Read berom Besuga Israyɛl 10 Bible Online

Besuga Israyɛl 10 - berom bible

Besuga Israyɛl 10

¹E bamâ rekû Abimɛlɛk, ba sɛ̀ mwat hwak reza mɛ, à Tola Puwa Dodo yi e yerê Isakar; a nusu na a bin sey BeIsrayɛl. A sangal e Shamir e vwêl bahwol Ɛfrayim.

²A sè wo nuyêl BeIsrayɛl neshey kuru baba na nɛ netat, a ku, ko ba lɛrɛ hɛ e Shamir.

³E bamâ Tola ba sɛ̀ hwak reza mɛ, à Yayir mwât Gileyat, á to sè mwât nuyêl BeIsrayɛl neshey kuru baba na nɛ neba.

⁴A vɔk nèy beras kuru batat, nemo de na lagsa bemadung kuru batat. Nà vɔk bapomo kuru batat e vwêl Gileyat. Ba rɔngɔl yishi bazâ vɛ, à Hawot-Yayir wɔgɔ, bapomô Yayir.

⁵Yayir o a ku, ko ba lɛrɛ hɛ e Kamon.

⁶BeIsrayɛl ba to ra a Dagwi Darwey banɛn, yɛn a to hwo re a BeBaal na BeAshtarot fongol, tanga bedagwi BeSirya, na vê BeSidɔn, na vê BeMowap, na vê BeAmɔn, tanga vê BeFilisti. Yɛn a kyɛ́ ɛn nà raa Dagwi Darwey, yɛn a kyɛ́ ɛn nà re a yɛ fongol.

⁷Dagwi Darwey kwong a wok shôm BeIsrayɛl, ko a nára hɛn e vwɔ̂ BeFilisti tanga BeAmɔn,

⁸vemo de ba ró ɛn, ba tak a yɛn reyɔm e shey hane. E neshey kuru na nɛ rwit de na raa, ba teshe na BeIsrayɛl de ba sé e rwa rak e gurâ Rɔt Yɔrdan e ji sevwêl Gileyat e kwɔn de BeAmɔr ba sangal ɛ̀.

⁹BeAmɔn ba ye dɔ à gurâ Yɔrdan na be tó como na yére Yuda, na Bɛnyamin, tanga Ɛfrayim arɔng. Yaga ano BeIsrayɛl bá sè e ji rezot sizɔng.

¹⁰Ano kwong, BeIsrayɛl ba tosho a Dagwi Darwey, yɛn a yang ɛ, “Wot a ga ra a hwo banɛn, yaga wot a ga tik nà raa hwo, Dagwi mot, ko wot a re a BeBaal fongol.”

¹¹Dagwi Darwey a toyo a yɛn, a ye, “A sé e me de ma sey in yi na BeMisra, na BeAmɔr, na BeAmɔn, tanga BeFilisti wɛt arɛt?

¹²BeSidɔn, na BeAmalɛk, tanga BeMawon bá nɔngɔs hin reyɔm arɔng, ko yin á tosho a me ko ma sey in yi e vɔ mɛn.

¹³Mwa ano yin a doyo a me bama, yin a re a bedagwi behak fongol, yaga ano ma rɔda to sey in wɛt.

¹⁴Kyè in, na yin wɔ tosho a bedagwi vane de yin a kasa sesin! Tik na yɛn a sey in yi e rezot de yin a sé di!”

¹⁵Ko BeIsrayɛl ba yâng Dagwi Darwey, “Wot a ga rá a hwo banɛn, ra a wot pyɛ de hwà di ya jam a hwo; ko gabɔk wɛt, wot a sé ra won na hwo sey ot yunung.”

¹⁶Ano kwong, yɛn a hwo paa bedagwi beduk mɛn yi e tē mɛn, yɛn a re a Dagwi Darwey fongol. Yɛ kwong a tɔk to niri na bɛrɛng rezot mɛn wɛt.

¹⁷A vane ano, BeAmɔn ba tula bemât como mɛn, yɛn a tɛ̀ durâ como mɛn e Gileyat. BeIsrayɛl arɔng ba tula hɛn, ko yɛn a tɛ̀ durâ como mɛn e Mizpa.

¹⁸Ko bemât nuyel na bemât Gileyat ba yâng bemɛn, “E wǎ de ê tānga wɔ̀ pɛrɛ tô como na BeAmɔn ɛ? Ko e yè de a rɔda sè mwât nuyel mwa bemât Gileyat.”