Read berom 1 Bitrus 2 Bible Online

1 Bitrus 2 - berom bible

1 Bitrus 2

¹Yaga ano, tík in ragâs kanɛ neves. Yin kwon kwɛlɛng bemat, kɛ yin vɔk nenu-neba, kɛ yin kyɛ́ in nà simo mwat hwak a sɛ̀ pyɛ cak, kɛ yin ha há ves e ra mwat hwak arɔng wɛt.

²Ko vɔk in negwɔn nèy de ba tɔs nɛ mwas zɔng, de ne simo ngas nevasal kayɛ jeng. Ano arɔng, tik na yin a wok cwey nevasal ne mwin de na sé hâ Dagwi de he tɛ̀ in na yin a ras naka vɔk e jeng de Dagwi a rɔda ba sey neken min.

³Ré in nuyel na wok cwey o, sede remo de yin a ga kana wok gwong de Darwey e dura nerat mɛ.

⁴Yaga ano, vey in na Darwey, yɛ de a sé gwofwa de gwa vɔk neken, gwomo de bemat ba kyɛ́ ɛn gwɛ wɔgɔ, gwa vɔk fwom wɛt. Ko Dagwi a ga kana kasa gwɛ, ko a jut gwɛ gwa sé pyɛ simo sizɔng e bayis mɛ.

⁵Ko yin arɔng de yin a sé sede beta de ba vɔk neken, tik na Dagwi a jut in na a lɔk mɛ̀ lɔ de Gabik mɛ ha rɔda sangal ɛ̀. E hwomo, yin a rɔda sè bemat de Dagwi a tɛ̀ in jaram na yin a sè bepiris mɛ, na yin a bin nára a yɛ nenɔrɔ wɔgɔ, yin nɔng ɛ bato min mwa. Pyɛ ma yemo de ye pɛngɛ a Dagwi yey yi na Yɛsu Kristi.

⁶Yaga bà jɛk e Bwok-basa Dagwi wɔgɔ, “Di, ma tɛ̀ gwofwa e ngamo e Siyɔn: Ma ga kasa gwɛ, ko gwa sé pyɛ simo sizɔng; a sé e gwofwa de ma rɔda bomo retîs lɔ e ra gwɛ. Ko kawɛ mwat de a tɛ̀ gap mɛ e ra Darwey, yɛ de a sé gwofwa gwane mo, a rɔda vo rekyen ko tyɔng wɛt.”

⁷Gwofwa mo gwa sé pyɛ simo sizɔng yaga yin de yin a tɛ̀ gap min e ra Yɛsu Kristi, ko vemo de ba kyɛ́ ɛn nà ra ano yɛn a rɔda di wɔgɔ, “Gwofwa de bemât lɔk duk ba kyɛ́ ɛn gwɛ wɔgɔ, gwa vɔk fwom wɛt, e gwɛ de gwa tɛ́ ɛ gbɔng gwofwa râ fwom.”

⁸Ko bà to jɛk wɔgɔ, “Gwofwa ma gwomo de gwo tɛ̀sɛ bemat be tiris bol mɛn e ra gwɛ, e gwɛ à gwogbɔng gwofwa de gwo tɛ̀sɛ bemat be gabsa.” Bemat be tiris bol e ra gwɛ, yaga yɛn e kyɛ́ ɛn nà raa hâ Dagwi. Ko a sé e pyɛ ma yemo de Dagwi à kana yong ɛ̀ gyam yaga yɛn.

⁹Ko di, yin a sé yerê bemat de Dagwi a ga kana kasa; yin a sé bepiris, yɛ de a sé Gbɔng Gwɔ̀m; yin a sé yerê bemat de ba tik jaram yaga Dagwi; ko yin a sé bemat de ba sé vê Dagwi pyɛ mɛ. A kasa hin, yaga na yin a bin ha a bemat rehâ gbɔng pyɛ́ ryey de yɛ̀ a ra. E yɛ̀ de a yila hin yi e lwīl, na yin a yel e negbey mɛ de na sé nerat sedesi.

¹⁰A raane, yin á kana sè bemât Dagwi wɛt, ko a remo, yin a sé bemat mɛ. A raane, yin á kana di gwong de Dagwi a tosho reyɔm min wɛt, ko a remo, yin a ga di gwɛ.

¹¹À besâ yey hom, yin a sé bekɛnɛt, ko yin a vɔk kwɔ̂n sangal hê tó min e jey yemo wɛt. Yaga ano, ma sé shonong e ra yin, na yin a tik cwey pyɛ́ vyes de babek min be simo yaga ye ra como na neyey min.

¹²Tik na negwɔn min e ji bemat de ba tɔk Dagwi wɛt ne sè yere nemo de bemat be somo nɛ. Ka sede yɛn a ye, yin e ragas pyɛ́ vyes, ko tik na yɛn a di pyɛ́ ryat de yin a sé ragas. Pyɛ ma yemo de yê tɛ̀ ɛn na yɛn a nɔ̂ng Dagwi nerey jeng de a rɔda ba man na yɛn.

¹³Dyɛ́ng in bato min na mwa bemat de ba vɔk reto e ra yin e jey yemo, yaga Darwey e simo ano, kɛ a sé Da vwel BeRoma de a vɔk retô mwa,

¹⁴kɛ a sé begwɔmna de a tɛ̀sɛ hɛn na yɛn a tabak vemo de be ra pyɛ́ vyes, na be to somo vemo de be ra pyɛ́ ryat.

¹⁵Yaga Dagwi e simo na pyɛ́ ryat de yin e ragas ye tɛ̀ betɔn be sǎ yuu, yɛn vemo de be ha e ra yin pyɛ́ de yɛn a tɔk yɛ̄ wɛt.

¹⁶Sangal hin sede bemat de ba sé washak. Ko yin kwon jut sangâl newashak o na yin a bang mɛ̀ pyɛ́ vyes wɛt. Ko sangal hin sede besam Dagwi.

¹⁷Nɔng in bemât mwa nerey, tɛ̀ in neyey min na begwa min vê raa, vɔk in bengyip Dagwi, ko nɔng în Da vwel BeRoma nerey arɔng.

¹⁸À yin bemât fwôm lɔ, dyɛ́ng in bato min na bedanelɔ min, na yin a sap ɛn e ji kayɛ pyɛ. Rá in ano na vemo de ba sé berat, de ba to sé hywɛ zɔng wɛt, ko mwa na vemo de ba vɔk yol arɔng.

¹⁹Mwat de e niri na reyɔm de be tak a yɛ, mwa ano de a ra pyɛ cak vyes wɛt, ko e niri, yaga e tɔk, niri mo ha sé pyɛ de Dagwi e simo — e yɛ à mwat de ba rɔda somo hɛ.

²⁰Ko ka sede mwat a ra pyɛ vyes, ko a niri jeng de ba sé dak ɛ yaga pyɛ vyes o, yaga sɛ́ de yin e jut niri mo sede pyɛ de bê somo yɛ arɛt? A sé sey pyɔlɔ̂ fwom vwes mɛ zɔng. Ko mwat de a ra pyɛ ryat, ko be tak a yɛ reyɔm yaga pyɛ ryat o, ko a niri na reyɔm o — e yɛ à mwat de Dagwi a rɔda somo hɛ.

²¹E yere negwɔn nane mo de Dagwi a ga yila hin, na yin a vɔk nɛ. Yaga Kristi pyɛ mɛ á di reyɔm yaga yin, ko a dura a yin gwong de yin a rɔda raa, yaga na yin a bin kyè e nekyɔ̌n bol mɛ.

²²Yɛ á sang ra renɛn wɛt, ko bá tɔk wok hâ kwɛlɛng e nu mɛ wɛt.

²³Mwa ano de bemat bá dùsa hɛ, ko á toyo a yɛn na sedusa wɛt. Mwa ano de bá tak a yɛ reyɔm, á shìsa hɛn wɛt, ko á ye yɛndɛng e ra Dagwi de e gas badu e tē.

²⁴Kristi pyɛ mɛ á jut banɛn mot e rebek mɛ e jeng de bá kak ɛ e ra cɔ́gɔt. A ra ano, yaga na wot a bin sè sede bemat de ba ga kushu, vemo de ba tik ragâs banɛn, ko na wot a bin sè beken, na wot a vɔk negwɔn de na sé cik e bayîs Dagwi. A sé yi na baram de á sɔ de ba ga tɛ̀ ot tyang.

²⁵A raane, yin á kyě kyè kpɛɛ sede vyēl de ya ga vusa hɛ, ko a remo, yin a ga to toyo vey na Lwek min de a sé Mwât Gyeng neyey min arɔng.