Read berom 1 Bitrus 5 Bible Online

1 Bitrus 5 - berom bible

1 Bitrus 5

¹Me pyɛ hom ma sé mwakûk ekilisiya, ko ma sé ha na yin de yin a sé bemakûk ekilisiya arɔng. Ma sé mwât nuha e ra reyɔm de Kristi a ga di, ko ma rɔda ba vɔk numo nang hê gbɔng nerat mɛ de ba rɔda ba dura nɛ wɛshɛrɛk. Ma sé shonong e ra yin wɔgɔ,

²bɛrɛng hin bemât ekilisiya de Dagwi a tɛ̀ e vɔ min, sede lwêk vyēl e bɛrɛng kwara mɛ. Rá in fwom o na simo min, ko a sè sede ba tɛ̀ in gbing-gbing wɛt. Rá in gwɛ, yaga yin a vɔk cwey ra a bemat fwom, ko a sè yaga byɛ de ba rɔda tala hin mɛ̀ wɛt.

³Yin kwon jāma na yin a re negwɔm na retek e ra kwara mo de Dagwi a tɛ̀ gwɛ e vɔ min, ko tik na negwɔn min ne sè yere nemo de bemat-raa mo be simo be masa nɛ.

⁴Ko jeng de Gbɔng Lwek kwara mo e ba dura tó mɛ wɛshɛrɛk, yin a rɔda ba sey pyɔlɔ de ya vɔk gbɔng nerat, ko nerât yɛ̄ ne tɔk tɛt ɛn ko tyɔng wɛt.

⁵Ano arɔng, à yin beras de yin a rɔngɔl bebot o, rá in pyɛ de bemat de ba dal in na nemakuk be ha a yin. Ko mwa hin, dyɛ́ng in bato min, na yin a ra a bemin fwom arɔng. Yaga bà jɛk e Bwok-basa Dagwi wɔgɔ, “Dagwi e kyɛ́ ɛ vemo de be tos bato mɛn, ko e dura simo mɛ vɔk na vemo de be dyɛng bato mɛn.”

⁶Yaga ano, dyɛ́ng in bato min na Dagwi de a vɔk gbɔng reto, yaga na a bin ba nɔng in nerey e jeng de a di ya jam a yɛ.

⁷Tík in a yɛ pyɛ̂ mwa de ye bɔrɔk hin, yaga e yɛ de e bɛrɛng hin naka.

⁸Yɛklɛ hin, na yin bɛrɛng nekanang arɔng! Wo repugu min, yɛ gwɔ̀m cēng, a sé kyě rìni sede gukum de wo lulum, wo kyě jāma womo de wà rɔda re.

⁹Rá in retek na yɛ, na yin a re nuyel na sêy tsak o sana kyě digis. Bàre hin, begwa min vê raa e jey mwa yɛn a sé sɔ yerê reyɔm remo arɔng.

¹⁰A remo yin a sé sɔ reyɔm yaga jeng tyɔng. Ko Dagwi a yila hin na yin a wuna hin tanga Kristi e de sangal e ji gbɔng nerat mɛ de vit a nɛ nà yɛnɛ. Yɛ de mwa nerat ne yi na yɛ a rɔda yong in naka gyat, ko a rɔda tɛ̀ in na yin a tumal gak na gap sede retis de ra sé gbarak.

¹¹Reto ra sé remɛ nesheneshey! Ano.

¹²A sé e Silvanus de a sɛlɛ me na me jɛk a yin kebwok-rwang kemo, ko ma jut ɛ a sé gwa mot, mwat-raa, de be tó yey na yɛ wɛt. Me simo na me gwɛ̌ a yin gap, na me to ha a yin kyɛrɛng wɔgɔ, pyɛ́ de ma jɛk a yin ya sé e ra gwong de Dagwi e dura a wot nerat mɛ ne mwin. Tumal hin gak e ji nɛ.

¹³Bemât ekilisiya wo Babilɔn, de Dagwi a kasa vɛ arɔng ba sé tang in show, ko Markus, hwey hom, he tang in show arɔng.

¹⁴Tang în bemin show e gwong de gwo dura tɛ̂ yey min. Tik na neyey min ne dyɛng, yin mwa de yin a sé sangal e ji nesa na Kristi.