Read berom 1 Yohana 1 Bible Online

1 Yohana 1 - berom bible

1 Yohana 1

¹Wot a sé jɛk a yin e ra yɛ womo de à kana sè gyam na be yong jey. Wot a ga wok fwɔ mɛ, ko wot a ga di ɛ na bayis mot, wot a ga bɛrɛng hɛ, ko wot a ga ra ɛ na vɔ mot arɔng. E yɛ de a sé Reha de re nɔ̂ng bemat neken.

²Jeng de neken o ná nusu, wot á di nɛ. Wot a sé nɔng nuha e ra nɛ, ko wot a to sé há a yin rehâ neken gbak-gbak de nà sè tanga Dagwi Da yimo gyam, ko bá to dura a wot nɛ arɔng.

³Pyɛ́ yemo de wot á kana di, na wot a to wok, e yɛ̄ de wot a sé ha a yin, yaga na yin a bin wuna nesa na wot. Ko nesa mot nane mo na sé na Dagwi Da tanga Hwey mɛ Yɛsu Kristi.

⁴Wot a sé jɛk a yin pyɛ́ yemo, yaga na yey pyɛng mot ye bin sila hɛ gyat.

⁵Ko di, há de wot a ga wok yi na Yɛsu Kristi, hemo de wot a to sé ha a yin hɛ a het ngan: Dagwi a sé negbey, ko vit a lwīl e ji mɛ ko tyɔng.

⁶Ka sede wot a ye, wot a wuna nesa na Dagwi, ko mwa ano, wot a sé kyè e ji lwīl, wot a sé vɛ́sɛ bɔs zɔng, ko wot a sé ra pyɛ́ de ya sé tsak o wɛt.

⁷Ko ka sede wot a sé kyè e ji negbey, sede remo de yɛ a sé e ji negbey arɔng, wot a wuna nesa na bemót, ko nemî Yɛsu, Hwey mɛ, ne tɛ̀ ot jɛrɛ yi e karɛ renɛn.

⁸Ka sede wot a ye, wot a vɔk banɛn wɛt, ko wot a sé kwɛlɛng bato mot zɔng, vit a tsak o e yey mot.

⁹Ko ka sede wot a kulu banɛn mot, Dagwi a rɔda hàla a wot vɛ, yaga yɛ e gyeng sira mɛ, ko e rá pyɛ́ de ya sé cik, ko a rɔda tɛ̀ ot jɛrɛ yi e kayɛ pyɛ vyes de wot a ra.

¹⁰Ka sede wot a ye, wot a ga ra renɛn wɛt, wot a sé jut Dagwi sede mwât bɔs, ko há mɛ ha sé e ji mot arɔng wɛt.