Read berom 1 Yohana 2 Bible Online

1 Yohana 2 - berom bible

1 Yohana 2

¹À nèy hom, ma sé jɛk a yin pyɛ́ yemo, yaga na yin a ra banɛn wɛt. Ko ka sede hwak a ra banɛn, wot a vɔk mwat hwak de e tumsal e nuyêl Dagwi Da na a ra won yaga wot. Mwat o à Yɛsu Kristi, yɛ de a sé cik e bayîs Dagwi.

²E yɛ de a sé gwong de Dagwi e halsa a wot banɛn mot, e bemòt zɔng wɛt ko e banɛ̂n bemât jêy mwa arɔng.

³Ka sede wot e gyeng badu Dagwi, ko wot a tɔk tsɛng-tsɛng, wot a tɔk ɛ.

⁴Mwat de a ye, “Ma tɔk ɛ”, ko a kyɛ́ ɛ nà gyeng badu mɛ, a sé mwât bɔs zɔng, vit a tsak o e yey mɛ.

⁵Ko kawɛ mwat de e gyeng há mɛ, e yɛ de tɛ̂ yêy Dagwi ha ga sila e ji mɛ. Gwong de gwo tɛ̀ ot na wot a tɔk tsɛng-tsɛng, wot a sé sangal e ji nesa na Dagwi a gwot ngan:

⁶Kawɛ mwat de a ye, ê nàra e ji sangâl nesa na Dagwi o, tik na a raa negwɔn Yɛsu.

⁷À besa yey hom, redu de ma sé jɛk a yin e ra rɛ ra sé repas o wɛt, ko ra sé reroso mo remo de bá kana nɔng in yimo e susu mo. Redu reroso rane mo ra sé reha de yin á kana wok yimo gyam.

⁸Ko mwa ano, redu de ma sé jɛk a yin e ra rɛ ra sé repas o arɔng. Yɛsu Kristi a ga dura, redu mo ra sé tsak o, ko yin e dura ano arɔng. Wot a tɔk ano, yaga lwīl gwa sé kyè wɔ̀ kwey, ko tsak negbey na ga hwo lolo.

⁹Kawɛ mwat de a ye, a sé e ji negbey, ko mwa ano, e kyɛ́ ɛ gwa mɛ, a sé rɔngɔl e ji lwīl vey e jeng yemo.

¹⁰Kawɛ mwat de a tɛ̀ yey na gwa mɛ a sé sangal e ji negbey, ko vit a pyɛ e ji mɛ de yê tɛ̀, a ye bugurɛk.

¹¹Ko kawɛ mwat de e kyɛ́ ɛ gwa mɛ a sé e ji lwīl, e to kyě kyè e ji lwīl arɔng. E tɔk kwɔn de e kyè vɔk ɛ̀ wɛt, yaga lwīl o gwa ga tɛ̀ a yɛ nebùga e bayis mɛ.

¹²À nèy hom, ma sé jɛk a yin pyɛ́ yemo, yaga ba ga hàla a yin banɛn min yaga pyɛ de Yɛsu Kristi a ra.

¹³À bedagwɔ, ma sé jɛk a yin, yaga yin a tɔk yɛ womo de à sè yimo yi e susu mo. À bewen, ma sé jɛk a yin, yaga yin a ga re como e ra Shetan, wo neves.

¹⁴À nèy hom, ma sé jɛk a yin, yaga yin a tɔk Dagwi Da. À bedagwɔ, ma sé jɛk a yin, yaga yin a tɔk yɛ de à sè yimo yi e susu mo. À bewen, ma sé jɛk a yin, yaga yin a vɔk gap, ko hâ Dagwi ha sé sangal e ji min, ko yin a ga re como e ra Shetan, wo neves.

¹⁵Yin tɛ̀ yey na jey yemo kɛ na pyɛ́ de ya sé e ji yɛ̄ wɛt. Ka sede mwat hwak a tɛ̀ yey na jey yemo, ko a tɛ̀ yey na Dagwi Da wɛt.

¹⁶Pyɛ́ de ya sé yê jey a yet ngan: Bemat be wok cwey pyɛ̂ jey de babek mɛn be simo, be wok cwey vɔk pyɛ́ de yɛn e bɛrɛng na bayis mɛn, ko yɛn e dak ragey yaga yas mɛn. Mwa pyɛ́ yemo ya sé yê Dagwi Da wɛt, ko ya sé yê jey zɔng.

¹⁷Jey yemo tanga pyɛ̂ mwa de ya sé e ji yɛ̄, yēmo de bemat be wok cwey yɛ̄, ya sé kyè wɔ̀ tala hɛ. Ko yɛ̀ de e ra pyɛ́ de Dagwi e simo a rɔda nàra gbak-gbak.

¹⁸À nèy hom, jeng ye yɛnɛ ma yemo! Yin á kana wok, wo repugû Kristi e kyè vey, ko mwin, vê repugû Kristi pyak ba ga vey. Yi ano, wot a tɔk, jeng ye yɛnɛ ma yemo.

¹⁹Yɛn vane mo bá kana sè vining na wot wɛt, ko yaga ano, yɛn á nusu hɛn yi na wot. Yaga, ka sede yɛn á sè vining na wot, ka yɛn á yâng nàra na wot arɔng. Ko yɛn á gas ɛn na wot, yaga na be bin tɔk, vit a hwak e ji mɛn de á sè gwining na wot.

²⁰Ko yin a sé vemo de Kristi a ga nɔng in Gabik Jɛrɛ. Yaga ano, yin mwa yin a tɔk tsak há.

²¹A sé yaga yin a dun tsak há mo de ma sé jɛk a yin wɛt, ko a sé yaga yin a tɔk hɛ, ko yaga yin a to tɔk, vit a bɔs de he tɔk yi e tsak há.

²²E wǎ kwong de a sé mwât bɔs arɛt? A sé e kawɛ mwat de e tē, Yɛsu a sé Kristi wɛt, yɛ Mwat de Dagwi a kasa na a sey bemat. Mwat de e tono na Dagwi Da tanga Hwey mɛ, e yɛ de a sé mwât repugû Kristi.

²³Yaga kawɛ mwat de e tono na Hwey o e tono na Da mo arɔng, ko womo de e ha wɛshɛrɛk wɔgɔ, a sey tsak o na Hwey o e wuna nesa na Da mo arɔng.

²⁴Yaga ano, tik na pyɛ́ de yin á wok yimo yi e susu mo ye nàra e neyey min. Ka sede ye nàra e neyey min, ko yin a rɔda nàra e ji sangâl nesa na Hwey o tanga Da mo arɔng.

²⁵Ko pyɛ de Kristi a ga kana sira, a rɔda nɔng ot, yɛ à neken nesheneshey.

²⁶Ma sé jɛk a yin pyɛ́ yemo e ra vemo de ba sé simo be kwɛlɛng hin.

²⁷Ko yin à, Kristi a ga nɔng in Gabik mɛ. E jeng de Gabik o he nàra e neyey min, yin e simo yin a jāma mwat hwak na a to basa a yin wɛt. Yaga Gabik o he basa a yin pyɛ̂ mwa, ko basâ hɛ ha sé tsak o, vit a bɔs e ji hɛ. Yaga ano, raa hin pyɛ́ de Gabik o he basa a yin, ko nàra hin e ji sangal nesa na Kristi.

²⁸À nèy hom, ma to sé ha a yin, nàra hin e ji sangâl nesa na yɛ, yaga na, jeng de a rɔda ba vɛ̄ hɛ, wot e ba vɔk yey ting, ko wot a rɔda lɛsɛ hot na rekyen e jeng vey mɛ mo wɛt.

²⁹Yin a tɔk, Kristi a sé mwat de a sé cik e bayîs Dagwi. Yaga ano, tik na yin a tɔk, kawɛ mwat de e ra pyɛ de ya sé cik e bayîs Dagwi a sé hwey mɛ.