Read berom 1 Yohana 5 Bible Online

1 Yohana 5 - berom bible

1 Yohana 5

¹Kawɛ mwat de a sey tsak o, Yɛsu a sé Mwat de Dagwi a kasa na a sey bemat, a sé hwêy Dagwi. Ko kawɛ mwat de a tɛ̀ yey na dâ hwey a tɛ̀ yey na hwey o arɔng.

²Wot a tɔk wot a tɛ̀ yey na nèy Dagwi, ka sede wot a tɛ̀ yey na Dagwi, na wot a gyeng badu mɛ arɔng.

³Ka sede wot a tɛ̀ yey na Dagwi, ko hemo he dura, wot e gyeng badu mɛ arɔng. Ko badu mɛ mo ba dal gap mot wɛt,

⁴yaga kahɛ hwêy Dagwi he tɔk di wɛng e ra jey yemo. Ko gwong de wot e di wɛng e ra jey yemo gwa sé yi na sey tsak o na Yɛsu Kristi.

⁵E wà de e di wɛng e ra jey yemo ɛ? A sé e yɛ de a sey tsak o, Yɛsu a sé Hwey Dagwi.

⁶A sé e yɛ Yɛsu Kristi de á vey yi e nshî batisma mɛ tanga yi e nemi de á shushu e jeng reku mɛ. Ko á sè yi e nshi zɔng de á vey wɛt, ko á sè yi e nshi tanga nemi arɔng. Ko Gabik Dagwi ha ye, a sé ano, yaga Gabik he ha pyɛ de ya sé tsak o zɔng.

⁷Pyɛ́ tyat ya sɛ́ de ye ha, a sé ano.

⁸Pyɛ́ mo, yɛ̄ à Gabik Dagwi, na nshi, tanga nemi. Ko mwa pyɛ́ tyat o ye ha pyɛ jining o.

⁹Wot e sey nuha bemat. Ko nuha Dagwi ha dal mɛn o na nerey, yaga a sé e há de Dagwi pyɛ mɛ a ha e ra Hwey mɛ.

¹⁰Ano kwong, kawɛ mwat de a tɛ̀ gap mɛ e ra Hwey Dagwi a ga sey nuha hemo e yey mɛ à wane. Ko kawɛ mwat de a sey tsak o na ha Dagwi wɛt a ga jut Dagwi sede mwât bɔs, yaga a ga sey tsak o na pyɛ́ de Dagwi a ha e ra Hwey mɛ wɛt.

¹¹Ko pyɛ́ de a ha mo ya sé wɔgɔ, Dagwi a ga nɔng ot neken nesheneshey, ko a ga nɔng ot neken o yi na Hwey mɛ.

¹²Kawɛ mwat de a vɔk Hwey mɛ mo e yey mɛ a vɔk neken o, ko kawɛ mwat de a vɔk Hwey Dagwi e yey mɛ wɛt a vɔk neken o wɛt.

¹³Ma sé jɛk a yin pyɛ́ yemo, yin de yin a tɛ̀ gap min e ra Hwey Dagwi, yaga na yin a bin tɔk, yin a vɔk neken nesheneshey.

¹⁴Wot a vɔk yey ting e nuyêl Dagwi, yaga wot a tɔk, yɛ e wok ot kayɛ jeng de wot e ra wôn pyɛ cak de ya sé tyɛng na pyɛ de e simo.

¹⁵Sede remo de wot a tɔk, yɛ e wok ot jeng de wot e ra wôn pyɛ cak, ano kwong wot a to tɔk, wot a ga sɛ̀ pyɛ de wot a ra won o na yɛ.

¹⁶Ka sede mwat hwak a di gwa mɛ mwat-raa a sé ra renɛn yere remo de re vey na reku wɛt, ko tik na yɛ a ra won na Dagwi, ko Dagwi a rɔda nɔ̂ng gwa mɛ mo neken. Há hemo ha sé yaga bemat de be ra banɛn de be vey na reku wɛt. Ko renɛn rehak ra sɛ́ de re vey na reku. Ma sé ye wɛt wɔgɔ, bē ra won na Dagwi yaga rane à renɛn o.

¹⁷Kayɛ pyɛ vyes de mwat e ra ya sé renɛn, ko banɛn bahak ba sɛ́ de be vey a mwat na reku wɛt.

¹⁸Wot a tɔk, vit a mwat de a sé hwêy Dagwi de e re nuyel na râ banɛn. Kristi, Hwey Dagwi, e gyep ɛ naka, ko Shetan, wo neves, e tɔk ra a yɛ pyɛ cak wɛt.

¹⁹Wot a to tɔk, wot a sé vê Dagwi, mwa ano de wò neves a sé re negwɔm e ra jey yemo mwa.

²⁰Ko wot a tɔk, Hwey Dagwi ha ga vey. Ha ga nɔng ot tɔ́k, yaga na wot a bin tɔk mɛ̀ Dagwi wo tsak o. Ko wot a sé sangal e ji nesa na Dagwi wo tsak o mo, sede remo de wot a sé e ji sangâl nesa na Hwey mɛ Yɛsu Kristi arɔng. E hɛ de ha sé Dagwi wo tsak o, ko e hɛ de ha sé neken nesheneshey.

²¹À nèy hom, gyéng in bato min yi e cī!