Read berom Besuga Israyɛl 1 Bible Online

Besuga Israyɛl 1 - berom bible

Besuga Israyɛl 1

¹Bama de Yɔshuwa a ga ku, ko BeIsrayɛl ba hwo rangâl Dagwi Darwey, ba ye, “Yi e yɛ̌ yere de bemat mɛn ba rɔda kyè e nuyel mot vɔk e de tô como na BeKanaan arɛt?”

²Ko Dagwi Darwey a toyo a yɛn, a ye, “E yerê Yuda de yà rɔda kyè wɔ. Ma ga nɔng ɛn sevwel o e vwɔ mɛn.”

³Ko BeYuda ba yâng begwa mɛn yerê Simɛyɔn, “Vey wuna hin na wot e bak sevwel de ba ga nɔng ot, na wot tó como na BeKanaan. E bama mo ko wot a rɔda to wuna hot na yin e bak o mwin arɔng.” Ko yerê Simɛyɔn ya kyè tanga yɛn.

⁴Yɛn mwa ba wɔ̀ tó como mo. Ko Dagwi Darwey a nɔng ɛn wɛng e ra BeKanaan tanga BePɛrizi. E repomo de bà tang rɛ, à Bɛzɛk, yɛn a re bemat gu kuru (10,000) e como mo. E hwomo yɛn a sɛ̀ gwɔ̀m repomo mo, womo de ba tang ɛ, à Adoni-Bɛzɛk, ko yɛn a tó como na yɛ.

⁶Adoni-Bɛzɛk o a tele, ko yɛn a ro ɛ, yɛn a wɔ̀ vo ɛ; ko yɛn a yɛt gbɔng nèy vɔ mɛ na gbɔng nèy bol mɛ, ba paa nɛ.

⁷E bama mo, Adoni-Bɛzɛk a ye, “Ma kana yɛt a begwɔ̀m kuru bataama gbɔng nèy vɔ mɛn na gbɔng nèy bol mɛn, ko yɛn a kyě tɔng cɛ̂k pyɛ́ e nɛ̂n tebut hom. A remo, Dagwi a ga tala me pyɔlɔ hom e ra pyɛ de ma kana ra a yɛn.” Yɛn a kyè na yɛ vɔk e Yɛrusalɛm, ko a wɔ̀ ku e hwomo.

⁸BeYuda ba hwo repomô Yɛrusalɛm na como, ko yɛn a re rɛ, yɛn a tow bemat o na bewal, ko yɛn a dak kya e repomo mo arɔng.

⁹E bamâ hane, BeYuda yɛn a wɔ̀ tó como na BeKanaan de ba sé sangal e bapomô beraku, na vemo de ba sé sangal e bak hêy gbingiring e rwa ta, tanga vemo de ba sé sangal e bapomô berahwol o.

¹⁰BeYuda mo ba re nuyel na tô como na BeKanaan de ba sé sangal e repomô Hɛbrɔn. Bà kana yishi rezâ repomo mo, à Kiriyat-Arba. Yɛn a mɔbɔs bedanelɔ behak betat de ba tang ɛn, à Sheshai, na Ahiman tanga Talmai.

¹¹Yi e hwomo yɛn a wɔ́ e repomô Debir remo de bà kana yishi rɛ, à Kiriyat-Sɛfɛr.

¹²Ko hwak e ji mɛn, de ba tang ɛ, à Kalɛp, a ye, “Kawɛ mwat de ê wɔ̀ tó como na bemât repomô Kiriyat-Sɛfɛr, ko a re ɛn e como mo, ma rɔda nɔng ɛ hwóng hom Aksa, na a tɛ́ ɛ hwâ weneng mɛ.”

¹³Ko Ɔtniyɛl, hwêy Kenas, gwa Kalɛp swɛl o, a wɔ̀ tó como mo, a re ɛn, ko Kalɛp a vɔk a nɔng ɛ hwóng mɛ Aksa, na a tɛ́ ɛ hwâ weneng mɛ.

¹⁴E jeng weneng o, Ɔtniyɛl a hwo hanat na hwā mɛ wɔgɔ, a rangâl da mɛ na a nɔng ɛn cap; jeng de hwā mo a gyirik yi e ra madung, ko Kalɛp a yang ɛ, “Ala ɛ?”

¹⁵A ye, “Di, hwà ga nɔng me hêy gbingiring, ko tik na hwo ra a me pyɛ ryat, na hwo nɔng me kwɔ̂n lel nshi arɔng”. Ko Kalɛp a nɔng ɛ nekwɔn nehak de na vɔk lel nshi e berahwol mwa tanga e vwel o.

¹⁶BeKeni, yerê tya Mose yɛn a kyè tanga BeYuda yi e Repomô Tyét Ryey vɔk e bak hêy Yuda de ha sé e kwɔn gbingiring e batin na Arat. E hwomo yɛn a sangal tanga BeAmalɛk.

¹⁷Ano kwong, BeYuda na begwa mɛn BeSimɛyɔn ba re nuyel, ba wɔ̀ hwo e ra BeKanaan de ba sé sangal e Zefat na como, ko yɛn a re ɛn, ba wey na repomo mo hywiri. Yaga ano, ba vo a repomo mo rezâ, Hɔrma, wɔgɔ, wey hywiri.

¹⁸Dagwi Darwey á sè tanga BeYuda, ko yaga ano yɛn a vɔk sevwêl bak beraku. Ko bapomô Gaza, na Ashkɛlɔn, na Ɛkrɔn mwa na yɛnɛ̂ vwêl vɛ yɛn a tɔk re vɛ na como wɛt, yaga bemat vwel o ba vɔk bekyɛkyɛ̂ bedwa vê dyam.

²⁰Ba nɔng Kalɛp repomô Hɛbrɔn, sede remo de Mose à kana ha a yɛ, yɛ̀ kwong a ro cáng nèy Anak nane netat yi e rɛ.

²¹Ko bemât yerê Bɛnyamin ba tɔk ro BeYebus de ba sé na sangal e Yɛrusalɛm wɛt, yaga ano yɛn a re nuyel na sangal e dem hining tanga bemât yerê Bɛnyamin vey e jeng yemo.

²²Ano kwong bemât lɔ Yɔsɛf, yɛn à yére Ɛfrayim na Manase, yɛn a wɔ̀ hwo e ra bemât Bet-Ɛl, ko Dagwi Darwey á sè tanga yɛn.

²³Yɛn a tomo bemat e lɛrɛ, na be wɔ̀ bɛrɛng a yɛn repomô Bet-Ɛl o, rēmo de bà kana yishi rɛ, à Lus.

²⁴Bemât wɛlɛ vane mo ba di mwat hwak de a sé nusu yi e ji repomo mo, yɛn a yang ɛ, “Wot e ra won na hwo, dura a wot gwong de wot ê kwey ɛ, na wot yel e ji repomo remo, ko wot a rɔda ra a hwo pyɛ vyes cak wɛt.”

²⁵Yɛ kwong a dura a yɛn gwong de yɛn a yel ɛ̀. Yɛn a yel, ko yɛn a tow bemat o mwa na bewal, ko mwat wane tanga mwa belɔ mɛ zɔng de ba tik ɛn beken.

²⁶Mwat wane mo a nusu hɛ, a kyè vɔk e sevwêl BeHiti. E hwomo a lɔk ɛ̀ repomo, ko a vo a rɛ rezâ Lus, reza ma rane de be yishi mɛ̀ rɛ vey e jeng yemo.

²⁷Bemât yerê Manase yɛn a ro bemât bapomô Bet-Sheyan na vê Taanak, na vê Dor, na vê Ibleyam, na vê Megido tanga nebapomo mɛn wɛt. Ko BeKanaan ba re nuyel na sangal e ji yɛnɛ̂ vwel hane mo.

²⁸Jeng de BeIsrayɛl ba gwɛ̌ tɛ̀ gap, yɛn a tɛ̀ BeKanaan gbing-gbing be ra a yɛn fwom, ba ro ɛn yi e tē mɛn wɛt.

²⁹Bemât yerê Ɛfrayim arɔng ba ro BeKanaan de ba sé sangal e Gɛzɛr wɛt, ko bemat o ba re nuyel na sangal mɛn e dem hining tanga yɛn.

³⁰Bemât yerê Zɛbulun ba ro BeKanaan de ba sé sangal e Kitrɔn kɛ vê Nahalɔl wɛt, bemat o ba re nuyel na sangal na yɛn e dem hining, ko BeZɛbulun ba tɛ̀ ɛn gbing-gbing be ra a yɛn fwom.

³¹Bemât yerê Ashɛr arɔng ba ro bemât bapomô Ako, na vê Sidɔn, na vê Aklap, na vê Akzip, na vê Hɛlba, na vê Afik, tanga vê Rehop wɛt. Yaga ano BeAshɛr ba sangal tanga BeKanaan e dem hining o.

³³Bemât yerê Naftali ba ro bemât Bet-Shɛmɛsh na bemât Bet-Anat wɛt, ko yɛn a re nuyel na sangal e dem hining na BeKanaan de ba sé e vwel o. Ba tɛ̀ bemat vane mo gbing-gbing be ra a yɛn fwom.

³⁴Ko BeAmɔr ba gang bemât yerê Dan vɔk e bak vwêl bahwol, yɛn a simo a BeDan o be sangal e bak tyɛl tanga yɛn wɛt.

³⁵BeAmɔr ba tɛ̀ tuushush e de sangal e Ayalɔn, na Shaalbim tanga Raku Heres. Ko bemât lɔ Yɔsɛf yɛn à yére Ɛfrayim na Manase, ba ye ngyɛ́k na gap mɛn mwa, ba tɛ̀ ɛn gbing-gbing be ra a yɛn fwom.

³⁶E rwa batin yɛnɛ̂ sevwêl BeAmɔr ha kaba yi e bak Sela wɔ tut e hyôk rakû Akrabim vɔk e nuyel.