Read berom 1 Bitrus 3 Bible Online

1 Bitrus 3 - berom bible

1 Bitrus 3

¹Ano arɔng, à yin behâ weneng, dyɛ́ng in bato min na beras min. Yaga, ka sede behak e ji mɛn ba sey tsak o na rehâ Dagwi wɛt, ko negwɔn min na rɔda tɛ̀ ɛn, yɛn a doyo na be raa gwông Dagwi. Mwa ano de yin e wunta nu, na yin a basa a yɛn wɛt,

²ko yɛn a rɔda di yerê negwɔn min de na sé jɛrɛ, yɛn a rɔda to di, yin e sap Dagwi naka.

³Yin dopse bare e ra tɔrɔ hin wɛt, sede nezap begwông tak tot min, kɛ tɛ́sɛ nediri pyɛ́ de be yong na dyam shinang, kɛ tɛ́sɛ berugu ve dyām pyak.

⁴Ko tik na nerat min ne sè yerê nemo de ne yi e neyey min, nɛ à nehywɛ na neyuu min. Yerê nerat o ne sege hɛn wɛt, ko na sé pyɛ simo sizɔng e bayîs Dagwi.

⁵À sè e gwong gwomo arɔng de beha raane de bà raa Dagwi naka, vemo de bà sɛt yey mɛn mwa e ra yɛ, bà tɔrɔ hɛn. Yɛn à dyɛng bato mɛn na beras mɛn

⁶sede Sara, de à gyeng ha Abraham, ko à tang ɛ, à da mɛ. Yin a sé nèy mɛ, ka sede yin e ra pyɛ́ de ya sé ryat, ko yin e vɔk bengyip jeng de be shìsa hin wɛt.

⁷Ano arɔng, à yin beras, vɔk in gabik rat na beha min. Bàre hin, yɛn a vɔk gap sede yin wɛt. Nɔng in hɛn nerey, yaga a sé e yɛn tanga yin mwa hin de Dagwi a nɔng in nɔrɔ̂ neken. Rá in ano, yaga na pyɛ cak ye kwon dul won min wɛt.

⁸E yɛnɛ mo, tik na mwa hin yin a vɔk báre yerê hining o; wok in nemwishish bemin, ko tɛ̀ in yey min na bemin sede begwa; tosho hin reyɔ̂m bemin, ko dyɛ́ng in bato min na bemin arɔng.

⁹Yin tala mwat hwak na neves yaga pyɛ́ vyes de a ra wɛt, kɛ na sedusa, yaga a dùsa hin. Ko dura hin a yɛn nerat e negya. Pyɛ ma yemo de Dagwi a yila hin yaga yɛ. Ka sede yin a ra ano, ko yɛ a rɔda tɛ̀ nerat e ra yin.

¹⁰Sede remo de bà jɛk e Bwok-basa Dagwi wɔgɔ, “Kawɛ mwat de e simo a wok netâ sangal mɛ na a vɔk yey pyɛng e jey arɔng, tik na a hàla hâ há ves, na a tik kwɛlɛ̂ng bemat arɔng.

¹¹Tik na a hàla râ pyɛ́ vyes, na a ra pyɛ́ ryat, ko tik na a tɛ̀ gap mɛ mwa e de jāma sangâl netyang na bemat.

¹²Yaga Darwey e bɛrɛng vemo de ba sé cik e bayis mɛ, e wok newon mɛn arɔng, ko e to wok repugû vemo de be ragas pyɛ́ vyes.”

¹³E wà de a rɔda mǎ hin, ka sede yin a sé tē ngyɛ́k na yin a ra pyɛ de ya sé ryat arɛt?

¹⁴Ko ka sede yin a ka di reyɔm yaga râ pyɛ́ de Dagwi e simo, yin a sé vê yey pyɛng! Yin vɔk bengyip mwat hwak kɛ yin tik pyɛ cak ye bɔrɔk hin arɔng wɛt.

¹⁵Ko sap in Kristi e neyey min, na yin a to nɔng ɛ nerey de na sé nemɛ yaga yɛ a sé Darwey. Sè in e yong in jojot, na yin a toyo a kawɛ mwat de a rangal hin na yin a misang a yɛ pyɛ de ya tɛ̀ yin e sɛt yey min e ra Kristi.

¹⁶Ko rá in ano na nehywɛ, na yin a nɔ̂ng bemat o nerey arɔng. Tik na barê yey min he sè rat. Yi ano, jeng de bemat be ha há ves e ra negwɔn nerat min nè bemat-raà Kristi, yɛn a rɔda wok rekyên há ves de yɛn e ha.

¹⁷Yaga a dal na nerat na mwat a di reyɔm yaga râ pyɛ́ ryat — ka sede a sé simô Dagwi à hane — de mwat a di reyɔm yaga râ pyɛ́ vyes.

¹⁸Yaga Kristi pyɛ mɛ a ku yaga banɛn mot zang hining zɔng, ko reku mo ra pere vey yaga mwa jeng. Yɛ mwat de a sé cik a ku yaga bemat de ba sé cik e bayîs Dagwi wɛt, yaga na a bin vey na wot na Dagwi. Bemat ba mɔrɔ rebek mɛ, ko Gabik Dagwi ha to nɔng ɛ neken.

¹⁹Ko yi na Gabik o a wɔ̀ shara há mɛ a begabîk vemo de bà sè e ngyang.

²⁰Begabik vane mo bà sè vê bemat de bà kana kyɛ́ ɛn nà raa Dagwi e jeng de Nowa à sè lɔk gbɔng dwa-nshi mɛ, mwa ano de Dagwi o à sè niri e de gyeng ɛn. À sè bemat tyɔng zɔng wɔgɔ, bemat rwit de bà sè e ji dwa-nshi mo, ko Dagwi à séy ɛn yi na nshi mo.

²¹Nshi mo na sé e tô batisma de wo sey in a remo. Cap-hâ batisma ya sé rehâ kûs serwik yi e rebek mwat wɛt, ko ya sé wɔgɔ, wot a sé ra won na Dagwi na a tɛ̀ barê yey mot he sè rat. Ko batisma mo wo sey in yi na sene Yɛsu Kristi yi e reku.

²²Yɛ a ga kyè vɔk e lagwi, ko a sé sangal e ra gwofwa negwɔm e vwɔ yegê Dagwi. E re negwɔm e ra betom-lagwi na mwa vemo de ba vɔk reto tanga nerey e hwomo.