Read berom 1 Yohana 4 Bible Online

1 Yohana 4 - berom bible

1 Yohana 4

¹À besâ yey hom, bezarap Dagwi vê bɔs pyak ba ga yel e kahɛ kwɔn e jey. Yaga ano, yin kwon sey tsak o na hâ kawɛ mwat de a ye, a vɔk Gabik Dagwi. Ko mara hin, na yin a di kɛ gabik de a vɔk o ha sé hê Dagwi arɛt.

²Gwong de yin a rɔda tɔk kɛ mwat a vɔk Gabik Dagwi a gwot: Kawɛ mwat de e ha wɛshɛrɛk wɔgɔ, Yɛsu Kristi á vey e jey na rebêk mwasi, e yɛ de a vɔk Gabik Dagwi.

³Ko kawɛ mwat de e tono wɔgɔ, Yɛsu á tɛ́ ɛ mwasi, a vɔk Gabik Dagwi wɛt. Ko a vɔk gabîk wo repugû Kristi. Yin á kana wok, ha sé kyè vey, ko a remo, ha ga kana yel e jey.

⁴Ko di, à nèy hom, yin a sé vê Dagwi, ko yin a ga di wɛng e ra bezarap Dagwi vê bɔs o, yaga Gabik de ha sé e neyey min ha dal hemo de ha sé e neyey vemo de ba sé vê jey.

⁵Bemât bɔs o ba sé vê jey yemo. Yaga ano, yɛn e ha pyɛ́ de ya sé ye jey zɔng, ko bemât jey o be wet betong na yɛn arɔng.

⁶Ko wot, wot a sé vê Dagwi. Kawɛ mwat de a tɔk Dagwi e wet betong na wot, ko womo de a sé wo Dagwi wɛt e wet betong na wot wɛt. Gwong á gwomo kwong de wot a tɔk, mwat o a vɔk Gabik de ha sé tsak o kɛ a vɔk gabik de he kwɛlɛng bemat.

⁷À besâ yey hom, tik na wot a tɛ̀ yey na bemót, yaga tɛ̂ yey he yi na Dagwi. Kawɛ mwat de a tɛ̀ yey na Dagwi tanga bemat a sé hwêy Dagwi, ko a tɔk Dagwi arɔng.

⁸Ko kawɛ mwat de a tɛ̀ yey na Dagwi tanga bemat wɛt a tɔk Dagwi wɛt, yaga negwɔn Dagwi na sé ne tɛ̂ yey.

⁹Gwong de Dagwi á dura a wot, a tɛ̀ yey na wot gwa sé ngan: Á tomo Hwey mɛ de ha sé nju hɛ zɔng vey e jey, yaga na wot a bin vɔk neken yi na hɛ.

¹⁰Yerê tɛ̂ yey de me ha e ra hɛ ha sé ngan: A sé e wot de wot a tɛ̀ yey na Dagwi wɛt, ko a sé e yɛ de a tɛ̀ yey na wot, ko a tomo Hwey mɛ, na he sè gwong de Dagwi e hala a wot banɛn mot.

¹¹À besâ yey hom, sede remo de Dagwi a tɛ̀ yey sizɔng na wot ano, a sé naka na wot a tɛ̀ yey na bemót arɔng.

¹²Vit a mwat de a ga sang di Dagwi. Ko ka sede wot a tɛ̀ yey na bemót, Dagwi a sé sangal e ji nesa na wot à wane, ko tɛ̂ yey mɛ ha ga sila hɛ e ji mot.

¹³Dagwi a ga nɔng ot Gabik mɛ. A sé yi na hɛ de wot a tɔk, wot a sé sangal e ji nesa na yɛ, ko yɛ arɔng a sé sangal e ji nesa na wot.

¹⁴Wot pyɛ mot wot a ga di, ko wot e to nɔng nuha wɔgɔ, Dagwi Da á tomo Hwey mɛ na he bin sè Mwât Sêy jey.

¹⁵Kawɛ mwat de a ye ey, Yɛsu a sé Hwey Dagwi, Dagwi a sé sangal e ji nesa na yɛ, ko yɛ arɔng a sé sangal e ji nesa na Dagwi.

¹⁶Ko wot pyɛ mot wot a tɔk, Dagwi a tɛ̀ yey na wot, ko wot a tɛ̀ gap mot e ra tɛ̂ yey mɛ mo arɔng. Negwɔn Dagwi na sé ne tɛ̂ yey. Kawɛ mwat de e nàra e de tɛ̂ yey na Dagwi tanga mumwɛ a sé sangal e ji nesa na Dagwi, ko Dagwi a sé sangal e ji nesa na yɛ.

¹⁷Tɛ̂ yêy Dagwi ha ga sila hɛ e ji mot, yaga na wot a bin ba vɔk yey ting e Tuk Shɔt. Ko wot a rɔda ba vɔk yey ting o, yaga sangâl nesa mot na Dagwi e jey yemo ha sé tyɛng na hê Kristi.

¹⁸Mwat de Dagwi a tɛ̀ yey na yɛ a vɔk bengyip wɛt. Ko tɛ̂ yey de he sila e ji mwat he ro bengyip yi na yɛ. Mwat a vɔk bengyip jeng de a sé gyeng tabak. Yaga ano, mwat de a vɔk bengyip e dura, tɛ̂ yêy Dagwi ha ga sila e ji mɛ wɛt.

¹⁹Wot a tɛ̀ yey na Dagwi tanga bemót, yaga Dagwi a tānga tɛ̀ yey na wot.

²⁰Ka sede mwat hwak a ye, “Ma tɛ̀ yey na Dagwi”, ko a kyɛ́ ɛ gwa mɛ, a vɛ́ bɔs zɔng. Yaga, ka sede mwat o a tɛ̀ yey na gwa mɛ wɛt womo de yɛ e tɔk di, yi e rɛ̌ kwong de ê tɔk tɛ̀ yey mɛ na Dagwi de yɛ e tɔk di wɛt arɛt?

²¹Ko redu de Dagwi a nɔng ot ra sé ngan: Tik na kawɛ mwat de a tɛ̀ yey na Dagwi a tɛ̀ yey na gwa mɛ arɔng.