Read berom 2 Bitrus 1 Bible Online

2 Bitrus 1 - berom bible

2 Bitrus 1

¹Bwok-rwang gwomo yi e vwɔ hom Simɔn Bitrus, sam Yɛsu Kristi, ko ma sé tom mɛ arɔng. Vɔk na yin de yin a sey tsak o na Kristi. Yerê sey tsak o min o ha sé pyɛ simo sizɔng tyɛng sede mot. A sé yaga Yɛsu Kristi e gas badu e tē de a nɔng ot mwa gwong na wot a sey tsak o na yɛ. Yɛ Yɛsu Kristi mo a sé Dagwi mot, a to sé Mwât Sey ot:

²Tik na Dagwi a dura a yin nerat mɛ shɛrɛk, na a gwɛ̌ tɛ̀ yey min ye dyɛng. Hemo hê té jeng de yin e gwɛ̌ tɔk ɛ tanga Yɛsu Darwey mot.

³Yi na gbɔng reto mɛ, Darwey mot a nɔng ot kayɛ pyɛ de wot e simo, yaga na sangal mot e jey he dura, wot e raa Dagwi naka. Gwong de a ra ano a gwot ngan: A tɛ̀ ot na wot a tɔk yɛ womo de a yila hot, na wot a sangal tanga yɛ e ji gbɔng nerey mɛ na nerat mɛ.

⁴A sé e gwong á gwane de a ga nɔng ot pyɛ́ ryey o sedesi de ya sé yê simo sizɔng, yēmo de à kana sira a wot e ra yɛ̄. A nɔng ot yɛ̄, yaga na, yi na yɛ̄, yin a hywit in yi e pyɛ́ vyes yê jey yemo de bemat be wok cwey yɛ̄. Ko a ra ano, yaga na yin a bin vɔk negwɔn yerê ne Dagwi.

⁵Yaga ano, sede remo de yin a sey tsak o na Yɛsu Kristi, yē in ngyɛ́k sizɔng na yin a vɔk negwɔn nerat arɔng. Sede remo de yin a vɔk negwɔn nerat o, tik na yin a vɔk tɔ́k;

⁶sede remo de yin a vɔk tɔ́k o, yē in ngyɛ́k na yin a gyeng bato min; sede remo de yin e gyeng bato min o, tik na yin a niri; sede remo de yin a niri mo, yē in ngyɛ́k na yin a raa Dagwi naka;

⁷sede remo de yin a raa Dagwi naka, tik na yin a tɛ̀ yey na begwa min; ko sede remo de yin a tɛ̀ yey na begwa min o, yē in ngyɛ́k na yin a tɛ̀ yey na bemât mwa arɔng.

⁸Yere negwɔn á nemo de yin e simo. Ka sede yin a vɔk nɛ pyak, ko na rɔda tɛ̀ tɔ́k min hê Darwey mot Yɛsu Kristi he sè yapyi wɛt, ko neken min na rɔda sè sede pyɛ́ de ya mara naka.

⁹Ko kawɛ mwat de a vɔk negwɔn nemo mo wɛt e bɛrɛng yɛt wɛt, e tɔk di arɔng wɛt, ko a ga ye bam wɔgɔ, ba ga fugut banɛn mɛ de á kana ragas raane.

¹⁰À begwa, yin a sé bemat de Dagwi a yila hin, na a to kasa hin. Yaga ano, yē in ngyɛ́k ding-ding na negwɔn min ne dura tsɛng-tsɛng yíla na kasa min o. Ka sede yin a ra ano, ko yin a rɔda ye bugurɛk ko tyɔng wɛt.

¹¹Ko Dagwi a rɔda wunta a yin gwong pyot, na yin a yel e Segwɔm Darwey mot Yɛsu Kristi, Mwat Sey ot, semo de sa rɔda nàra gbak-gbak.

¹²Yaga ano, me simo na me bare a yin kayɛ jeng na pyɛ́ yemo, mwa ano de yin á kana tɔk yɛ̄, ko yin a sé tumal gak e ra tsak há de yin a ga kana sey hɛ.

¹³Ma di, a sé tyɛng e jeng de ma rɔngɔl na neken, na me dopse tɛ̀ in na yin a bare na pyɛ́ yemo.

¹⁴Yaga ma tɔk, ma ga vey bagât gas me na rebek remo, sede remo de Darwey mot Yɛsu Kristi a dura a me tɛɛrɛ.

¹⁵Yaga ano, ma rɔda ye ngyɛ́k zá wɛt na me sɛ̀ a yin gwong de gwô tɛ̀, yin a rɔda bare na pyɛ́ yemo kayɛ jeng e bamâ reku hom.

¹⁶Jeng de wot á ha a yin rehâ vêy Darwey mot Yɛsu Kristi na reto, wot á ha a yin rɛ sede yá de bemat ba yong zɔng wɛt. Ko wot á di gbɔng nerey mɛ na bayis mot

¹⁷jeng de Dagwi Da á nɔng ɛ nerey na gbɔng nerat. Wot á wok fwɔ de gwa yi na womo de a vɔk gbɔng nerat de na dal mwa, gwa ye, “Hwêy yey hom à hemo, yey hom ya pɛngɛ na hɛ sizɔng!”

¹⁸Jeng de wot á sè tanga yɛ e ra raku wo jɛrɛ mo, wot pyɛ mot wot á wok fwɔ mo de gwa yi e lagwi.

¹⁹Yaga ano, wot e gwɛ̌ sey tsak o na reha de bezarap Dagwi bà kana ha. Ko a rɔda sè a yin naka na yin a tɛ̀ nehywɛ min e ra reha mo, yaga ra sé sede kywa-kya de wo lolo e dem de ha sé mwangalang sɛ̌ gasi ha ye gbey ko negbêy dàt nê tɛ̀ neyey min ne vɔk negbey.

²⁰Ko gbɔng pyɛ de yin a tɔk a yet ngan: Vit a mwat de e tɔk ra fwom na tɔ́k mɛ pyɛ mɛ na a misang neha de bezarap Dagwi bà ha, nemo de ba jɛk e Bwok-basa Dagwi arɔng.

²¹Yaga vit a há yere hê bezarap Dagwi de hà ga sang yi na simô mwasi zɔng. Ko à sè e Gabik Jɛrɛ de hà sɛ̀ reto e ra bemat vane mo, hà tɛ̀ ɛn na yɛn a ha reha de ra yi na Dagwi.