Read berom 1 Yohana 3 Bible Online

1 Yohana 3 - berom bible

1 Yohana 3

¹Di in gwong de Dagwi a tɛ̀ yey na wot ding-ding! A sé gbɔng tɛ̂ yey mɛ mo de ha tɛ̀, be tang ot, à nèy Dagwi, ko mwin, wot a sé nèy mɛ mo! Pyɛ de ya tɛ̀, bemât jey ba tɔk ot wɛt a yet: Yɛn á kana tɔk Dagwi wɛt.

²À besâ yey hom, wot a sé nèy Dagwi a remo, ko wot a tɔk e ngyen wɛt pyɛ de wot e ba sè e jeng de ye kyè vey. Ko wot a tɔk, jeng de Kristi a rɔda ba dura tó mɛ wɛshɛrɛk, wot a rɔda ba sè sede yɛ, yaga wot a rɔda ba di ɛ tyɛng sede remo de yɛ a sé.

³Kawɛ mwat de a sɛt yey mɛ, Kristi a rɔda tɛ̀ pyɛ́ yemo ye té, e gyeng tó mɛ jɛrɛ, sede remo de Kristi pyɛ mɛ a sé jɛrɛ.

⁴Kawɛ mwat de e ra banɛn a sé kyɛ́ ɛ nà gyeng badu Dagwi, yaga râ banɛn ha sé hining na kyɛ́ ɛ nà gyeng badu.

⁵Yin a tɔk, Kristi a vey e jey, yaga na a bin hashe banɛ̂n bemat, ko vit a renɛn e ji mɛ.

⁶Kawɛ mwat de e nàra e ji sangâl nesa na Kristi e re nuyel na râ banɛn wɛt. Ko kawɛ mwat de e re nuyel na râ banɛn a ga sang di ɛ wɛt, ko a tɔk ɛ arɔng wɛt.

⁷À nèy hom, mwat hwak a kwon kwɛlɛng hin wɛt! Kawɛ mwat de e ra pyɛ́ de ya sé cik a sé cik e bayîs Dagwi, sede remo de Kristi arɔng a sé cik e bayîs Dagwi.

⁸Ko kawɛ mwat de e ragas banɛn a sé wo gwɔ̀m cēng, yaga gwɔ̀m cēng à kana ra banɛn gyam na be yong jey. Pyɛ de ya tɛ̀, Hwey Dagwi ha vey e jey a yet: Ha vey, yaga na he bin wey na pyɛ̂ mwa de gwɔ̀m cēng a ga ra.

⁹Kawɛ mwat de a sé hwey Dagwi e re nuyel na râ banɛn wɛt, yaga neken yerê ne Dagwi na sé e ji mɛ. A tɔk re nuyel na râ banɛn wɛt, yaga a remo Dagwi a sé Da mɛ.

¹⁰Gwong de be tɔk vemo de ba sé nèy Dagwi tanga vemo de ba sé nèy gwɔ̀m cēng gwa sé ngan: Mwa vemo de be ra pyɛ́ de ya sé cik wɛt tanga mwa vemo de be tɛ̀ yey na begwa mɛn wɛt, e yɛn de yɛn a sé nèy Dagwi wɛt.

¹¹Há de yin á kana wok yi e susu ma het ngan: Tik na wot a tɛ̀ yey na bemót.

¹²Wot kwon sè sede Kayin wɛt; yɛ à sè wo Shetan, wo neves, ko à mɔrɔ gwa jim mɛ. Yaga sɛ́ de à mɔrɔ hɛ arɛt? À mɔrɔ hɛ, yaga tomong mɛ bà sè ves, ko vè gwa mɛ mo bà sè rat.

¹³À begwa hom, yin kwon langat hin, ka sede bemât jey be kyɛ́ ɛn hin.

¹⁴Wot a tɔk, wot a ga ye dɔ yi e reku vɔk e neken. Wot a tɔk, a sé ano, yaga wot a tɛ̀ yey na begwa mot. Kawɛ mwat de a tɛ̀ yey na begwa mɛ wɛt a rɔngɔl e nɛ̂n retô reku.

¹⁵Kawɛ mwat de e kyɛ́ ɛ gwa mɛ a sé mwât mɔbɔs bemat. Ko yin a tɔk, vit a mwât mɔbɔs bemat de a vɔk neken gbak-gbak e ji mɛ.

¹⁶Kristi a nɔng neken mɛ yaga wot. Yi ano, a tɛ̀ ot na wot a tɔk gwong de wot e tɛ̀ yey na begwa mot. Yaga ano, a sé naka na wot arɔng wot a nɔng neken mot yaga begwa mot.

¹⁷Ka sede mwat a vɔk vwɔ, ko a di gwa mɛ de a bidɛ, ko mwa ano, a wok nemwishish mɛ wɛt, yi e rɛ̌ de a tɔk ye, a tɛ̀ yey na Dagwi arɛt?

¹⁸À nèy hom, wot kwon ha na nu zɔng wɔgɔ, wot a tɛ̀ yey na bemót, ko tik na tɛ̂ yey mot he sè mwin, yerê hemo de be di yi na tomong mot.

¹⁹Tɛ̂ yey na bemót ha sé gwong de wot a rɔda tɔk, wot a sé vê Dagwi de a sé tsak o. Ha sé gwong arɔng de gwo tɛ̀ neyey mot ne dyɛng e nuyêl Dagwi

²⁰kayɛ jeng de neyey mot o ne tang ot, wot a ga buru. Yaga wot a tɔk, Dagwi a dal nɛ na nerey, ko yɛ a to tɔk pyɛ̂ mwa.

²¹Ano kwong, à besâ yey hom, ka sede neyey mot ne tang ot, wot a ga buru wɛt, ko wot e tɔk wɔ e nuyêl Dagwi na yey ting.

²²Kayɛ pyɛ de wot e ra won o, wot e sɛ̀ yɛ yi na yɛ, yaga wot e gyeng badu mɛ, ko wot e ra pyɛ́ de ye pɛngɛ a yɛ yey arɔng.

²³Redu mɛ a ret ngan: Wot tɛ̀ gap mot e ra Hwey mɛ Yɛsu Kristi, na wot a to tɛ̀ yey mot na bemót arɔng, tyɛng sede remo de yɛ a ga nɔng ot redu.

²⁴Kawɛ mwat de e gyeng badu mɛ e nàra e ji sangâl nesa na Dagwi, ko Dagwi a sé sangal e ji nesa na yɛ arɔng. Ko e Gabik de Dagwi a nɔng ot hɛ de he tɛ̀, wot a tɔk, Dagwi a sé sangal e ji nesa na wot.