemin na gap min tanga yey min mwa.

²³Yaga ba ga to tɔs in bepas yi na da mwasi wɛt womo de e ku, ko yi na da de e tɔk ku wɛt. Ba to tɔs in bepas yi na hâ Dagwi de ha sé ken, de ha rɔda nàra gbak-gbak arɔng.

²⁴Sede remo de bà jɛk e Bwok-basa Dagwi wɔgɔ, “Mwa bemasi ba sé sede sɔng, ko nerât vɛ na sé sede nerât jamuk sɔng. Sɔng o gwo hworok, ko jamuk o wo gaba,

²⁵ko rehâ Dagwi re nàra gbak-gbak.” Ko reha mo, rɛ̀ à Yɛgɛt Yat de bá kana shara a yin yɛ̄.